༢༠༡༠ ཟླ་ ༩ ཚེས་ ༡༠ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༨ ནས་ ༩ བར་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པའི་ལས་བྱེད་གསུམ་གྱིས་རྒྱ་གར་ལྷོ་ཕྱོགས་ཀོ་ལི་གྷལ་དོན་ལྡན་གླིང་གཞིས་ཆགས་སུ་པར་རིགས་འགྲེམས་སྟོན་གྱི་ལམ་ནས་སྤྱིར་བོད་ནང་གི་གནས་སྟངས་དང་ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་བོད་མི་བཙན་བྱོལ་བ་རྣམས་ཀྱི་སྔ་ཕྱིའི་གནས་སྟངས་གསལ་བཤད་བྱས་ཡོད། དེ་ཡང་ཐོག་མར་ཕྱི་ཚེས་ ༨ སྔ་དྲོ་ཆུ་ཚོད་ ༡༠ ཙམ་ལ་ཐོག་མར་ས་གནས་འགོ་འཛིན་ཀརྨ་སེང་གེས་འགྲེམས་སྟོན་གྱི་ངོ་སྤྲོད་དང་དགོས་དོན་བཅས་མང་ཚོགས་ལ་གསལ་བཤད་གནང། དེ་རྗེས་ཏ་ནག་དགོན་པའི་མཁན་པོ་སྤྲུལ་སྐུ་པདྨ་རྟ་མགྲིན་མཆོག་གིས་འགྲེམས་སྟོན་དབུ་འབྱེད་གནང་གྲུབ་བསྟུན་ས་གནས་སྐོར་སྐྱོད་ཀྱི་འགྲེམས་སྟོན་འགན་འཛིན་བཀྲ་ཤིས་ཕུན་ཚོགས་ལགས་ནས་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པའི་ལས་གའི་ངོ་བོ་གང་ཡིན་སྙིང་དོན་ཙམ་ངོ་སྤྲོད་དང་ས་གནས་སྐོར་སྐྱོད་ཐོག་པར་རིགས་འགྲེམས་སྟོན་བྱ་དགོས་པའི་དགོས་དོན་གང་ཡིན་གསལ་བཤད་བྱས་ཡོད། དབུ་འབྱེད་མཛད་སྒོ་མ་གྲོལ་གོང་ལས་བྱེད་བསྟན་འཛིན་རབ་དགའ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།
འགྲེམ་སྟོན་སྐབས་ཁྱོན་མི་གྲངས་ ༢༠༠༠ བརྒལ་བ་ཙམ་ཕེབས་ཏེ་དོ་སྣང་ཆེན་པོ་བྱས་ཡོད། ཕྱི་ཚེས་ ༡༣ ནས་ ༡༤ བར་རྒྱ་གར་ལྷོ་ཕྱོགས་རྒྱ་མཚོའི་འགྲམ་དུ་ཆགས་པའི་གྷོ་ཝ་ཞེས་ཕྱི་རྒྱལ་ཡུལ་སྐོར་སྤྲོ་འཆམ་པ་སྐྱོད་སའི་མངའ་སྡེའི་ནང་པར་རིགས་འགྲེམས་སྟོན་གནང་རྒྱུ་ཡིན་འདུག་པ་བཅས།།
