༢༠༡༠ ཟླ་ ༩ ཚེས་ ༢༢ རེས་གཟའ་ལྷག་པ།

ཕྱི་ལོ་ ༢༠༠༨ ཟླ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་Wroclaw གྲོང་ཁྱེར་གྱི་ཆེ་བསྟོད་མི་སེར་གྱི་ཕྱག་འཁྱེར་འབུལ་ལམ་ཞུ་བཞིན་པ།

༅༅། །ཕྱི་ལོ་ ༢༠༡༠ ཟླ་ ༩ ཚེས་ ༢༢ དང་ ༢༣ ཉིན་གཉིས་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌེ་ནང་གི་ལོ་ཝར་སི་ལེ་སི་ཡའི་ (Lower Silesia) རྒྱལ་ས་ Wroclaw གྲོང་ཁྱེར་དུ་གྲོང་ཁྱེར་སྤྱི་ཁྱབ་པ་སྐུ་ཞབས་ར་ཕལ་ (Rafal Dutkiewicz) ལགས་ཀྱིས་ཇི་ལྟར་གདན་ཞུའི་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་ཐོབ་སྟེ་ཆིབས་སྒྱུར་བསྐྱངས་ཡོད།

དེ་ཡང་ཕྱི་ཚེས་ ༢༢ ཉིན་པོ་ལན་ཌེ་ཆིག་སྒྲིལ་ལས་འགུལ་ཚོགས་པ་ (Solidarity Movement) དབུ་བརྙེས་ཏེ་ལོ་ངོ་ ༣༠ ཧྲིལ་པོ་འཁོར་བའི་དུས་དྲན་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ ” གདུང་སེམས་མཉམ་སྐྱེ་ ” ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་ཡོད། དེ་བཞིན་ཉིན་གཉིས་ཀྱི་ཆིབས་སྒྱུར་རིང་མགོན་པོ་གང་ཉིད་མཆོག་གྲོང་ཁྱེར་དེའི་ཆོས་ཚོགས་ཁག་གི་སྐུ་ཚབ་རྣམ་པ་དང་མཇལ་འཕྲད། དེ་བཞིན་ Wroclaw འབྲིང་རིམ་སློབ་གྲྭའི་སློབ་ཕྲུག་རྣམས་ལ་མཇལ་ཁ་དང་དྲི་བ་དྲིས་ལན། ཕྱོགས་མཚུངས༌པོ་ལན་ཌེ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་སྐུ་ཚབ་རྣམས་དང་མཇལ་འཕྲད་མཛད་རྒྱུ་ཡིན་འདུག

༸གོང་ས་༸སྐྱབས་མགོན་ཆེན་པོ་མཆོག་དེ་སྔ་ཕྱི་ལོ་ ༢༠༠༨ ལོར་ Wroclaw གྲོང་ཁྱེར་དུ་ཆིབས་སྒྱུར་བསྐྱངས་ཏེ་གྲོང་ཁྱེར་དེའི་ཆེ་བསྟོད་མི་སེར་གྱི་ཕྱག་འཁྱེར་འབུལ་བཞེས་མཛད་ཡོད། ཆེ་བསྟོད་མི་སེར་གྱི་ཕྱག་འཁྱེར་དེའི་ནང་འཁོད་དོན། འདས་པའི་ལོ་རྒྱུས་ནང་པོ་ལན་ཌེ་ནང་སྡུག་སྦྱོང་ཚད་མེད་མྱངས་ཡོད་ཀྱང་སེམས་ཤུགས་ནམ་ཡང་ཆགས་མེད། ད་ལྟ་པོ་ལན་ཌེའི་མི་རིགས་རྣམས་རང་དབང་ལུང་པའི་ནང་བསྡད་ཡོད་པ་མ་ཟད། Wroclaw གྲོང་ཁྱེར་འདིའི་ནང་རིག་གཞུང་དང་ཆོས་ལུགས་མི་འདྲ་བ་རྣམས་ཆིག་སྒྲིལ་ངང་གནས་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་བཞེད་དགོངས་དེ་དག་ང་ཚོའི་ཡུལ་མི་རྣམས་ལ་རྩ་ཆེན་ཞིག་ཡིན་པ་མ་ཟད། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་ནི་འཛམ་གླིང་འདིའི་སྟེང་ཞི་བདེ་དང། རང་དབང་། དེ་བཞིན་ཕན་ཚུན་གུས་བཀུར་གྱི་དགོངས་གཞི་མཛད་མཁན་གྱི་དཔེ་མཚོན་འགྲན་ཟླ་མེད་པ་ཞིག་ཡིན་པས་ང་ཚོའི་གྲོང་ཁྱེར་གྱི་ཆེ་བསྟོད་མི་སེར་གྱི་ཕྱག་འཁྱེར་འདི་སྐུ་ཉིད་མཆོག་ལ་འབུལ་ལམ་ཞུ་ཐུབ་པར་དགའ་སྤོབས་ཆེན་པོ་བྱུང་། ཞེས་འཁོད་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་པོ་ལན་ཌེར་ཆིབས་སྒྱུར་འདི་ནི་ཆིབས་སྒྱུར་བསྐྱངས་ཐེངས་ལྔ་པ་ཆགས་ཡོད།།