༢༠༡༠ ཟླ་ ༡༠ ཚེས་ ༤ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་དད་ལྡན་པ་ཁག་གཅིག་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༠ ཟླ་ ༡༠ ཚེས་ ༤ ནས་ ༧ བར་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་དད་ལྡན་པ་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་དབུ་མ་རྩ་བ་ཤེས་རབ་དང་ལམ་རིམ་བསྡུས་དོན། རྟེན་འབྲེལ་བསྟོད་པ་བཅས་ཀྱི་ཆོས་འབྲེལ་དབུ་འཛུགས་མཛད་ཡོད། དེ་ཡང་ཚེས་ཕྱི་ ༤ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཐེ་ཝན་དད་ལྡན་རྣམ་པའི་འཐུས་མི་སོགས་ཀྱིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་རྗེས་རྒྱ་སྐད་ཐོག་ནས་ཤེས་རབ་སྙིང་པོ་གསུང་འདོན་གནང་། དེ་ནས་མགོན་པོ་གང་ཉིད་མཆོག་གིས་དེར་འདུས་ཐེ་ཝན་དད་ལྡན་ཆོས་ཞུ་བ་ ༡༣༠༠ བརྒལ་བ་དང་།
དེ་བཞིན་བཀའ་ཆོས་ཞུ་མཁན་ཕྱི་ནང་མི་མང་ ༡༠༨༦ བཅས་ཁྱོན་མི་གྲངས་ ༥༠༠༠ ཙམ་ལ་ཐོག་མར་ནང་ཆོས་ངོ་སྤྲོད་མཛད་དོན། དེ་རིང་འདིར་གཙོ་བོ་རྒྱ་རིགས་ཆོས་གྲོགས་ཚོར་ཆོས་འབྲེལ་བྱེད་རྒྱུ་ཡིན། ནམ་རྒྱུན་ངོས་ཀྱིས་ཆོས་འཆད་སྐབས་སྔོན་ལ་ནང་ཆོས་ངོ་སྤྲོད་དང་། དེ་ནས་ཇིི་ལྟར་ཉམས་སུ་ལེན་ཚུལ་ཞེས་སྡེ་ཚན་གཉིས་སུ་ཕྱེ་གི་ཡོད། དེ་རིང་འདིར་བཤད་བྱའི་གཞུང་རྩ་བ་ཤེས་རབ་ཀྱི་རབ་འབྱེད་གསུམ་དང་། རྗེ་རིན་པོ་ཆེའི་རྟེན་འབྲེལ་བསྟོད་པ་དེ་གཉིས་ངོ་སྤྲོད་བྱེད་རྒྱུ་དང་། དེ་ནས་ཇོ་བོ་རྗེའི་ལམ་སྒྲོན་དང་རྗེ་རིན་པོ་ཆེའི་ལམ་རིམ་བསྡུས་དོན་དེ་གཉིས་ཇི་ལྟར་ཉམས་སུ་ལེན་ཚུལ་སྐོར་ལ་ཆོས་འབྲེལ་བྱེད་ཀྱི་ཡིན། སྔོན་ང་ཚོས་ནམ་རྒྱུན་སྨོན་ལམ་འདོན་རྒྱུའི་དུག་གསུམ་ཉོན་མོངས་སེལ་བར་ཤོག དུག་གསུམ་གྱིས་ང་རང་ཚོའི་སེམས་འཁྲུག་ཡོང་གི་ཡོད། གཞན་ལ་གནོད་པ་བྱེད་རྒྱུ་དེ་དག་དུག་གསུམ་དབང་གིས་ཡོང་གི་ཡོད་པས་ཉོན་མོངས་དུག་གསུམ་སེལ་བར་ཤོག་ཟེར་བ་དེ་ཡིན། ཤེས་རབ་ཀྱི་སྣང་བ་འབར་བའི་སྒོ་ནས་ཉོན་མོངས་དུག་གསུམ་སེལ་ཏེ་དགྲ་བཅོམ་པའི་གོ་འཕང་ཐོབ་ཆེད་དུ་དམིགས་པ་མ་ཡིན་པ་མཐའ་ཡས་པའི་སེམས་ཅན་མཐའ་དག་རྣམ་མཁྱེན་རྒྱལ་བའི་སར་འགོད་རྒྱུའམ་གཞན་ཕན་གྱི་བློ་སྦྱོང་ཡོང་དུས་རྒྱལ་སྲས་བྱང་ཆུབ་སེམས་དཔའི་བློ་དེ་སྦྱོང་ཡོང་གི་ཡོད། བློ་དེ་སྦྱོང་པའི་སྒོ་ནས་རང་གི་ལུས་ངག་ཡིད་གསུམ་དེ་སེམས་ཅན་ལ་དམིགས་ནས་གཞན་དོན་ཁོ་ན་སྒྲུབ་རྒྱུའི་ཆེད་དུ་བློ་སྦྱོང་རྒྱུ་ཞིག་ལ་རྒྱལ་སྲས་ཀྱི་སྤྱོད་ལ་འཇུག་པར་ཤོག་ཟེར་བ་ཡིན། དེ་སྔ་ཡོང་མྱོང་བ་དེ་དག་ལ་ངོས་ཀྱི་སྐད་ཆ་ཤོད་རྒྱུ་དེ་ལྡབ་སྐྱོར་འདྲ་པོ་ཡོང་གི་རེད། གང་ལྟར་ཆོས་ཉན་རྒྱུ་ཞེས་པ་དེ་ཐེངས་གཅིག་སྒྲུང་ཉན་པ་ལྟ་བུ་མིན་པས་ཡང་ཡང་ཐོས་དགོས། དཔེར་ན། ང་རང་ཚོའི་གསུང་རྒྱུན་ལ་ནང་དོན་རིག་པའི་གཞུང་དེ་ཚོ་ཤེས་རྒྱུ་ཤེས་ཡོད་ཀྱང་ཡང་སྐོར་བསྐྱར་སྐོར་ཀློག་ན་གོ་བ་མི་འདྲ་བ་ཡོད་ཅེས་གསུངས་ཡོད། ཅེས་སོགས་ཀྱི་བཀའ་སློབ་སྩལ་གྲུབ་བསྟུན་ཆོས་འབྲེལ་དངོས་གཞི་དབུ་འཛུགས་མཛད།།
