༢༠༡༠ ཟླ་ ༡༠ ཚེས་ ༢༥ རེས་གཟའ་ཟླ་བ།
དཔར་ལེན་རྫོང་དཀར་བསོད་ནམས།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༣ རེས་གཟའ་སྤེན་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་གྲོང་ཁྱེར་ཊོ་རོན་ཊོ་ས་གནས་བོད་རིགས་ཚོགས་པའི་ཚོགས་ཁང་གངས་ལྗོངས་ཆོས་ལྡན་གླིང་དབུ་འབྱེད་མཛད་སྒོའི་ཐོག་བཀའ་སློབ་སྩལ་དོན། དཀའ་ངལ་གྱིས་དུས་སྐབས་སུ་རོགས་རམ་དེ་རྩ་ཆེན་པོ་རེད། དེར་བརྟེན་ངོས་ཀྱིས་ཁེ་ཎ་ཌའི་དབུས་དང་ས་གནས་སྲིད་གཞུང་ནས་བོད་མི་ཚོར་དུས་ཡུན་རིང་པོར་རོགས་རམ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་ང་ཚོས་བཀའ་དྲིན་ནམ་ཡང་བརྗེས་ཐབས་མེད།
སཔར་ལེན་རྫོགས་སངས།
ང་ཚོར་རྒྱབ་སྐྱོར་གནང་མཁན་ཚོས་བོད་པར་རྒྱབ་སྐྱོར་གནང་བ་ཞིག་མིན་པར་དྲང་བདེན་ལ་རྒྱབ་སྐྱོར་གནང་བ་ཞིག་རེད་ཅེས་བཀའ་སློབ་སྩལ་བ་མ་ཟད་མགོན་པོ་གང་ཉིད་མཆོག་གིས་མུ་མཐུད་བཀའ་སློབ་སྩལ་དོན། བོད་ནང་བོད་པའི་རིག་གཞུང་འཇིག་ཉེན་གྱི་གནས་སྟངས་ཤིག་ཆགས་ཡོད། གཞིས་ལུས་རྒྱ་ཆེའི་མི་མང་གི་སྙིང་སྟོབས་ཧ་ལས་པ་ཡོད་ཀྱང་རང་དབང་མེད་ཚེ་རིག་གཞུང་གཅེས་འཛིན་བྱེད་རྒྱུར་དཀའ་ལས་ཁག་པོ་རེད། 
གངས་ལྗོངས་ཆོས་ལྡན་གླིང་གི་ཚོགས་པ་འདི་བརྒྱུད་ཆོས་ལུགས་མཐུན་སྒྲིལ་དང་འགྲོ་བ་མིའི་རིན་ཐང་གོང་མཐོར་གཏོང་རྒྱུར་ཞབས་འདེགས་སྒྲུབ་ཐུབ་པ་ཞིག་བྱུང་ན་ཡག་པོ་རེད་ཅེས་སོགས་ཀྱི་བཀའ་སློབ་སྩལ་བ་མ་ཟད། ཊོ་རོན་ཊོའི་གྲོང་ཁྱེར་སྤྱི་ཁྱབ་པས་མགོན་པོ་གང་ཉིད་མཆོག་ལ་གྲོང་ཁྱེར་དེའི་ལྡེ་མིག་༸གོང་ས་མཆོག་ལ་འབུལ་ལམ་ཞུས་པར་མགོན་པོ་གང་ཉིད་མཆོག་གིས་ཐུགས་རྗེ་ཆེ་ཞུས་གནང་མཛད། ཉིན་གུང་ལྗགས་སྨིན་གྲུབ་མཚམས་༸གོང་ས་མཆོག་ལ་ཊོ་རོན་ཊོ་སི་ཊར་ (Toronto Star) ཞེས་པའི་གསར་འགྱུར་ཚན་པའི་ཕྱི་ལོ ༢༠༡༠ ཟླ་ ༡༠ ཚེས་ ༢༤ ཉིན་གྱི་གསར་ཤོག་དུས་དེབ་ཀྱི་རྩོམ་སྒྲིག་པའི་གླེང་སྟེགས་ནང་སྐུ་མགྲོན་གྱི་ཚུལ་དུ་མགྲོན་འབོད་ལྟར་ཞལ་བཞེས་མཛད།
དཔར་ལེན་རྫོགས་སངས།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཊོ་རོན་ཊོའི་ནང་རྟེན་གཞི་བྱས་པའི་ཆོས་ལུགས་འདྲ་མིན་གྱི་མི་སྣ་ཁག་དང་མཇལ་འཕྲད་མཛད་གྲུབ་བསྟུན། མགོན་པོ་གང་ཉིད་མཆོག་གིས་ཁར་ཎ་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གཅིག་ལ་མཇལ་ཁ་སྩལ་ཏེ་བོད་ཀྱི་གནད་དོན་དང་དེ་སེལ་ཆེད་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་ཐབས་ལམ་ཇི་ཡོད་སོགས་ཀྱི་སྐོར་བགྲོ་གླེང་གྲུབ་མཚམས། ༸གོང་ས་མཆོག་གིས་ས་གནས་བོད་རིགས་རྣམས་ལ་མཇལ་ཁ་དང་བཀའ་སློབ་སྩལ་དོན།
འཛམ་གླིང་ནང་མི་ཚོས་བོད་པར་དགའ་མོས་བྱེད་རྒྱུའི་བོད་པའི་ཡ་རབས་བཟང་སྤྱོད་དེ་མ་ཉམས་པ་བྱེད་དགོས། ང་ཚོས་ནང་པ་སངས་རྒྱས་ཀྱི་ཆོས་ཀྱི་གནས་ལུགས་ཤེས་པའི་ཐོག་ནས་དུས་རབས་ ༢༡ པའི་ནང་པ་ཞིག་བྱེད་དགོས། བླ་མ་ཚོས་ལྷག་བསམ་རྣམ་དག་ཐོག་ནས་ནང་ཆོས་སློབ་ཁྲིད་བྱེད་དགོས་པ་ལས་རྟོགས་པ་མེད་ཀྱང་ཡོད་ཁུལ་བྱས་ན་ཡག་པོ་མ་རེད་ཅེས་སོགས་ཀྱི་བཀའ་སློབ་སྩལ་གྲུབ་མཚམས། ༸གོང་ས་མཆོག་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས་ཏེ་རྒྱ་སྐད་ཀྱི་བརྙན་འཕྲིན་ (Fair Child TV) ཞེས་པའི་གྱི་གསར་འགོད་པས་ཆེད་དོན་དྲི་བར་བཀའ་ལན་སྩལ། དེ་རྗེས་མགོན་པོ་གང་ཉིད་མཆོག་གིས་རྒྱ་བོད་མི་རིགས་གཉིས་ཀྱིས་བྱམས་བརྩེ་དང་བརྩི་བཀུར། ཞེས་པའི་བརྗོད་གཞིའི་ཐོག་བགྲོ་གླེང་གནང་རྒྱུའི་ཚོགས་མགོན་དུ་༸ཞབས་སོར་འཁོད་དེ་བཀའ་སློབ་ཀྱང་སྩལ།
