༢༠༡༠ ཟླ་ ༩ ཚེས་ ༢༤ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༣ ཉིན་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌི་མཛད་འཆར་གྱི་ཉིན་མཐའ་མའི་སྐབས་ཐོག་མར་གསར་འགོད་པ་ཁག་གཅིག་ལ་མཇལ་ཁ་སྩལ་ཏེ་མགོན་པོ་གང་ཉིད་མཆོག་གི་མཛད་ཁུར་གསུམ་ངོ་སྤྲོད་མཛད། དེ་རྗེས་ཝོ་ཁོ་ལོའི་སློབ་གྲྭ་ཆེ་བའི་སློབ་མ་ཁག་གཅིག་ལ་མཇལ་ཁ་སྩལ། སྐབས་དེར་ཐོག་མར་མགོན་པོ་གང་ཉིད་མཆོག་གིས་སློབ་ཕྲུག་རྣམས་ལ་ངོ་སྤྲོད་མདོར་བསྡུས་ཤིག་མཛད་རྗེས་དུས་རབས་གསར་པ་འདི་གྲོས་མོལ་དང་ཞི་བདེ། ཆིག་སྒྲིལ་གྱི་དུས་རབས་ཤིག་བསྐྲུན་ཆེད་སློབ་མ་རྣམས་ཀྱིས་རྣམ་དཔྱོད་ཀྱི་བློ་གྲོས་དང་ཁྱད་ལས་ཀྱི་ལག་ཤེས་ཡར་རྒྱས་བཏང་བ་དང་སྦྲགས་ནང་བསམ་བློ་དེ་བཟང་དུ་གཏོང་རྒྱུར་འབད་བརྩོན་དགོས་པའི་འབོད་སྐུལ་མཛད། གཞན་ཡང་སྐབས་དེར་སློབ་ཕྲུག་རྣམས་ནས་དེང་དུས་སྤྱི་ཚོགས་ནང་གྲོགས་མེད་ཁྱེར་རྐྱང་གནས་པའི་དཀའ་ངལ་ཇི་འདྲ་སེལ་དགོས་མིན་དང་། ཐར་པའམ་མྱང་འདས་ཀྱི་དོན་ཇི་ཡིན་སོགས་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་བཀའ་ལན་མཛད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་འདྲ་མིན་ཁག་གཅིག་གི་དབུ་ཁྲིད་དང་མཇལ་འཕྲད་མཛད་དེ་པོ་ལན་ཌེའི་ནང་ཉིན་གཉིས་ཀྱི་མཛད་འཕྲིན་ཁག་ལེགས་པར་མཇུག་བསྒྲིལ་ཏེ་རྒྱ་གར་དུ་ཆིབས་༸ཞལ་བསྒྱུར་ཡོད་པ་བཅས།།
