༢༠༡༠ ཟླ་ ༡༠ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༩ ཉིན་ཨ་རིའི་གྲོང་ཁྱེར་ནིའུ་ཡོཀ་ཏུ་རྒྱལ་སྤྱིའི་བུད་མེད་གསར་འགོད་ལྷན་ཚོགས་ (International Women’s Media Foundation) ཀྱིས་བོད་ཀྱི་བུད་མེད་རྩོམ་འབྲི་བ་ཚེ་རིང་འོད་ཟེར་ལགས་སུ་གསར་འགོད་དཔའ་ མཛངས་ཀྱི་གཟེངས་རྟགས་གནང་ཡོད། གཞན་ཡང་སྐབས་དེར་ཀོ་ལོམ་བྷི་ཡའི་བུད་མེད་ (Claudia Julieta Duque)  དང།  མེག་སི་ཀོ་ནས་ (Alma Guillermoprieto)  ཨ་ཕི་རི་ཀའི་ཏན་ཛ་ནི་ཡཱ་ནས་(Vicky Ntetema)  བཅས་བུད་མེད་གསུམ་ལའང་གཟེངས་རྟགས་འདི་ཐོབ་ཡོད།
རྩོམ་པ་པོ་ཚེ་རིང་འོད་ཟེར་ལགས་ཀྱི་ཕྱིར་བསྐྱོད་ལག་འཁྱེར་རྒྱ་ནག་གཞུང་གིས་ཕྲོགས་པར་བརྟེན་གཟེངས་རྟགས་ལེན་ཆེད་དངོས་སུ་ཕེབས་ཐུབ་མེད། འོན་ཀྱང་ཁོང་ནས་བརྙན་འཕྲིན་བརྒྱུད་གཟེངས་རྟགས་ངོས་ལེན་གྱི་འགྲེལ་བརྗོད་གནང་དོན། ངས་བོད་ནང་ཞི་རྒོལ་བྱུང་བའི་དངོས་ཡོད་བདེན་པའི་གནས་ཚུལ་རྣམས་འཛམ་གླིང་མི་མང་ཚོས་ཤེས་ཆེད་མི་མངོན་པའི་བོད་ཅེས་པའི་དྲྭ་རྒྱའི་ནང་བཀོད་ཡོད། བོད་ནང་ད་ལྟའང་དྲང་བདེན་མིན་པའི་ཁྲིམས་ལུགས་ལག་བསྟར་བྱེད་བཞིན་ཡོད། བོད་མི་གྲགས་ཅན་དང་མི་མང་དཀྱུས་མ་སོགས་འཛིན་བཟུང་འོག་བསམ་ཡུལ་ལས་འདས་པའི་དཀའ་སྡུག་མྱོང་བཞིན་ཡོད། ངོས་ནས་སྒེར་གྱི་གསར་འགྱུར་བརྒྱུད་ལམ་ཐོག་མུ་མཐུད་ནས་ལས་འགུལ་སྤེལ་རྒྱུ་ཡིན། བརྒྱུད་ལམ་དེ་ནི་དབང་ཆ་མེད་མཁན་ཚོའི་ལག་ཆ་ཞིག་ཆགས་ཡོད་ཅེས་སོགས་བཀོད་ཡོད།