༢༠༡༠ ཟླ་ ༡༠ ཚེས་ ༢༢ རེས་གཟའ་པ་སངས།
༸གོང་ས་༸སྐྱབས་མགོན་ཆེན་པོ་མཆོག་ལ་མ་ཡ་མི་གཙུག་ལག་སློབ་གྲྭའི་ཁྲིམས་ལུགས་སྨྲ་བའི་ཆེ་བསྟོད་ཀྱི་ཕྱག་འཁྱེར་འབུལ་ལམ་ཞུས་བཞིན་པ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༡ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རི་མ་ཡ་མི་མངའ་སྡེ་ཕོ་ལོ་རི་ཌའི་གྲོང་ཁྱེར་མ་ཡ་མིའི་ནང་རྟེན་གཞི་བྱས་པའི་མ་ཡ་མི་གཙུག་ལག་སློབ་གྲྭའི་ཆེ་བསྟོད་ཀྱི་ཕྱག་འཁྱེར་འབུལ་ལམ་ཞུས་ཡོད། དེ་ཡང་ཉིན་དེའི་སྔ་དྲོ་གཙུག་ལག་སློབ་ཁང་གི་ཚོགས་ཁང་ནང་དགེ་ལས་སློབ་ཕྲུག་གྲངས་ ༥༠༠ ཙམ་འདུ་འཛོམས་ཐོག་༸གོང་ས་མཆོག་ལ་ (Doctor of law) ཞེས་པའི་ཕྱག་འཁྱེར་འབུལ་ལམ་ཞུ་ཆེད་དམིགས་བསལ་མཛད་སྒོ་ཞིག་གོ་སྒྲིག་ཞུས་ཡོད། མཛད་སྒོ་དབུ་འཛུགས་ཀྱིས་ཐོག་མར་གཙུག་ལག་སློབ་གྲྭའི་གཙོ་འཛིན་སྐུ་ཞབས་ཌེ་ཝིཌ་སི་ཧོཌ་གེ་ (David C.Hodge) མཆོག་གིས་ངོས་སྤྲོད་གསུང་བཤད་གནང་དོན། ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་མི་ཡ་མི་གཙུག་ལག་སློབ་གྲྭར་གདན་ཞུས་ཐོག་ཁོང་གིས་མི་རིགས་འདྲ་མིན་གྱི་ལེགས་བྱང་ཕན་ཚུན་དབར་བསམ་ཤེས་གོང་མཐོར་གཏོང་རྒྱུར་ཐུགས་བརྩོན་གྱི་མཛད་རྗེས་ཆེན་པོ་འཇོག་གནང་མཛད་ཡོད་པ་རྣམས་ལ་ངོས་འཛིན་གྱིས་རྒྱབ་སྐྱོར་ཞུ་ཐུབ་པ་དེར་ང་ཚོར་ཆེ་མཐོང་ཐོབ་བྱུང་ཞེས་གསུངས།
ཕྱོགས་མཚུངས་སྐབས་དེར་གཙོ་འཛིན་མཆོག་གིས་གཙུག་ལག་སློབ་གྲྭ་དང་རྡ་སར་རྟེན་གཞི་བྱས་པའི་རིགས་ལམ་སློབ་གྲྭའི་དབར་ཤེས་ཡོན་བརྗེས་ལེན་ཐོག་མཉམ་ལས་ཀྱི་ལས་གཞི་ལག་བསྟར་བྱེད་མུས་ཡིན་སྐོར་སྙན་སྒྲོན་ཞུས་པ་དང་། མི་ཡ་མི་གཙུག་ལག་སློབ་གྲྭའི་སློབ་གཉེར་བྱ་རྒྱུའི་སློབ་ཚན་ཁག་ཀྱང་ངོ་སྤྲོད་ཞུས་གྲུབ་བསྟུན། ༸གོང་ས་༸སྐྱབས་མགོན་ཆེན་པོ་མཆོག་ལ་མ་ཡ་མི་གཙུག་ལག་སློབ་གྲྭའི་ཁྲིམས་ལུགས་སྨྲ་བའི་ཆེ་བསྟོད་ཀྱི་ཕྱག་འཁྱེར་ (Doctor of Law) འབུལ་ལམ་ཞུས་པ་དང་སྦྲགས་གསུང་བཤད་གནང་དོན། སྐུ་ཉིད་ཀྱིས་འཚེ་མེད་ཞི་བའི་ལམ་ནས་མུ་མཐུད་བོད་མི་ཚོའི་རིག་གཞུང་སྲུང་སྐྱོབ་བྱ་རྒྱུའི་ཐོབ་ཐང་ཆེད་ཐུགས་བརྩོན་མཛད་པ་དང། འཛམ་གླིང་མི་མང་ཚོར་གཞི་རྩའི་ནང་ཆོས་ཀྱི་ལྟ་གྲུབ་གསལ་བཤད་མཛད་པ། མི་སོ་སོར་སྤྱི་ཚོགས་ཀྱི་འགན་ཇི་འདྲ་ཞིག་ཡོད་མེད་ཐོག་བསམ་ཤེས་ཀྱི་གོ་རྟོགས་སྤེལ་གནང་མཛད་ཡོད་ཅིང་། སྐུ་ཉིད་ལ་ནོ་བེལ་ཞི་བདེའི་གཟེངས་རྟགས་དང་ཨ་རིའི་གྲོས་ཚོགས་གསེར་གྱི་རྟགས་མ། གཞན་ཡང་འཛམ་གླིང་ནང་གི་གཟེངས་རྟགས་གྲངས་ལས་འདས་པ་ཐོབ་པ་བཅས་ལ་ཆེ་མཐོང་ཞུ་ཆེད་དང། དེ་བཞིན་མ་ཡ་མིའི་གཙུག་ལག་སློབ་གྲྭའི་དགེ་ལས་སློབ་ཕྲུག་རྣམས་ལ་རིགས་ལམ་སློབ་གྲྭ་དང་འབྲེལ་བ་བྱུང་བ་བརྒྱུད་གོ་སྐབས་ཐོབ་པར་བསྔགས་བརྗོད་ཞུས་པའི་ཐོག་ངས་མི་ཡ་མི་གཙུག་ལག་སློབ་གྲྭའི་དགེ་ལས་སློབ་ཕྲུག་ཡོངས་ཀྱི་ཚབ་ཞུས་ཏེ་ཕྱི་ལོ་ ༢༠༡༠ ཟླ་ ༡༠ ཚེས་ ༢༡ མི་ཡ་མིའི་གཙུག་ལག་སློབ་གྲྭའི་ཁྲིམས་ལུགས་སྨྲ་བའི་ཆེ་བསྟོད་ཀྱི་ཕྱག་འཁྱེར་འདི་སྐུ་ཉིད་མཆོག་ལ་འབུལ་ལམ་ཞུ་རྒྱུ་ཡིན་ཞེས་གསུངས་པ་དང་ཆབས་ཅིག་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱག་འཁྱེར་འབུལ་ལམ་ཞུས་ཡོད། དེ་རྗེས་རྒྱལ་སྤྱིའི་དབུ་ཁྲིད་ཀྱི་གཟེངས་རྟགས་དེ་བཞིན་མགོན་པོ་གང་ཉིད་མཆོག་ལ་འབུལ་ལམ་ཞུ་ཆེད་སྐུ་ཞབས་ཧེར་རི་ཝིག་སི་མཆོག་གིས་ཚོགས་བཅར་བ་རྣམས་ལ་གཟེངས་རྟགས་དེ་བཞིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འབུལ་ལམ་ཞུ་རྒྱུའི་གསལ་བསྒྲགས་གནང་དོན། བྱུང་རབ་ཁྲོད་འགྲོ་བ་མིའི་སྤྱི་ཚོགས་ནང་བྱམས་བརྩེ་དང་ཞི་བདེ། བསམ་ཤེས་ཡོང་རྒྱུར་འབད་བརྩོན་གནང་མཁན་མི་ཉུང་ཤས་ཤིག་བྱུང་ཡོད། ང་ཚོའི་མི་ཚེའི་ནང་འཚེ་བ་མེད་པའི་ལམ་ནས་རང་གི་མངོན་འདོད་གྲུབ་རྒྱུར་འབད་བརྩོན་གནང་མཁན་མེས་པོ་དམ་པ་གྷན་རྡི་མཆོག་དང་མཱ་ཏཱན་ལུ་ཐར་ཀིང། ནེལ་སོན་མན་ཌེ་ལ་བཅས་ཀྱི་སྐོར་གོ་ཐོས་བྱུང་ཡོད། དེ་རིང་ང་ཚོས་མི་རིགས་དང་ཆོས་ལུགས། ལེགས་བྱང་འདྲ་མིན་དབར་ཕན་ཚུན་ཞི་བདེ་དང་བྱམས་བརྩེ། བསམ་ཤེས་གོང་མཐོར་གཏོང་རྒྱུར་ཐུགས་བརྩོན་མཛད་མཁན་གྱི་སྐྱེས་བུ་ཞིག་ལ་ཆེ་མཐོང་ཞུ་ཆེད་ངས་གཙུག་ལག་སློབ་གྲྭའི་དགེ་ལས་སློབ་ཕྲུག་ཡོངས་ཀྱི་ཚབ་ཞུས་ཏེ་རྒྱལ་སྤྱིའི་དབུ་ཁྲིད་ཀྱི་གཟེངས་རྟགས་འདི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འབུལ་ལམ་ཞུ་རྒྱུ་ཡིན། ཞེས་གསུངས་པ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་དབུ་ཁྲིད་ཀྱིས་གཟེངས་རྟགས་དེ་འབུལ་ལམ་ཞུས་ཡོད། དེ་རྗེས་མགོན་པོ་གང་ཉིད་མཆོག་གིས་གཟེངས་རྟགས་འབུལ་བཞེས་དང་སྦྲགས་བཀའ་སློབ་སྩལ་དོན། ངོས་ལ་ཆེ་བསྟོད་ཀྱི་གཟེངས་རྟགས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། འོན་