༢༠༡༠ ཟླ་ ༩ ཚེས་ ༤ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༣ ཉིན་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་ལྷོ་ཕྱོགས་སྦེལ་ཀོོབ་ཏུ་རྟེན་གཞི་བྱས་པའི་བོད་མིའི་སློབ་གྲྭ་ཁག་གི་དགེ་ལས་སློབ་ཕྲུག་ཐུན་མོང་ནས་ཇི་ལྟར་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ་མགོན་པོ་གང་ཉིད་མཆོག་གིས་སྦེལ་ཀོོབ་བོད་ཕྲུག་ཁྱིམ་སྡེེར་ཆིབས་སྒྱུར་གྱིས་དགེ་ལས་སློབ་ཕྲུག་རྣམས་ལ་ལམ་སྟོན་བཀའ་སློབ་སྩལ་བ་མ་ཟད། སློབ་མ་རྣམས་ལ་ཐུགས་བརྩེ་བ་ཆེན་པོས་འཇམ་དཔལ་དབྱངས་ཀྱི་ལྗགས་ལུང་སྩལ་ཡོད། དེ་ལྟར་ཁུལ་དེའི་སློབ་གྲྭ་ཁག་གི་སློབ་ཕྲུག་སྟོང་ཕྲག་ཁ་ཤས་ཚང་འཛོམས་བྱུང་བ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བའི་ནང་། བོད་མིའི་བཙན་བྱོལ་བའི་སྒྲིག་འཛུགས་ནི་བཙན་བྱོལ་བའི་ནང་ནས་སྒྲིག་འཛུགས་ཚགས་ཚུད་ཤོས་དང་གྲ་སྒྲིག་ཤོས་ཡིན། བོད་ནང་དགོན་སྡེ་ཁག་ལ་དམ་བསྒྲགས་དང་གཞིས་ལུས་རྒྱ་ཆེའི་མི་མང་རྣམས་ལ་ཕ་མེས་ཀྱི་སྐད་ཡིག་ལ་སློབ་སྦྱོང་བྱེད་རྒྱུར་དཀའ་ངལ་འཕྲད་བཞིན་ཡོད་སྐོར་ངོ་སྤྲོད་དང་སྦྲགས། མ་འོངས་སོན་རྩར་གྱུར་བའི་སློབ་མ་ཚོར་འདབ་ཤོག་གཉིས་ལྡན་ཡོང་ཆེད་སློབ་སྦྱོང་ལ་ཧུར་བརྩོན་བྱེད་དགོས་པའི་ལམ་སྟོན་བཀའ་སློབ་སྩལ་དོན། གལ་ཏེ་བོད་ནང་གནས་ཚུལ་ཡག་པོ་དང་བཀྲ་ཤིས་པ་ཞིག་ཡོད་ན། ང་ཚོ་འདིར་སོ་སོ་སློབ་སྦྱོང་བྱས་ཏེ་རང་མགོ་གང་ཐོན་བྱས་ན་མ་འགྲིག་པ་མེད། སོ་སོའི་ཕ་མེས་ཀྱི་ལུང་པ་དེར་གནས་ཚུལ་ཧ་ལས་པའི་ཐབས་སྐྱོ་པོ་ཞིག་ཡོད་པ་དང་། གཞིས་ལུས་རྒྱ་ཆེའི་མི་མང་དེ་དག་གིས་ང་ཚོར་རེ་བ་ཞིག་རྒྱག་གི་ཡོད་སྟབས་ལས་འགན་ཞིག་ཁྲིད་ཀྱི་ཡོད། དེར་བརྟེན་ལས་འགན་དེ་སྒྲུབ་པར་བོད་པའི་ངོ་བོ་ཆ་ཚང་བ་ཞིག་དགོས་ཀྱི་ཡོད། དེ་ཡོང་བར་ཕྱོགས་གཅིག་ནས་ང་ཚོ་བོད་པའི་བོད་ཡིག་རེད། དེ་བཞིན་བོད་ཡིག་ནང་ཡོད་པའི་གནའ་རབས་ཀྱི་སངས་རྒྱས་ཀྱི་ལྟ་གྲུབ་མཚོན་པའི་རིག་གཞུང་གཏིང་ཟབ་ཡོད་པ་དེ་དག་ཤེས་རྒྱུ་གལ་ཆེན་པོ་ཡིན། དེའི་ཐོག་ང་ཚོ་ནང་པ་ཞིག་གིས་ངོས་ནས་བཤད་ན་དུས་རབས་ ༢༡ ནང་པ་བྱེད་དགོས་རེད། དེ་གང་ཡིན་ཞེ་ན། དེང་དུས་ཀྱི་ཤེས་ཡོན་ཆ་ཚང་ཡོད་པ་ཞིག་བྱེད་དགོས་ཞེས་ངོས་ཀྱིས་རྟག་པར་བརྗོད་ཀྱི་ཡོད། ང་ཚོ་རྒྱ་གར་ལ་བསླེབས་ཏེ་བོད་ཀྱི་ཆོས་དང་རིག་གཞུང་གཅིག་པུའི་འགྲིག་གི་ཡོད་ན། དགོན་པ་ཁག་དེ་དག་བསྐྱར་གསོ་བྱས་ན་དེས་མ་འགྲིག་པ་ཕལ་ཆེར་མེད། འོན་ཀྱང་དེ་མ་རེད། སློབ་ཕྲུག་ཚོས་གང་ལྟར་མིའི་མཚན་ཉིད་ཚང་བར་དེང་དུས་ཀྱི་ཤེས་ཡོན་དང་། བོད་རང་ཉིད་ཀྱི་གནའ་རབས་ཀྱི་ཤེས་ཡོན་དེ་དག་ཡོད་པ་ཞིག་བྱེད་དགོས། དེ་ལྟར་བྱུང་ན་སོ་སོའི་མི་ཚེ་ཡིན་ནའང་སྐྱིད་པ་ཡོང་གི་རེད། གང་ལྟར་བོད་མི་རིགས་སྤྱི་ལ་ཞབས་འདེགས་བསྒྲུབ་ཐུབ་པ་བྱེད་དགོས་བསམ་སྟེ་སློབ་སྦྱོང་ཧུར་ཐག་བྱེད་དགོས། དེར་བརྟེན་ཁྱེད་རང་ཚོས་ཉིན་མ་གཅིག་ཀྱང་འཕྲོ་བརླག་ཏུ་མ་གཏང་བར་སློབ་སྦྱོང་ལ་ཤུགས་རྒྱག་དགོས་ཞེས་བཀའ་སློབ་ཕེབས་ཡོད། ཡང་༸གོང་ས་༸སྐྱབས་མགོན་ཆེན་པོ་མཆོག་གིས་སློབ་ཕྲུག་ཚོར་སློབ་སྦྱོང་བྱེད་སྟངས་ཀྱི་ཐོག་བཀའ་སློབ་སྩལ་དོན། སློབ་སྦྱོང་བྱེད་སྐབས་ང་ཚོ་དཔེ་ཆའི་ནང་ཐོས་བྱུང་གི་ཤེས་རབ་དང་། བསམ་བྱུང་གི་ཤེས་རབ། སྒོམ་བྱུང་གི་ཤེས་རབ་ཅེས་གསུངས་ཡོད། སྔོན་ལ་དགེ་རྒན་གྱི་བསླབ་པ་དེ་དག་ཉན། དེ་ནས་དགེ་རྒན་གྱི་བསླབ་པ་དང་དེབ་ནང་ཡོད་པ་དེ་དག་སྐྱོར་བ་ཙམ་མིན་པར། དགེ་རྒན་གྱི་བསླབ་པ་དང་། དེབ་ནང་ཡོད་པ་དེ་དག་གི་ཐོག་སོ་སོའི་བསམ་བློས་བརྟག་དཔྱད་བྱས་ཏེེ་ངེས་པ་རྙེད་པ་དེ་ལ་བསམ་བྱུང་གི་ཤེས་རབ་ཟེར། དང་པོ་ཐོས་བྱུང་གི་ཤེས་རབ་ཟེར་བ་དེ་གཅིག་ཐོས་ཏེ་དེ་ཡིན་པ་རེད་བསམ་པ་མ་གཏོགས་མེད། རིམ་པ་གཉིས་པ་དེ་སོ་སོའི་བསྐྱར་དུ་བསམ་བློས་བརྟག་དཔྱད་བྱས་ཏེ་ངེས་པ་རྙེད་པ་དེ་ལ་བསམ་བྱུང་གི་ཤེས་རབ་ཅེས་བརྗོད་ཀྱི་ཡོད། དེ་ནས་བསམ་བློ་བཏང་སྟེ་སོ་སོར་ངེས་པ་བརྙེད་པ་དེ་གོམས་འདྲིས་ལ་བརྟེན་ནས་འགྲོ་རྒྱུ་དེར་ཐོས་བསམ་སྒོམ་གསུམ་གྱི་གོ་རིམ་འགྲོ་བཞིན་ཡོད། ཅེས་བཀའ་སློབ་སྩལ་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དེར་ཡོད་བོད་རིགས་སློབ་དགེ་རྣམས་ལ་བཀའ་སློབ་ཕེབས་དོན། གླ་ཕོགས་བཟས་ཏེ་ཟླ་རེ་ལོ་རེ་གང་འཁྱོལ་སོགས་མིན་པར་ང་ཚོའི་ལས་འགན་ཆེན་པོ་ཞིག་ཡོད་པ་དེ་བསྒྲུབ་དགོས་ཡོད་བསམ་པའི་ཐོག་སོ་སོའི་ནུས་པ་གང་ཡོད་པ་དེ་ཕྲུ་གུ་ཚོར་སློབ་སྦྱོང་སྤྲོད་རྒྱུ་དང་། སློབ་སྦྱོང་སྤྲད་དེ་ཀླད་པ་ཡར་རྒྱས་གཏོང་རྒྱུ་ཙམ་མིན་པར་ཕྲུ་གུ་མི་རེ་ངོ་རེ་སེམས་པ་བཟང་པོ་དང་། ཡ་རབས། སྤྱི་སེམས་ཡོད་མཁན་ཞིག་ཡོང་རྒྱུར་དགེ་རྒན་རྣམས་ནས་ཞར་དང་ཞོར་ལ་བསླབ་བྱ་རྒྱག་རྒྱུ་ཧ་ཅང་གལ་ཆེན་པོ་རེད། དེ་ཁྱེད་རང་ཚོས་དགོངས་པར་བཅངས། ད་ལྟ་དམིགས་བསལ་བོད་པའི་གནས་སྟངས་དུས་ཚོད་གཉན་འཕྲང་ཅན་འདིའི་འོག་མ་འོངས་པའི་མི་རབས་འཚར་ལོངས་བྱེད་མཁན་དེ་དག་ལ་སློབ་སྦྱོང་སྤྲོད་མཁན་ཡིན་དུས་ཧ་ལས་པའི་འགན་དང་ཕུགས་གྱང་རིང་པོའི་བོད་སྤྱི་པའི་དོན་དག་དང་འབྲེལ་བ་ཡོད་སྟབས་ཁྱེད་རང་ཚོས་གཟབ་གཟབ་བྱེད་རོགས་ཞེས་བཀའ་སྩལ་བ་དང་སྦྲགས་མགོན་པོ་གང་ཉིད་མཆོག་གིས་མཛད་སྒོའི་ཐོག་ཕེབས་པའི་རྒྱ་གར་དགེ་རྒན་རྣམས་ལ་དམིགས་བསལ་ཐུགས་རྗེ་ཆེ་ཞུས་ཡོད། གཞན་ཡང་མཛད་སྒོའི་ཐོག་ཉེ་འཁོར་ས་གནས་ཁག་གི་མཐོ་སློབ་སློབ་མ་བརྒྱ་ཕྲག་ཁ་ཤས་བཅར་ཡོད་པ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་དོན། ཁྱེད་རང་ཚོ་ལོ་ཉི་ཤུར་སླེབས་སྐབས་མི་ཚེ་གཏིང་ཚུགས་ཡོང་གི་ཡོད་པས་གཟབ་གཟབ་བྱེད་དགོས། རྣམ་གཡེང་དང་ཁོར་ཡུག་གིས་རྐྱེན་མི་ཚེ་སྟོང་ཟད་དུ་འགྲོ་རྒྱུར་ཉེན་ཁ་ཏན་ཏན་ཡོད། ཁྱེད་རང་ཚོ་མཐོ་སློབ་ཏུ་སྐྱོད་བཞིན་པ་རྣམས་མི་ཚེ་དར་མའི་འགོ་ཚུགས་ཡོང་དུས་གཟབ་གཟབ་བྱེད་དགོས། ད་ལྟ་ངོས་ཀྱིས་བོད་སྤྱི་པའི་དོན་བཤད་མ་ཐག་པ་དེ་དག་སེམས་ནང་ཡང་ཡང་དྲན་གསོ་བཏང་སྟེ་ངས་བོད་མི་རིགས་ཀྱི་ཞབས་འདེགས་བསྒྲུབ། གཞིས་ལུས་རྒྱ་ཆེའི་མི་མང་གི་རེ་བ་བཅོལ་བ་དེ་སྒྲུབ་ཐུབ་པ་ཞིག་བྱས་བསམ་ནས་སློབ་སབྱོང་ཐོག་ཤུགས་རྒྱག་དགོས། ཁ་གཡེང་མིག་གཡེང་བྱེད་པ་དང་། འཁྱམས་རྒྱུ། འཁྲབ་རྒྱུ་སོགས་མ་བྱས་པར་གཟབ་གཟབ་བྱེད་དགོས། ཞེས་བཀའ་སློབ་ཟབ་མོ་སྩལ་ཡོད། མཛད་སྒོ་གྲུབ་བསྟུན་༸གོང་ས་༸སྐྱབས་མགོན་ཆེན་པོ་མཆོག་རྣམ་གྲོལ་གླིང་དགོན་པར་ཆིབས་༸ཞལ་བསྒྱུར་བའི་སྐབས་བྱིས་པ་ཚོས་དགའ་དད་སྤྲོ་གསུམ་ངང་ལག་ཏུ་དཀར་གཙང་མཇལ་དར་ཐོགས་ཏེ་ངང་སྒུག་ཡོད་པ་གཟིགས་རྗེས་མགོན་པོ་གང་ཉིད་མཆོག་ཐང་དུ་ཆེད་ཕེབས་ཀྱིས་སློབ་ཕྲུག་རྣམས་ལ་ཕྱག་གཏོང་གནང་མཛད་པ་མ་ཟད་ལྷན་དུ་སྐུ་པར་ཡང་བསྒྲོན་ཡོད་པ་བཅས།།
