༢༠༡༠ ཟླ་ ༡༠ ཚེས་ ༡༣ རེས་གཟའ་ལྷག་པ།
༄༅། །བལ་ཡུལ་དུ་གནས་སྡོད་བཙན་བྱོལ་བོད་མི་རྣམས་ལ་མང་གཙོའི་ལམ་ནས་འོས་བསྡུ་བྱ་རྒྱུའི་ཐོབ་ཐང་སྤྲོད་དགོས་པའི་འབོད་སྐུལ་གྱི་ཞུ་ཡིག་ཅིག་བོད་མི་མང་སྤྱི་འཐུས་ལྷན་ཚོགས་ནས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཉེས་ཡངས་ཚོགས་པར་ཕུལ་འདུག དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་གི་མཚན་ཐོག་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་བྷན་ཀི་མུན་མཆོག་དང་།  འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་སྐུ་ཞབས་ནཱ་ཝན་ཐེམ་པིལ་ལ་ཡ་མཆོག  དེ་བཞིན་དབྱིན་ཡུལ་གྱི་རྒྱལ་ས་ལོན་ཌོན་ནང་རྟེན་གཞི་བྱས་པའི་རྒྱལ་སྤྱིའི་ཉེས་ཡངས་ཚོགས་པའི་ཚོགས་གཙོ་བཅས་ལ་ཕུལ་བའི་འབོད་སྐུལ་གྱི་ཞུ་སྙན་དེའི་ནང་འཁོད་དོན།
ངས་གུས་བཀུར་ཐོག་སྐུ་ཉིད་ལ་སྙན་སེང་ཞུ་རྒྱུར། ཕྱི་ལོ་ ༢༠༡༠ ཟླ་ ༩ ཚེས་ ༢ ཉིན་བཙན་བྱོལ་ནང་བོད་མིའི་མང་གཙོ་དབུ་བརྙེས་ཏེ་མི་ལོ་ ༥༠ འཁོར་བའི་ཉིན་མོ་ཞིག་ཡིན། ཕྱི་ཟླ་ ༡༠ ཚེས་ ༣ ཉིན་བཙན་བྱོལ་དུ་གནས་སྡོད་བོད་མི་རྣམས་ཀྱིས་སྤྱི་འཐུས་སྐབས་ ༡༥ དང་བཀའ་ཁྲིའི་སྔོན་འགྲོའི་འོས་ཤོག་འཕེན་ཡོད།
འོས་བསྡུའི་ལམ་ནས་བསྐོ་གཞག་བྱུང་བའི་བཙན་བྱོལ་བོད་མི་མང་སྤྱི་འཐུས་ལྷན་ཚོགས་སྐབས་དང་པོའི་ཚོགས་མི་རྣམས་ནས་ཕྱི་ལོ་ ༡༩༦༠ ཕྱི་ཟླ་ ༩ ཚེས་ ༢ ཉིན་སྤྱི་འཐུས་ཀྱི་འགན་ཁུར་དམ་བཅའ་ཕུལ་ཡོད། འདས་པའི་ལོ་ ༥༠ རིང་འོས་བསྡུའི་ཉིན་བོད་མི་རྣམས་ཀྱིས་སྤྱི་ཚོགས་བརྟན་ལྷིང་ཐོར་གཞིའི་ཁྲིམས་འགལ་གྱི་བྱ་སྤྱོད་གང་ཡང་སྤེལ་མེད་པ་མ་ཟད། བོད་མི་བཙན་བྱོལ་བའི་གནས་ཡུལ་རྒྱལ་ཁབ་སོ་སོས་ང་ཚོའི་སྤྱི་འཐུས་དང་བཀའ་ཁྲི་འོས་འདེམས་བྱེད་རྒྱུར་ནམ་ཡང་དམ་བསྒྲགས་གནང་མྱོང་མེད་པ་དེ་བཀའ་དྲིན་སྙིང་བཅངས་ཞུ་གནས་ཞིག་ཡིན།
ཕྱི་ཟླ་ ༡༠ ཚེས་ ༣ ཉིན་བལ་ཡུལ་ཉེན་རྟོག་མི་སྣས་ས་གནས་ལས་ཁུངས་ཀྱིས་བོད་མི་ཚོར་འོས་ཤོག་འཕེན་རྒྱུའི་ཆོག་མཆན་གནང་མིན་ལ་མ་ལྟོས་པར་བལ་ཡུལ་མཆོད་རྟེན་དང་འཕགས་ཤིང་ཁུལ་གྱི་འོས་སྒམ་བཙན་འཕྲོག་བྱས་པའི་བྱ་སྤྱོད་བྱུང་བ་དེ་ཧང་སངས་དགོས་པ་ཞིག་དང་མང་གཙོའི་ལམ་དང་འགལ་བའི་བྱ་སྤྱོད་དེར་སྐྱོན་བརྗོད་ཤུགས་ཆེ་བྱ་རྒྱུ་ཡིན། ས་གནས་གཉིས་པོ་བལ་ཡུལ་རྒྱལ་སའི་ཁྱབ་ཁོངས་སུ་ཡོད།
བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱིས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་དང་འབྲེལ་ཡོད་ལས་བྱེད་བརྒྱུད་བལ་ཡུལ་ཉེན་རྟོག་ལས་ཁུངས་ནས་འོས་སྒམ་ཕྱིར་སློག་ཡོང་རྒྱུ་དང་། བལ་ཡུལ་དུ་གནས་སྡོད་ཡུལ་གྱར་བཙན་བྱོལ་བོད་མི་རྣམས་མང་གཙོའི་ལམ་ནས་རང་གི་སྐུ་ཚབ་དང་བཀའ་ཁྲི་འོས་འདེམས་མུ་མཐུད་བྱེད་ཐུབ་པར་རོགས་རམ་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་བཀོད་ཡོད།