ཀྱང་ངོས་ལ་ཁྲིམས་ལུགས་མཁས་དབང་གི་ཤེས་ཚད་གང་ཡང་མེད་ཅེས་ཞལ་ཤོབ་མཛད། ཕྱོགས་མཚུངས་མགོན་པོ་གང་ཉིད་མཆོག་གིས་མ་ཡ་མི་གཙུག་ལག་སློབ་གྲྭ་དང་རྡ་ས་རིགས་ལམ་སློབ་གྲྭའི་དབར་ཤེས་ཡོན་གྱི་འབྲེལ་ལམ་བཙུགས་ཐུབ་པ་དེར་བསྔགས་བརྗོད་མཛད་པ་མ་ཟད། མ་ཡ་མི་གདོད་མའི་མི་རིགས་ཀྱིས་༸གོང་ས་མཆོག་མ་ཡ་མིར་ཕེབས་བསུ་ཞུས་པར་ཐུགས་རྗེ་ཆེ་ཞེས་བཀའ་སློབ་སྩལ་ཡོད། དེ་རྗེས་༸གོང་ས་མཆོག་གིས་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ་གྱི་མཛད་ཁུར་གཉིས་ཀྱི་ཐོག་བཀའ་སློབ་སྩལ་བ་མ་ཟད། ལེགས་བྱང་གི་ངོ་བོ་དང་གོ་ལ་གཅིག་གྱུར་གྱི་བསམ་ཤེས་སོགས་ཀྱི་སྐོར་བཀའ་སློབ་སྩལ་གྲུབ་བསྟུན། ཚོགས་བཅར་བ་རྣམས་ཀྱིས་སློབ་ཕྲུག་རྣམས་ནས་སློབ་ཚན་འཕར་མ་ཇི་འདྲ་ཞིག་ལ་དོ་སྣང་སྤྲོད་དགོས་མིན་དང་༸གོང་ས་མཆོག་དང་བོད་ནང་གི་གཞིས་ལུས་བོད་མི་ཚོའི་དབར་འབྲེལ་ལམ་ཇི་འདྲ་ཡོད་མེད། དེ་བཞིན་བོད་ཀྱི་གནད་དོན་དང་འབྲེལ་ནས་མགོན་པོ་གང་ཉིད་མཆོག་ཕྱི་ལོ་༡༩༥༤ ལོར་རྒྱ་ནག་ཏུ་ཆིབས་སྒྱུར་བསྐྱངས་ཏེ་རྒྱ་མིའི་དཔོན་རིགས་ཚོར་འབྲེལ་བ་བྱུང་ཚུལ། ལྷག་པར་མའོ་ཙེ་ཏུང་གིས་རྒྱ་མིའི་དཔོན་རིགས་ཚོ་བོད་ནང་བོད་མི་ཚོར་རོགས་རམ་ཆེད་བཏང་སྐོར་༸གོང་ས་མཆོག་ལ་གསུངས་པའི་གནས་ཚུལ་རྣམས་གསལ་བཤད་མཛད་གྲུབ་བསྟུན། མི་ཡ་མི་གདོད་མའི་མི་རིགས་ཀྱི་དབུ་ཁྲིད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲིའི་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་ནང་ལ་ཆིབས་སྒྱུར་བསྐྱངས་པར་ འཚམས་འངྲིའི་བཀྲ་ཤིས་བདེ་ལེགས་ཞུ་རྒྱུ་ཡིན་ཞེས་ཞུས་པ་དང་སྦྲགས་མ་ཡ་མི་ཞེས་པའི་གྲོང་ཁྱེར་གྱི་མིང་དེ་གདོད་མའི་མི་རིགས་ཀྱི་མིང་ནས་ཆགས་ཚུལ་སོགས་ཀྱི་སྐོར་འགྲེལ་བརྗོད་གནང།
༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་ ༢༠ ཙམ་ལ་མཇལ་ཁ་སྩོལ་བཞིན་པ།
དེ་རྗེས་མ་ཡ་མི་གཙུག་ལག་སློབ་གྲྭའི་གདོད་མའི་སློབ་ཕྲུག་ཁག་གཅིག་ནས་གདོད་མའི་མི་རིགས་ཀྱི་གཞས་སྣ་ཁག་གཅིག་འཁྲབ་སྟོན་གྱིས་གཟིགས་འབུལ་ཞུས། མཛད་སྒོ་གྲོལ་ནས་ཉིན་གུང་ལྗགས་སྨིན་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་ ༢༠ ཙམ་ལ་མཇལ་ཁ་སྩལ། དེ་རྗེས་མགོན་པོ་གང་ཉིད་མཆོག་མང་ཚོགས་ལ་བཀའ་སློབ་སྩོལ་ཆེད་མིལ་ལེཌ་ཚོགས་ཁང་དུ་ཆིབས་སྒྱུར་བསྐྱངས་ཡོད་པ་བཅས།།
