༢༠༡༠ ཟླ་ ༡༠ ཚེས་ ༦ རེས་གཟའ་ལྷག་པ།

༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༩ ནས་ཉིན་གསུམ་རིང་པོ་ལན་ཌེ་གྲོང་ཁྱེར་ཇི་ཌན་སིཀ (Gdanks) ནང་ཆིག་སྒྲིལ་ལས་འགུལ་ཚོགས་པ་བཙུགས་ཏེ་ད་བར་ལོ་ ༣༠ འཁོར་བའི་དུས་དྲན་མཛད་སྒོ་ཞིག་གྲོང་ཁྱེར་དེའི་ནང་རྟེན་གཞི་བྱས་པའི་ལེག་ཝ་ལེ་ས་ (Lech Walesa Institute Foundation) ཞེས་པའི་ཚོགས་པ་དེའི་ཚོགས་ཁང་དུ་སྲུང་བརྩི་གཟབ་རྒྱས་ཞུས་ཡོད། སྐབས་དེར་དབྱིན་ཡུལ་རྒྱལ་ས་ལོན་ཌོན་དུ་རྟེན་གཞི་བྱས་པའི་༸གོང་ས་མཆོག་གི་སྐུ་ཚབ་སྐུ་ཞབས་ཐུབ་བསྟན་བསམ་གྲུབ་ལགས་མཛད་སྒོའི་སྐུ་མགྲོན་དུ་མགྲོན་འབོད་ཞུས་པ་ལྟར་ཕེབས་འདུག ཕྱི་ཚེས་ ༢༩ ཉིན་གྱི་དགོང་དྲོའི་གསོལ་ཚིགས་སྐབས་དང་ཕྱི་ཚེས་ ༣༠ ཉིན་ཆིག་སྒྲིལ་ལས་འགུལ་ཚོགས་པ་བཙུགས་ཏེ་མི་ལོ་ ༣༠ འཁོར་བའི་དུས་དྲན་གྱི་མཛད་སྒོ་དངོས་གཞིའི་སྐབས་སོ་སོར་པོ་ལན་ཌེ་སྲིད་འཛིན་ཟུར་པ་སྐུ་ཞབས་( Lech Walesa) མཆོག་དང་ཇི་ཌན་སིཀ་གྲོང་ཁྱེར་སྤྱི་ཁྱབ་པ་སྐུ་ཞབས་པ་ཝེལ་ཨ་ཌཱ་མོ་ཝིཆ་ (Mr Pawel Adamowicz) མཆོག དེ་བཞིན་ཉེ་ལམ་བསྐོ་གཞག་བྱུང་བའི་པོ་ལན་ཌེ་སྲིད་འཛིན་སྐུ་ཞབས་བྷོར་ནི་སི་ལཱ་ཀ་མོ་རོ་སོ་ཀི་ (Bronislaw Komorowski) མཆོག་བཅས་དང་གཞན་ཡང་འཛམ་གླིང་གང་ས་ནས་སྐུ་མགྲོན་ཆེད་ཕེབས་གནང་འདུག ཕྱི་ཚེས་ ༣༠ ཉིན་མཛད་སྒོ་དངོས་གཞིའི་སྐབས་སྐུ་ཞབས་ཐུབ་བསྟན་བསམ་གྲུབ་ལགས་ནས་ལེག་ཝ་ལེ་སའི་ལོ་འཁོར་གཟེངས་རྟགས་ཐེངས་གསུམ་པ་ཐོབ་མཁན་པོ་ལན་ཌེ་ཉམ་ཐག་རོགས་སྐྱོབ་ཚོགས་པའི་ (Polish Humanitarian Action) ཚོགས་གཙོ་ལྕམ་ཇ་ནི་ནཱ་ཨོ་ཆོ་ཀར་ (Janina Ochojska) མཆོག་ལ་འཚམས་འདྲིའི་གསུང་བཤད་གནང་ཡོད། ཕྱི་ཚེས་ ༢༩ ཉིན་སྐུ་ཞབས་ཐུབ་བསྟན་བསམ་གྲུབ་ལགས་ནས་གཞོན་ནུའི་ལྷན་ཚོགས་ (Forum of the