༢༠༡༠ ཟླ་ ༡༠ ཚེས་ ༢༦ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༤ ཉིན་པོ་ལན་ཌེ་རྒྱལ་ས་ཝར་སོའི་མངའ་ཁོངས་ཝོ་ལ་རྫོང་ (Wola District) གི་གཞུང་འབྲེལ་གྱི་རྒྱལ་ལམ་ཞིག་ལ་བོད་ཀྱི་ལམ་མདོ་ཞེས་པའི་མིང་འདོགས་ཀྱི་དབུ་འབྱེད་མཛད་སྒོ་ཞིག་ཚོགས་ཡོད།  མཛད་སྒོ་དེར་ཝར་སོའི་གྲོང་ཁྱེར་སྤྱི་ཁྱབ་ལྕམ་སྐུ་ཧ་ན་ (Mrs.Hanna Gronkiewicz-walt) མཆོག་དང། སྤྱི་ཁྱབ་གཞོན་པ་སྐུ་ཞབས་ (Mr.Wlodziemierz Paszynski) མཆོག བོད་དོན་རྒྱབ་སྐྱོར་བ། བོད་རིགས་ཁག་གཅིག གཞན་ཡང་སྐུ་མགྲོན་བཅས་མཉམ་ཞུགས་གནང་ཡོད། དབུ་འབྱེད་ཀྱི་མཛད་སྒོ་དེ་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལང་དང་། ཕྱི་ལོ་ ༢༠༠༩ ལོར་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་རྒྱལ་ས་ཝར་སོའི་ཆེ་བསྟོད་མི་སེར་གྱི་ཕྱག་འཁྱེར་འབུལ་ལམ་ཞུས་པའི་དུས་དྲན་སྲུང་བརྩི་དང་སྟབས་བསྟུན་ནས་གོ་སྒྲིག་ཞུས་པ་ཞིག་ཡིན་འདུག དབུ་འབྱེད་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་གསུང་འཕྲིན་སྒྲོགས་སྦྱང་གནང་བའི་ནང་འཁོད་དོན།

ངོས་ཀྱིས་བོད་ཀྱི་ལམ་མདོ་ཞེས་དེ་བཞིན་གསར་འཛུགས་གནང་བ་དེ་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་མིར་མིང་དོན་མཚུངས་པའི་རང་སྐྱོང་ཐོབ་ཆེད་བོད་མི་ཚོས་འཚེ་མེད་ཞི་བ་དང་དྲང་བདེན་གྱི་ལམ་ནས་འཐབ་རྩོད་བྱས་པ་དེར་རྒྱབ་སྐྱོར་གནང་བར་ངོས་འཛིན་ཞུ་བཞིན་ཡོད།  ངོས་ཀྱིས་ཝར་སོ་གཞུང་དང་མི་མང་གིས་བོད་མི་ཚོར་སླར་ཡང་གདུང་སེམས་མཉམ་སྐྱེ་དང་རྒྱབ་སྐྱོར་གནང་བར་བསྔགས་བརྗོད་ཞུ་བཞིན་ཡོད་ཅེས་སོགས་འཁོད་ཡོད། དེ་ཡང་མཛད་སྒོའི་ཐོག་གྲོང་ཁྱེར་གྱི་སྤྱི་ཁྱབ་ཧ་ན་ལགས་ཀྱིས་གསུང་བཤད་གནང་དོན། ལམ་མདོ་འདི་ནི་ཞི་བདེར་དགའ་བའི་བོད་མི་རྣམས་ཀྱིས་རང་གི་ངོ་བོ་སྲུང་སྐྱོབ་བྱ་རྒྱུའི་འཐབ་རྩོད་ལ་ང་ཚོའི་གུས་བཀུར་མཚོན་ཆེད་དུ་གསར་འཛུགས་བྱས་པ་ཞིག་ཡིན། རྒྱལ་ས་ཝར་སོ་ནི་རང་དབང་དང་སྙིང་སྟོབས་ཀྱི་གྲོང་ཁྱེར་ཞིག་ཡིན། བོད་མི་རྣམས་ཀྱིས་རང་གི་ངོ་བོ་སྲུང་སྐྱོབ་ཐུབ་པ་མ་ཟད། རང་དབང་ཐོག་རང་གི་ལེགས་བྱང་རྒྱུན་འཛིན་ཐུབ་པའི་ཡིད་ཆེས་བརྟན་པོ་ཡོད། ཅེས་སོགས་ཀྱི་གསུང་བཤད་གནང།  མཛད་སྒོའི་མཇུག་བསྡོམས་ཐོག་པོ་ལན་ཌེའི་བོད་རིགས་མཐུན་ཚོགས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་ཡོད་པ་བཅས།།