༢༠༡༠ ཟླ་ ༩ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༧ རེས་གཟའ་མིག་དམར་གྱི་སྔ་དྲོ་༸གོང་ས་མཆོག་གིས་རྒྱལ་ཁབ་བརྒྱད་ཙམ་ནས་བོད་མི་ཁྱད་ལས་པའི་ཚོགས་འདུ་ཐེངས་དང་པོར་བཅར་བའི་བོད་མི་ཁྱད་ལས་པ་མི་གྲངས་ ༩༠ ཙམ་ལ་མཇལ་ཁ་དང་བཀའ་སློབ་སྩལ་དོན། ཁྱེད་རང་ཚོ་མང་ཆེ་བ་བཙན་བྱོལ་ནང་སྐྱེས་པ་རེད། ཚང་མར་འཚམས་འདྲིའི་བཀྲ་ཤིས་བདེ་ལེགས་ཡོད། ང་ཚོ་བཙན་བྱོལ་ལ་ཕྱི་ལོ་ ༡༩༥༩ ཟླ་  ༤ ནང་རྒྱ་གར་དུ་འབྱོར་བ་རེད། དེ་དུས་ལོ་ ༥༠ ཕྱིན་པའི་རྗེས་ལ་བཟོ་ལྟ་གང་འདྲ་ཆགས་གྲབས་ཡོད་མེད་སུ་གཅིག་གི་བསམ་བློའི་ནང་མེད། ཡིན་ནའང་ང་ཚོར་བདེན་པ་ཡོད་དུས་བདེན་པའི་ནུས་པ་གསལ་གྱི་རེད་བསམ་ནས་སེམས་ཤུགས་གཅིག་ཡོད། སེམས་ཤུགས་དེའི་ཐོགས་ཨུ་ཚུགས་བརྒྱབ་སྟེ་བསྡད་ཡོད། སྐབས་དེར་མི་མང་པོ་ཞིག་གི་བསམ་བློའི་ནང་ལོ་འགའ་ཤས་ནང་འགྱུར་བ་ཡོང་གི་རེད་བསམས་ནས་རེ་བ་རྒྱག་མཁན་ཞེ་དྲག་བྱུང་ཡོད།
ཡིན་ནའང་རེ་བ་བཟང་ས་ནས་བརྒྱབ་གྲ་སྒྲིག་སྡུག་ས་ནས་བྱེད་དགོས་པའི་བསམ་ཚུལ་དེ་འཁྱེར་ནས་གཞིས་ཆགས་འཛུགས་རྒྱུ་དེ་བྱས་ཡོད། ལོ་ ༥༡ ཕྱིན་པའི་རྗེས་ང་ཚོ་བོད་པའི་གནས་སྟངས་དེར་ཕྱིར་བལྟས་སློག་པ་ཡིན་ན། ལྔ་བཅུ་ང་དགུའི་ལོར་རྒྱ་ནག་གཞུང་གིས་བོད་ས་ཡོངས་རྫོགས་ལ་དྲག་གནོན་བྱེད་སྐབས་ལོ་ལྔ་བཅུའི་རྗེས་བོད་པ་ཚོས་རྒྱ་ནག་གཞུང་ལ་མུ་མཐུད་ནས་སུ༜ན་པོ་བཟོ་གི་རེད་བསམ་པ་ཕལ་ཆེར་མེད། བོད་ཀྱི་གནད་དོན་ཡལ་འགྲོ་གི་རེད་བསམ་པའི་ཚོད་དཔག་བྱས་ཡོད་ཀྱང་ང་ཚོ་ཡལ་མེད། གཙོ་ཆེ་ཤོས་བོད་ནང་ཡོད་པའི་རྒྱ་ཆེའི་མི་མང་ཚོའི་སེམས་ཤུགས་ཧ་ལས་པ་རེད་འདུག  རྒྱ་ཆེའི་མི་མང་ཚོར་སེམས་ཤུགས་དེ་འདྲ་ཞིག་ཡོང་བ་དེའང་རྒྱ་ནག་གཞུང་གི་བཀའ་དྲིན་རེད། བོད་པར་སྡུག་ཐག་ཆོད་བྱས་པ་ཡིན་ཙང་བོད་པ་ཚོར་སོ་སོའི་ལོ་རྒྱུས་དང་སྐད་ཡིག་ཡོད་པའི་མི་རིགས་ཤིག་རེད། སྐད་ཡིག་དེ་ཡང་སངས་རྒྱ་པའི་ལྟ་གྲུབ་ཟབ་ཤོས་བོད་ཡིག་ནང་ཡོད། དེ་འདྲ་ཡོད་མཁན་གྱི་མི་རིགས་གཅིག་ལ་རྒྱ་མིས་མཛུབ་མོ་གང་བསྟན་ཤར་རེད་ཟེར་ན་ཉན་གྱི་མ་རེད། དེར་བརྟེན་དྲག་གནོན་བྱེད་སྐབས་བོད་པའི་སེམས་ནང་ན་ཚ་གཏོང་གི་ཡོད། ང་ཚོ་བོད་པ་སེམས་ཤུགས་མཁྲེགས་པོ་ཡོང་རྒྱུའི་བཀའ་དྲིན་གཙོ་བོ་དེ་རྒྱ་མི་རེད། རྒྱ་མིས་བོད་པར་བྱམས་པོ་བྱས་ཡོད་ན་ཏཱ་ལའི་བླ་མ་མི་དགོས་རྒྱ་མི་ཡག་པོ་འདུག་ཕལ་ཆེར་ཟེར་མདོག་ཁ་པོ་རེད། སྔ་མོ་བོད་པའི་བླ་མ་ཚོར་རྒྱ་ནག་གོང་མས་གོ་ས་དང་རྒྱན་ཆ། དར་གོས་ཆེན་སྤྲོད་སྐབས་བོད་པས་ཀོ་ཐག་ཏོག་ཙམ་གློད་ཡོད། རྒྱ་མིས་བྱམས་པོ་བྱས་ཡོད་ན་ད་ལྟ་ནང་བཞིན་བསམ་བློ་དེ་བསླེབས་ཀྱི་མ་རེད། ཡིན་ནའང་རྒྱ་མི་ཚོས་བསམ་བློ་གཏོང་སྟངས་གཏི་སྟུག་རེད། འཕྲལ་སེལ་དབང་ཆ་ཡོད་དུས་དེ་བེད་སྤྱོད་བྱས་ནས་རྡུང་རྡེག་བཏང་ན་འགྲིག་གི་རེད་བསམ་པ་དེ་མིག་རྒྱང་ཐུང་ཐུང་གི་བསམ་བློ་ཡིན། བློ་གྲོས་དང་ཡ་རབས་མེད་མཁན་གྱི་བྱེད་སྟངས་རེད། གཙོ་ཆེ་ཤོས་བོད་ནང་གི་རྒྱ་ཆེའི་མི་མང་ཚོའི་སེམས་ཤུགས་ཧ་ལས་པ་རེད། དེ་ལྟ་བུའི་སེམས་ཤུགས་དང་སྙིང་སྟོབས་ཡོད་དུས་ང་ཚོ་འདིར་རང་དབང་ལུང་པའི་ནང་བོད་པ་ཚོ་ཡིན་ནའང་དངོས་གནས་སྤོབས་པ་བྱས་ནས་ང་ཚོའི་དོན་གྱི་བདག་པོ་བོད་ནང་དུ་ཡོད་པའི་གཞིས་ལུས་རྒྱ་ཆེའི་མི་མང་ཚོ་རེད། ཁོང་ཚོས་ལྷག་བསམ་དང་སྙིང་སྟོབས་དེ་འདྲ་ཞིག་འཁྱེར་ནས་ལོ་ ༦༠ ཙམ་ཕྱིན་ནའང་འགྱུར་བ་མེད་པར་སྡོད་སྐབས་ང་ཚོའི་བསམ་བློའི་ནང་གཞི་ནས་གདེང་ཚོད་དང་སྤོབས་པ་ཞིག་སླེབས་ཀྱི་འདུག