༢༠༡༠ ཟླ་ ༩ ཚེས་ ༡༧ རེས་གཟའ་པ་སངས།
༄༅། ཕྱི་ལོ་ ༢༠༡༠ ཟླ་ ༩ ཚེས་ ༡༧ ཉིན་རྡ་ས་བོད་ཀྱི་འགྲེམས་སྟོན་ཁང་དུ་བྱང་ཁལ་ལི་ཕ་ནི་ཡ་བོད་རིགས་སྤྱི་མཐུན་ཚོགས་པ་དང་། བོད་ཀྱི་བུད་མེད་ཚོགས་པ་དང་། བཙུན་མའི་ལས་འཆར་ཁང་བཅས་ཀྱིས་གོ་སྒྲིག་འོག་བོད་དོན་ཆེད་རང་སྲོག་བློས་གཏོང་མཁན་རྣམས་ཀྱི་མཚན་སོགས་ཚེམ་དྲུབ་མའི་ཐོག་བཀོད་པ་ཞིག་དབུ་འབྱེད་འགྲེམས་སྟོན་གནང་ཡོད།དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་དུ་འབྲེལ་ཡོད་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་ནོར་འཛིན་ལགས་དང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འཇམ་དཔལ་སྨོན་ལམ་ལགས། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ངག་དབང་འོད་འབར་ལགས་བཅས་ནས་ཁག་སོ་སོར་སྣང་གསལ་ཞལ་ཕྱེ་ཟིན་མཚམས་བྱང་ཁལ་ལི་ཕོ་ནི་ཡ་བོད་རིགས་སྤྱི་མཐུན་ཚོགས་པའི་ཚོགས་ཟུར་བདེ་ཆེན་ཚེ་རིང་ལགས་ཀྱིས་ངོ་སྤྲོད་གནང་དོན། ཨ་རིའི་ནང་མི་རིགས་ནག་པོ་ཚོས་མི་རིགས་དཀར་པོ་དང་འཐབ་རྩོད་བྱས་པའི་བརྒྱུད་རིམ་ནང་ཚེ་སྲོག་ཤོར་བ་ཚོའི་གྱོན་གོས་སོགས་ལ་ཚེམ་དྲུབ་མའི་མིང་གྱི་དྲན་རྟེན་བཞེངས་སྲོལ་བྱུང་བ་ལྟར་ང་ཚོ་བོད་མི་རྣམས་ཀྱིས་ཀྱང་རང་མི་རིགས་ཀྱི་རྣམ་པ་མཚོན་པའི་དར་ཚོན་སྣ་ལྔའི་སྟེང་བོད་མི་རིགས་ཆེད་ཚེ་སྲོག་ཤོར་བ་དེ་དག་གི་མིང་དང་།
སྐྱེས་ཡུལ་བཅས་དྲན་རྟེན་ཆེད་ཚེམ་དྲུབ་མའི་ཐོག་བཀོད་དེ་འགྲེམས་སྟོན་གནང་བཞིན་ཡོད་ཅེས་སོགས་ཀྱི་ངོ་སྤྲོད་གནང་། འགྲེམས་སྟོན་རས་ངོས་ཞིག་ལ་བོད་དོན་ཆེད་ཚེ་སྲོག་ཤོར་བའི་མི་ ༢༥ མཚན་བཀོད་པ་དང་། ད་བར་རས་ངོས་ ༡༦ བཟོས་ཟིན་ཡོད་ལ་སྤྱི་ནོོར་༸གོང་ས་༸སྐྱབས་མགོན་ཆེན་པོ་མཆོག་དང་། དཔལ་རྒྱལ་བ་ཀརྨ་མཆོག་གིས་མཚན་རྟགས་ཀྱང་གསོལ་སྩལ་མཛད་འདུག་པ་བཅས།།
