༢༠༡༠ ཟླ་ ༩ ཚེས་ ༢༠ རེས་གཟའ་ཟླ་བ།
༄༅། །འདི་གར་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་ས་གནས་འོས་བསྡུ་ལས་ཁང་དང་། ས་གནས་འོས་བསྡུ་ལས་ཁང་གི་ཚོགས་མི་ཡོངས་ཀྱི་འབད་བརྩོན་ལ་བརྟེན་ནས་བཀའ་བློན་ཁྲི་པ་སྐབས་ ༣ པ་དང་། སྤྱི་འཐུས་སྐབས་༡༥ པའི་འོས་བསྡུ་ཆེན་མོའི་དེབ་སྐྱེལ་ལས་དོན་ལེགས་གྲུབ་ཟིན་ནས་སྔོན་འགྲོའི་འོས་བསྡུ་བསླེབ་པར་ཉིན་གྲངས་ ༡༠ ལྷག་ལས་མེད་པའི་སྐབས་དེར་བྱང་ཨ་རིའི་ས་གནས་འོས་བསྡུའི་འགན་འཛིན་སྐུ་ཚབ་དོན་གཅོད་བློ་བཟང་སྙན་གྲགས་ལགས་ནས་འདི་ཟླའི་ཚེས་ ༡༧ ཉིན་ས་གནས་ཚང་མར་འོས་བསྡུ་དང་འབྲེལ་བའི་གལ་ཆེའི་ལམ་སྟོན་ཁག་གཅིག་གནང་ཡོད་པའི་ནང་། ཕྱི་ཟླ་ ༡༠ ཚེས་ ༣ ཉིན་གྱི་འོས་བསྡུའི་དུས་ཚོད་དང་། འོས་སྒམ་བཟོ་སྟངས།འོས་ཤོག་འཕེན་སྐབས་དོ་སྣང་དགོས་པའི་གནད། གང་འདྲ་བྱས་ན་འོས་ཤོག་རྩིས་མེད་འགྲོ་གི་ཡོད་པ། ཉེ་ཆར་སྤྱི་འཐུས་གྲོས་ཚོགས་ཐོག་བྱང་ཨ་རིའི་ཁུལ་ནས་སྤྱི་འཐུས་གྲངས་ཚད་གཅིག་སྤར་ཆ་གནང་བ། དབང་པོ་སྐྱོན་ཅན་ཚོས་གང་འདྲ་བྱས་ནས་འོས་འཕེན་དགོས་པ། གང་འདྲ་བྱས་ནས་འོས་བསྡུའི་ཅིལ་བུ་བཟོ་དགོས་པ།གང་འདྲ་བྱས་ནས་འོས་ཤོག་འགྲེམས་དགོས་པ། འོས་འཕེན་པའི་ཉིན་དཔྱ་དེབ་ལ་ཞིབ་འཇུག་བྱེད་དགོས་པ། འོས་འཕེན་ཟིན་མཚམས་འོས་སྒམ་སོགས་འབྲེལ་ཡོད་ཡིག་ཆ་རྣམས་ས་གནས་འོས་བསྡུ་ལས་ཁང་ལ་གཏོང་དགོས་པ་སོགས་བཙན་བྱོལ་བོད་མིའི་འོས་བསྡུའི་སྒྲིག་གཞིའི་སྒྲིག་གཞིའི་ངོ་བཤུས་ཚང་དེ་སྔ་ནས་ས་གནས་ཚང་མར་བཏང་ཡོད། ནང་གསལ་བའི་གནད་འགག་ཆེ་བའི་དོན་ཚན་རྣམས་ཟུར་བཏོན་གྱིས་གོ་བདེའི་ལམ་ནས་དབྱིན་ཡིག་ཐོག་བཀོད་དེ་ས་གནས་ཚང་མར་ལམ་སྟོན་གནང་ཡོད་པ་རེད། དབྱིན་ཡིག་ཐོག་ནས་གནང་བའི་ལམ་སྟོན་དེར་ཁྱོན་ཤོག་གྲངས་༣དང་དོན་ཚན་ཆེ་ཆུང་བསྡོམས་༣༩ཡོད་པ་དང་། གལ་སྲིད་བོད་ཡིག་གཟིགས་རྒྱུར་དཀའ་ངལ་མེད་མཁན་ཡིན་ཚེ། བཙན་བྱོལ་བོད་མིའི་འོས་བསྡུའི་སྒྲིག་གཞིའི་ངོ་བཤུས་ཆ་ཚང་དེ་སྔ་ནས་ས་གནས་ཚང་མར་བཏང་ཡོད་པ་རེད། ལམ་སྟོན་གྱི་མཇུག་ཏུ། འོས་བསྡུ་དང་འབྲེལ་བའི་ལམ་སྟོན་དེ་དག་ས་གནས་ཚང་མས་ས་གནས་མང་ཚོགས་ལ་མ་གོ་མ་ཐོས་མེད་པའི་འགྲེལ་བརྗོད་གསལ་པོ་དགོས་པའི་འབོད་སྐུལ་གནང་ཡོད་པ་དང་། ས་གནས་འོས་བསྡུ་ལས་ཁང་ནས་ལམ་སྟོན་གནང་བ་དེས་དངོས་གཞིའི་ལས་དོན་ལ་ཕན་ཐོགས་ཧ་ཅང་ཆེན་པོ་བྱུང་སྐོར་ས་གནས་འོས་བསྡུ་ལས་ཁང་ལ་སྙན་སེང་ཡང་ཞུ་མཁན་བྱུང་ཡོད་པ་བཅས།།