དུས་ཡུན་དེའི་རིང་ང་ཚོ་བོད་པའི་ཕྱོགས་ནས་བསམ་བློ་མཁྲེགས་སུ་ཕྱིན་ཡོད། རྒྱ་མིའི་ཕྱོགས་ནས་འགྱུར་བ་ཞེ་དྲག་འགྲོ་བཞིན་ཡོད། ལོ་ ༦༠ ནང་གུང་ཁྲན་ཏང་གི་གཅིག་སྡུད་དབང་ཆ་བསྡད་ཡོད་ཀྱང་སྤྱི་ཡོངས་ཀྱི་འགྲོ་སྟངས་ལ་འགྱུར་བ་ཞེ་དྲག་ཕྱིན་ཡོད། དེར་བརྟེན་རན་པོ་དང་བདེན་པ་མེད་མཁན་དེར་འགྱུར་བ་མ་བཏང་ཀ་མེད་རེད། གཏོང་འདོད་མེད་ནའང་གཏོང་དགོས་པ་ཆགས་ཡོད། ང་ཚོས་འཐབ་རྩོད་དེ་རྒྱུ་མཚན་ལྡན་པ་དང་དྲང་བདེན་ཞིག་ཆགས་ཡོད་པས་འགྱུར་བ་གཏོང་དགོས་པ་གང་ཡང་མེད། ལོ་དེའི་རིང་ང་ཚོའི་ལངས་ཕྱོགས་དང་འཐབ་རྩོད་བྱེད་རྒྱུ་དེ་ལོ་རེ་ནས་ལོ་རེ་ཤུགས་ཆེ་རུ་དང་གསལ་དུ་འགྲོ་བཞིན་ཡོད། བོད་པ་ཞིག་ཡིན་ཕྱིན་སྐྱེས་ས་གང་དུ་ཡིན་མིན་ཁྱད་མེད། ཁ་སེང་ངོས་རང་ཀུ་ལུར་ཡོད་སྐབས་སྔ་དྲོ་སྡོད་སའི་གཡས་གཡོན་དུ་འཆམ་འཆམ་འགྲོ་སྐབས་བོད་མི་སྐོར་སྲུང་བ་ཞིག་ལ་ཁྱེད་རང་སྐྱེས་ཡུལ་གང་ནས་ཡིན་ཞེས་དྲིས་སྐབས་མ་ནཱ་ལིར་སྐྱེས་པ་རེད་བརྗོད་བྱུང། འོན་ཀྱང་ངའི་ཕ་ཡུལ་མཚོ་སྣ་ཡིན་ང་བོད་པ་ཡིན་བརྗོད་བྱུང། གཞིས་ཆགས་སུའང་གཞོན་སྐྱེས་ཁག་གཅིག་ལ་ཕ་ཡུལ་དྲིས་སྐབས་སྐྱེས་ས་མེ་སོར་གཞིས་ཆགས་ཡིན་ནའང་རང་གི་ཕ་ཡུལ་ངོ་མ་གང་ཡིན་གསལ་པོ་བརྗོད་རྒྱུ་འདུག ཞེ་དྲག་ཡག་པོ་རེད། གནས་ཚུལ་དེ་ངོས་ཀྱི་མང་ཚོགས་ལའང་བརྗོད་པ་ཡིན། སོ་སོའི་ལུས་འདི་སྐྱེས་ས་དང་འཚར་ལོངས་བྱེད་ས་དེ་ལུང་པ་གསར་པ་ཞིག་ཆགས་ཡོད་ནའང་ང་ཚོས་ཕ་མའི་རིགས་རྒྱུད་དེ་གཙོ་བོ་རྩི་བཞིན་ཡོད། ཕ་མའི་རིགས་རྒྱུད་ཀྱི་ཆ་ནས་བོད་པ་ཡིན་དུས་སོ་སོའི་ཤ་ཁྲག་རུས་གསུམ་དེ་བོད་པའི་ཤ་ཁྲག་རུས་གསུམ་ཞིག་ཡིན་པས་མ་འཆི་བར་དུ་བོད་པ་ཞེས་པ་དེར་འགྱུར་བ་ནམ་ཡང་འགྲོ་རྒྱུ་མེད། ཁྱེད་རང་ཚོའི་བསམ་བློ་གཏོང་སྟངས་དེ་ཞེ་དྲག་ཡག་པོ་བྱུང་འདུག་ཅེས་ངོས་ཀྱིས་ཁོང་ཚོར་བསྔགས་བརྗོད་བྱས་པ་ཡིན། དེ་ཞེ་དྲག་རྩ་ཆེན་པོ་རེད། ང་ཚོ་བོད་པ་སྤྱི་བོ་གནམ་བསྟན་སུ་འདྲ་ཞིག་ཡིན་ནའང་བོད་པ་ཡིན་བསམ་པའི་འདུ་ཤེས་དགོས། བོད་པ་ཡིན་བསམ་པའི་འདུ་ཤེས་དེ་བཅངས་ཏེ་ལྐུགས་པའི་ཞེན་ཁོག་དེ་མ་རེད། ང་ཚོ་བོད་མིི་རིགས་ཀྱི་ཞེན་ཁོག་བྱེད་རིང་ཆོག་པ་ཞིག་རེད། བོད་པ་ཞེས་པ་འདི་སྐྱོ་པོ་ཞིག་མིན། གྱོང་པོ་ཞེ་དྲག་རེད། གཙོ་ཆེ་ཤོས་ང་ཚོའི་རིག་གཞུང་གི་ཐོག་ནས་བསམ་བློ་བཏང་ན། དངོས་ནས་ཧ་ལས་པ་རེད་འདུག དེ་རིང་ཁ་སང་འཛམ་བུ་གླིང་འདིའི་སྟེང་སངས་རྒྱས་པའི་ཆོས་དེ་གལ་ཆེ་བ་ཞིག་ཆགས་ཡོད། གལ་ཆེན་པོ་ཆགས་པའི་སངས་རྒྱས་པའི་ཆོས་སྐོར་ལ་ཆ་བཞག་ན་བོད་ཀྱི་སངས་རྒྱས་པའི་ཆོས་ལས་ལྷག་པ་ཞིག་འཛམ་གླིང་འདིའི་སྟེང་མེད་པ་གསལ་པོ་ཞེ་དྲག་རེད། བོད་ཀྱི་སངས་རྒྱས་པའི་ཆོས་ཀྱི་ཐོག་ནས་ཚན་རིག་པ་དང་དཔུང་པ་གཤིབ་བྱས་མཉམ་དུ་སྐད་ཆ་ཤོད་ཐུབ་ཀྱི་ཡོད། ཆོས་ལུགས་གཞན་སུ་གཅིག་ལ་ཧ་ལམ་མེད། ཚན་རིག་པ་ཚོ་ཆོས་པ་ཆགས་ཏེ་རྐུབ་གྲལ་སྒྲིག་གི་མེད། ཚན་རིག་པ་ཚན་རིག་པ་རང་ལ་བསྡད་ནས་ཆོས་ཁས་མ་ལེན་མཁན་ཆོས་ལ་ཐེ་ཚོམ་སྐྱེས་མཁན་མང་པོ་ཞིག་ཡོང་གི་ཡོད། ཡིན་ནའང་མིའི་ཤེས་བྱའི་རྣམ་གྲངས་ཐོག་ནས་སེམས་ཀྱི་རྣམ་གཞག་དེ་ཚོ་གཙོ་བོ་རྒྱ་གར་གྱི་གནའ་རབས་ནས་གསུངས་ཡོད་པ་དེ་ཞེ་དྲག་ཕྱུག་པོ་ཡོད། དེའི་ནང་ཚན་སངས་རྒྱས་པའི་ཆོས་ནང་ཞེ་དྲག་ཕྱུག་པོ་ཡོད། གཞི་ནས་ཚན་རིག་པ་ཚོས་དེ་ནས་ཚུར་སློབ་སྦྱོང་ལེན་རྒྱུའི་རེ་བ་རྒྱག་བཞིན་ཡོད། ངོས་ཀྱིས་དུས་རྒྱུན་དཔེ་མཚོན་གཅིག་ཤོད་ཀྱི་ཡོད། ཁང་པ་འདི་མ་བརྒྱབ་སྔོན་ལོ་གཅིག་སྐབས་ང་ཚོ་འདིར་ཚན་རིག་པ་དང་ཚོགས་འདུ་ཚོགས་ཡོད། ཚོགས་འདུའི་སྐབས་ཉི་ཧོང་གི་མཁས་པ་ཨ་ཅག་ལགས་ཤིག་འདུག