༢༠༡༠ ཟླ་ ༩ ཚེས་ ༡ རེས་གཟའ་ལྷག་པ།
༄༅། །འདི་གར་ཨ་རིའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་གསལ། རང་གཞུང་དབུས་འོས་བསྡུ་ལས་ཁང་གི་གཏན་འབེབས་ཐག་གཅོད་གཞིར་བཟུང་བྱང་ཨ་རིའི་ས་གནས་འོས་བསྡུ་ལས་ཁང་གིས་ཁུལ་དེའིི་སྤྱི་འཐུས་སྐབས་ ༡༥ དང་། བཀའ་ཁྲི་སྐབས་ ༣ པའི་འོས་འཕེན་པའི་མིང་གཞུང་དེབ་འགོད་ཀྱི་ལས་དོན་ལེགས་གྲུབ་ཟིན་ཏེ་ཕྱི་ཟླ་ ༨ ཚེས་ ༢༥ ཉིན་དབུས་འོས་བསྡུ་ལས་ཁང་དུ་ཕུལ་ཟིན་འདུག བྱང་ཨ་རིའི་ས་གནས་འོས་བསྡུའི་འགན་འཛིན་སྐུ་ཚབ་དོན་གཅོད་བློ་བཟང་སྙན་གྲགས་མཆོག་ནས་དེབ་སྐྱེལ་ལས་དོན་དང་འབྲེལ་བ་ཡོད་པའི་ཁྱབ་ཁོངས་ས་གནས་བོད་རིགས་སྤྱི་མཐུན་ཚོགས་པ་ཁག་གི་ཚོགས་གཙོ་དང་། འོས་བསྡུའི་མིང་གཞུང་དེབ་འགོད་འགན་འཛིན་རྣམས་ལ་ཕྱི་ཟླ་ ༨ ཚེས་ ༣༠ ཉིན་འོས་བསྡུའི་དེབ་སྐྱེལ་གནས་སྟངས་དང་འབྲེལ་བའི་ཕྱོགས་བསྡོམས་ཡིག་ཆུང་ཞིག་བཏང་ཡོད། ཡིག་ཆུང་དེའི་ནང་འཁོད་དོན། ས་གནས་ཚང་མས་འབད་བརྩོན་གང་ལེགས་གནང་བར་བརྟེན་ནས་ང་ཚོ་བྱང་ཨ་རིའི་དེབ་སྐྱེལ་གྱི་ལས་དོན་ལེགས་གྲུབ་བྱུང་སྟེ། མཐའ་མའི་དེབ་འགོད་ཐོ་གཞུང་དུས་བཀག་ནང་ཕྱི་ཟླ་ ༨ ཚེས་ ༢༥དབུས་འོས་བསྡུ་ལས་ཁང་དུ་ཕུལ་ཐུབ་པ་བྱུང་བར་ཧ་ཅང་དགའ་པོ་བྱུང་། བྱང་ཨ་མིེ་རི་ཁའི་ས་ཁྱོན་ཧ་ཅང་རྒྱ་ཆེ་བར་བརྟེན་བོད་མི་ག་ཚོད་ཡོད་མེད་གྲངས་འབོར་ཏག་ཏག་ཅིག་བརྗོད་དཀའ་ཡང་། འདི་ག་དོན་གཅོད་ཁང་ནས་བོད་མི་ ༡༥༠༠༠ཆི་ཁྲི་ལྔ་སྟོང་།ཙམ་ཡོད་པའི་ཚོད་དཔག་བྱེད་བཞིན་ཡོད། དེའི་ཁྲོད་ནས་གསུམ་ཆ་གཅིག་རང་ལོ་ ༡༨ མན་ཆད་ཡིན་པར་རྩིས་ན་འོས་འཕེན་པའི་ཆ་རྐྱེན་ཚང་བའི་མི་གྲངས་ཁྲི་གཅིག་ཡིན། གནས་སྟངས་དེ་ལ་ལྟོས་ན་ཐེངས་འདིར་དེབ་སྐྱེལ་བྱེད་མཁན་མི་གྲངས་ ༥༩༠༠ ལྷག་ཙམ་བྱུང་བ་དེས་བརྒྱ་ཆ་ ༥༩ ཟིན་གྱི་ཡོད་པས་དེ་ནི་འདས་པའི་དེབ་སྐྱེལ་ཐེངས་གཉིས་ཀྱི་བརྒྱ་ཆ་ལས་འཕར་སྣོན་བྱུང་བ་ཞིག་ཡིན་པ་མ་ཟད། དེའི་ཐོག་ནས་བྱང་ཨ་རིའི་བོད་མི་ ༥༩༠༠ ལྷག་ཙམ་གྱིས་དང་བླང་དཔྱ་དངུལ་གཙང་འབུལ་ཞུས་ཡོད་པ་ཡང་མཚོན་གྱི་ཡོད། དེ་ནི་ང་ཚོ་ཚང་མའི་འབད་བརྩོན་ལ་བརྟེན་ནས་བྱུང་བ་ཞིག་ཡིན་པས་ཐུགས་ཆེ་ཞུ་རྒྱུ་དང་། དེ་ལས་གལ་ཆེ་བ་ནི་གང་འདྲ་བྱས་ནས་དེབ་སྐྱེལ་བྱེད་མཁན་དེ་དག་གིས་འདི་ལོའི་ཕྱི་ཟླ་ ༡༠ ཚེས་ ༣ ཉིན་གྱི་སྔོན་འགྲོའི་འོས་བསྡུ་དང་། དུས་སང་ཕྱི་ཟླ་ ༣ པའི་ཚེས་ ༢༠ ཉིན་དངོས་གཞིའི་འོས་བསྡུའི་སྐབས་ཆ་ཤས་ལེན་ཐུབ་རྒྱུར་སྐུལ་འདེད་གཏོང་རྒྱུ་དེ་ཡིན་པས་འབྲེལ་ཡོད་ཚང་མས་དེའི་ཐོག་གྲ་སྒྲིག་གནང་རོགས། དེབ་སྐྱེལ་ཚར་རྗེས་ཀྱི་འོས་བསྡུ་དང་འབྲེལ་བའི་ས་གནས་འོས་བསྡུ་ལས་ཁང་གི་གསལ་བསྒྲགས་མུ་མཐུད་ཡོང་རྒྱུར་དེ་དོན་ཐུགས་སྣང་ཡོང་བ་ཞུ་རྒྱུ་ཡིན། ཞེས་འཁོད་ཡོད་པ་བཅས།།
