༢༠༡༠ ཟླ་ ༩ ཚེས་ ༤ རེས་གཟའ་སྤེན་པ།
༄༅། ཕྱི་ལོ་ ༢༠༡༠ ཟླ་ ༩ ཚེས་ ༣ ཉིན་སྔ་དྲོ་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བྱེས་ཀྱི་གདན་ས་བཀྲ་ཤིས་ལྷུན་པོར་༸ཞབས་སོར་འཁོད་སྐབས་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་། ལྷན་ཁང་ཁག་གི་བཀའ་བློན་རྣམ་པ། ལུགས་བདེ་གཉིས་ཀྱི་ས་གནས་འགོ་འཛིན། དགེ་འདུན་རྣམ་པ། མི་མང་བཅས་མི་གྲངས་ ༣༠༠ བརྒལ་བ་དང་བཀྲ་ཤིས་ལྷུན་པོ་དགོན་པའི་མཁན་བླ་འདུས་མང་ནས་དུང་རྒྱ་སྤོས་སྣེ་དང་སེར་སྦྲེང་བཅས་ཀྱིས་མངོན་བསུས་ཏེ་འདུ་ཁང་དུ་གདན་འདྲེན་ཞུས་ཡོད་པ་དང། མགོན་པོ་གང་ཉིད་མཆོག་བཞུགས་ཁྲི་རིན་ཆེར་འཁོད་མཚམས་མཁན་རིན་པོ་ཆེ་མཆོག་ནས་མཎྜལ་སྐུ་གསུང་ཐུགས་རྟེན་འདེགས་འབུལ་ཞུས། དེ་ནས་རྟེན་འབྱུང་གི་གསོལ་ཇ་འབྲས་སིལ་བཏེགས་མཚམས་དབུ་མཛད་ཀྱིས་ཞལ་འདོན་གསུང་བསྐུལ་གནང་བ་དང་། དེ་རྗེས་༸གོང་ས་མཆོག་གིས་བཀྲ་ཤིས་ལྷུན་པོ་དགོན་པའི་ད་ལྟའི་གནས་སྟངས་ཇི་ཡིན་བཀའ་འདྲི་མཛད་པ་མ་ཟད། གདན་ས་བཀྲི་ཤིས་ལྷུན་པོ་འདི་བཞིན་ཐམས་ཅད་མཁྱེན་པ་དགེ་འདུན་གྲུབ་ཀྱི་སྐྱོང་ཡུལ་ཡིན་པས་ངོས་ཀྱི་མ་བལྟས་ན་སུས་བལྟ་གི་རེད་དམ་ཞེས་བཀའ་སློབ་གསུང་གི་བདུད་རྩི་ཕེབས་པ་དང་སྦྲགས་དགོན་པ་རྒྱ་བསྐྱེད་བྱེད་རྒྱུར་ཐུགས་སྨོན་བཅས་མཛད་གྲུབ་བསྟུན། སྐལ་བཟང་ཕོ་བྲང་དུ་གདན་ཞུས་དང་འབྲེལ་མཁན་རིན་པོ་ཆེ་མཆོག་དང་དམིགས་བསལ་ལས་སྣེ་ཁག་གཅིག་ལ་མཇལ་ཁ་དང་གསུང་མོལ་གྲུབ་མཚམས་དགོན་དེ་ནས་ཆིབས་ཞལ་སྒྱུར་བའི་གནས་བསྡུས་སུ།།