Young) ཀྱི་ཚོགས་འདུར་ཆེད་ཕེབས་གནང་སྟེ་གཞོན་ནུ་ཚོར་ཆིག་སྒྲིལ་ལས་འགུལ་ཚོགས་པར་གལ་གནད་ཆེ་བའི་འཚེ་མེད་ཞི་བའི་འཐབ་རྩོད་ཀྱི་ལང་ཕྱོགས་དེའི་གཞི་རྩའི་གོ་དོན་ཇི་ཡིན་དང། པོ་ལན་ཌེའི་རང་དབང་འཐབ་རྩོད་ཐོག་འཚེ་མེད་ཞི་བའི་ལས་འགུལ་དེ་ཇི་ཙམ་གལ་གནད་ཆེན་པོ་ཆགས་ཡོད་མེད་སྐོར་དང། ད་ཆ་འཚེ་བའི་དུས་སྐབས་འདིར་བོད་མི་ཚོས་རང་གི་ངོ་བོ་མཚོན་པའི་ཆོས་དང་རིག་གཞུང་སྲུང་སྐྱོབ་སླད་འཚེ་མེད་ཞི་བའི་འཐབ་རྩོད་དེ་འབུར་འཐོན་ཞིག་ཡིན་སྐོར་འགྲེལ་བརྗོད་གནང་ཡོད་པ་མ་ཟད། སྐབས་དེར་ཚོགས་བཅར་བ་རྣམས་ཀྱིས་མ་འོངས་བོད་མི་ཚོའི་དབུ་ཁྲིད་སྐོར་དང་བོད་རྒྱ་མི་རིགས་གཉིས་དབར་མཐུན་ལམ་གོང་འཕེལ་ཇི་འདྲ་གཏོང་དགོས་མིན་སོགས་ཀྱི་གནད་དོན་སྐོར་དྲི་བ་གནང་བར་སྐུ་ཚབ་ཐུབ་བསྟན་བསམ་གྲུབ་ལགས་ནས་ལན་འདེབས་གནང་འདུག ཕྱི་ཚེས་ ༡ ཉིན་སི་བིཀ་ཨེ་ཁ་ཌེ་མིག་ (CIVIC ACADEMY) ཞེས་པའི་ཚོགས་འདུར་ལྷན་ཞུགས་གནང་མཁན་རྣམས་དང་ལྷན་དགོང་དྲོའི་གསོལ་ཚིགས་ཤིག་སྐབས་སྐུ་ཚབ་ཐུབ་བསྟན་བསམ་གྲུབ་ལགས་ནས་ཡུ་རོབ་ཕྱོགས་མཐའ་ཁག་ནས་ཕེབས་པའི་གཞོན་ནུ་ཚོགས་པའི་འགོ་ཁྲིད་ཚོས་བོད་དོན་དང་འབྲེལ་བའི་གནད་དོན་ཐོག་དྲི་བ་བཏོན་པར་སྐུ་ཚབ་དོན་གཅོད་ནས་ལན་འདེབས་གནང་བ་མ་ཟད། བོད་ཀྱི་གནད་དོན་སྐོར་གསལ་བཤད་གནང་འདུག དེ་ཡང་སྐུ་ཚབ་དོན་གཅོད་ནས་ཉིན་གསུམ་གྱི་མཛད་སྒོོར་མཉམ་ཞུགས་གནང་བའི་ཚོར་སྣང་ཇི་བྱུང་སྐོར་འགྲེལ་བརྗོད་གནང་དོན། པོ་ལན་ཌེ་ཆིག་སྒྲིལ་ལས་འགུལ་ཚོགས་པ་བཙུགས་ཏེ་མི་ལོ་ ༣༠ འཁོར་བའི་དུས་དྲན་གྱི་མཛད་སྒོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་ཚུལ་དུ་བཅར་ཐུབ་པར་ང་རང་ལ་ཆེ་མཐོང་ཐོབ་པ་ཞིག་བྱུང། ཚོགས་འདུར་ཆེད་ཕེབས་གནང་མཁན་དེ་སྔ་ནོ་བེལ་གཟེངས་རྟགས་བཞེས་མྱོང་མཁན་དང་པོ་ལན་ཌེའི་སྲིད་འཛིན་ཟུར་པ་སྐུ་ཞབས་ལེག་ཝ་ལེ་སའི་མཚོན་ཆིག་སྒྲིལ་ལས་འགུལ་ཚོགས་པའི་མི་སྣ་ཁག་གཅིག་དང་མཇལ་རྒྱུའི་གོ་སྐབས་ཐོབ་པ་དེ་ང་རང་དགའ་ཚོར་ཆེན་པོ་བྱུང། ངས་གཞོན་ནུའི་ཚོགས་འདུའི་ནང་གཏམ་བཤད་བྱེད་སྐབས་ཁོང་ཚོར་རང་གི་ཕ་མེས་ཀྱི་ལག་རྗེས་རྒྱུན་འཛིན་ཐོག་འཛམ་གླིང་ཕྱི་ལ་སྤེལ་ཐབས་དགོས་པའི་འབོད་སྐུལ་བྱས་ཡོད།།