༢༠༡༠ ཟླ་ ༡༠ ཚེས་ ༡༣ རེས་གཟའ་ལྷག་པ།
༄༅། །ཉེ་ལམ་ནོ་བེལ་གཟེངས་རྟགས་ཚོགས་ཆུང་ནས་འདི་ལོའི་ནོ་བེལ་ཞི་བདེའི་གཟེངས་རྟགས་དེ་བཞིན་རྒྱ་རིགས་མང་གཙོ་དོན་གཉེར་བ་སྐུ་ཞབས་ལིའུ་ཞའོ་པོ་ལ་ཐོབ་པར་འཚམས་འདྲིའི་གསལ་བསྒྲགས་སྤེལ་ཡོད། དེ་ཡང་བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༡༠ ཟླ་ ༡༠ ཚེས་ ༡༡ ཉིན་རྒྱ་རིགས་མང་གཙོ་དོན་གཉེར་བ་སྐུ་ཞབས་ལིའུ་ཞའོ་པོ་ལ་འདི་ལོའི་ནོ་བེལ་ཞི་བདེ་གཟེངས་རྟགས་ཐོབ་པར་བོད་མི་ཡོངས་ཀྱི་ཚབ་ཞུས་ཏེ་དགའ་བསུའི་འཚམས་འཕྲིན་ཞིག་གནང་ཡོད་པའི་ནང་འཁོད་དོན།
སྐུ་ཞབས་ལིའུ་ཞའོ་པོ་ལ་ཕྱི་ལོ་ ༢༠༡༠ ལོའི་ནོ་བེལ་ཞི་བདེའི་གཟེངས་རྟགས་ཐོབ་པར་བོད་མི་ཡོངས་ཀྱི་ཚབ་ཞུས་ཏེ་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱིས་འཚམས་འདྲིའི་དགའ་བསུ་ཞུ་རྒྱུ་ཡིན། ནོ་བེལ་གཟེངས་རྟགས་ཚོགས་ཆུང་ནས་སྐུ་ཞབས་ལིའུ་ཞའོ་པོ་ལ་ཞི་བདེའི་གཟེངས་རྟགས་གནང་བ་དེས་རྒྱ་ནག་ནང་འགྲོ་བ་མིའི་ཐོབ་ཐང་ལ་གུས་བརྩི་དང་མང་གཙོའི་འཕེལ་རིམ་ཐོག་ཡར་རྒྱས་འགྲོ་རྒྱུར་ལེའུ་གསར་པ་ཞིག་འགོ་འཛུགས་རྒྱུ་ཡིན་པ་རེད། སྐུ་ཞབས་ལིའུ་ཞའོ་པོས་ཧ་ཅང་དཀའ་ངལ་ཅན་གྱི་གནས་བབ་འོག་དུས་ཡུན་རིང་པོ་ཞིག་ནས་འཚེ་མེད་ཞི་བའི་ཐབས་ལམ་ཐོག་རྒྱ་ནག་མང་གཙོར་བསྒྱུར་རྒྱུའི་ཞབས་འདེགས་གྲུབ་པ་དེས་རྒྱ་ནག་གཞུང་གིས་དེང་རབས་རྒྱལ་སྤྱིའི་ནང་མང་གཙོའི་རིང་ལུགས་ཀྱི་ལྟ་གྲུབ་དང་ཁྲིམས་ལུགས་ལ་གུས་བརྩི་ལག་བསྟར་བྱ་དགོས་པའི་རྒྱ་ནག་མི་མང་སྤྱི་ཡོངས་ཀྱི་མངོན་འདོད་མཚོན་བཞིན་ཡོད་པ་དང། དེ་བཞིན་གཟེངས་རྟགས་དེས་རྒྱ་ནག་རྒྱལ་ཁབ་དང་མི་མང་ཚོའི་ཕུགས་རྒྱང་རིང་པོའི་ཁེ་ཕན་ཆེད་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་འགོ་ཁྲིད་ཚོས་སྟོབས་ཤུགས་རྒྱས་བཞིན་པའི་ད་ལྟའི་རྒྱ་ནག་གི་གནས་བབ་དང་འོས་འཚམས་ཀྱིས་ཞི་བའི་ལམ་ནས་སྲིད་བྱུས་ལ་བསྒྱུར་བཅོས་གཏོང་དགོས་པ་དྲན་སྐུལ་གྱི་བརྡ་བཏང་བ་ཞིག་ཀྱང་ཡིན། གཞན་ཡང་སྐུ་ཞབས་ལིའུ་ཞའོ་པོ་ནི་འགྲོ་བ་མིའི་གཞི་རྩའི་བསམ་བརྗོད་དང་འདུ་འཛོམས་ཀྱི་རང་དབང་ཆེད་རྒྱ་ནག་གི་བཙོན་དུ་ལུས་ཡོད་པའི་རྒྱ་རིགས་མང་གཙོ་དོན་གཉེར་བ་མང་པོ་ཞིག་གི་སྐུ་ཚབ་ཀྱང་མཚོན་བཞིན་ཡོད།
ང་ཚོས་གཟེངས་རྟགས་དེས་རྒྱ་ནག་འགོ་ཁྲིད་ཚོ་རྨོངས་གཉིད་ལས་བསད་དེ་སྐུ་ཞབས་ལིའུ་ཞའོ་པོས་གཙོས་པའི་ཆབ་སྲིད་ཀྱི་བསྙོན་འཛུགས་ཕོག་པའི་རྒྱ་ནག་མི་མང་དེ་དག་འཕྲལ་དུ་གློད་བཀྲོལ་ཡོང་བའི་རེ་བ་ཞུ་བཞིན་ཡོད། ང་ཚོས་སྐུ་ཞབས་ལིའུ་ཞའོ་པོ་ཕྱི་ལོ་ ༢༠༡༠ ཟླ་ ༡༢ ཚེས་ ༡༠ ཉིན་ཨོ་སོ་ལོར་འཚོགས་རྒྱུའི་གཟེངས་རྟགས་མཛད་སྒོར་ཕེབས་ཐུབ་པའི་རེ་བ་ཞུ་བཞིན་ཡོད་ཅེས་སོགས་འཁོད་ཡོད།།