ཉིན་དང་པོ་གཉིས་པའི་སྐབས་འཇམ་ཐིང་ངེར་བསྡད་སོང། དེ་རྗེས་ཉིན་གསུམ་པར་ཨ་ཅ་དེས་ད་བར་ཁོང་གིས་བསམ་བློའི་ནང་ང་ཚོ་ཨེ་ཤི་ཡའི་རིག་གཞུང་གི་ཐོག་ནས་དངོས་པོའི་གནས་ལུགས་ལ་ཕར་ཞིབ་འཇུག་བྱ་རྒྱུའི་སྤོབས་པ་མེད་བསམ་པ་དྲན་བཞིན་ཡོད། ནུབ་ཕྱོགས་པའི་ཚན་རིག་གི་ཐོག་ནས་ཨེ་ཤི་ལ་ཚུར་ཞིབ་འཇུག་བྱེད་ས་བྱས་ནས་ཨེ་ཤི་ཡ་ཁྲོམ་ར་ལྟར་ཞིབ་འཇུག་བྱེད་ས་དང་ཞིབ་འཇུག་བྱེད་མཁན་དེ་ནུབ་ཕྱོགས་པ་ཡིན་པ་ངོས་འཛིན་བྱེད་བཞིན་ཡོད། དེ་རེས་ཚོགས་འདུ་འདིར་ཡོང་ནས་ཉིན་མ་གཉིས་ཕྱིན་རྗེས་ང་ཚོ་ཨེ་ཤི་ཡ་ལའང་ཕར་ཞིབ་འཇུག་བྱ་རྒྱུའི་ནུས་པ་དང་ཆ་རྐྱེན་ཡོད་པ་ཞིག་མཐོང་བྱུང་ཞེས་བརྗོད་ཀྱི་འདུག དེ་བདེན་པ་རེད།  ང་ཚོ་བོད་པ་སྐྱོ་པོ་ཁྱོན་ནས་མ་རེད། ང་ཚོ་བོད་པའི་རྣམ་དཔྱོད་སངས་རྒྱས་པའི་ཆོས་ཀྱི་ཐོག་ལ་བཏོན་ཡོད། སངས་རྒྱས་པའི་གྲུབ་མཐའི་ལྟ་གྲུབ་ནང་བོད་པས་རྣམ་དཔྱོད་བཏོན་པ་རེད། དེང་དུས་ཤེས་ཡོན་དང་འབྲེལ་བའི་སྡེ་ཚན་གཞན་སྔ་མོ་ནས་བོད་ནང་མེད། སྔ་མོ་སྔ་མོའི་གནས་ཚུལ་ཁག་ཁག་རེད། འཛམ་གླིང་ཕྱི་ལ་དེང་རབས་ཀྱི་འགྱུར་བ་ཕྱིན་པའི་སྐབས་ང་ཚོའི་བོད་ནང་འགྱུར་བ་གང་ཡང་མ་ཕྱིན་པར་གནས་ཡོད། ང་ཚོ་བོད་པའི་རྣམ་དཔྱོད་དེ་རྒྱ་གར་ནས་བྱུང་བའི་སངས་རྒྱས་པའི་ཆོས་དེའི་ནང་བེད་སྤྱོད་བྱས་ཡོད། བོད་པའི་སྐད་ཡིག་དེའང་དེའི་ནང་བེད་སྤྱོད་བྱས་ཡོད། དེང་སང་སངས་རྒྱས་པའི་ཆོས་འགྲེལ་བཤད་རྒྱག་དགོས་བྱུང་ན་བོད་ཡིག་ཡག་ཤོས་ཆགས་ཡོད། ལེགས་སྦྱར་སྐད་དེ་དུས་ཚོད་ཡོལ་ཚར་བ་རེད། ད་ལྟ་ཡོད་བཞིན་པའི་སྐད་ཡིག་ནང་བོད་ཡིག་དེ་ཡག་ཤོད་ཡིན། དེར་བརྟེན་བོད་ཀྱི་མཁས་པ་ཞེ་དྲག་མང་པོ་བྱུང་ཡོད། ནང་པའི་ཆོས་བོད་དུ་མ་དར་གོང་རྒྱ་ནག་ཏུ་ལོ་གསུམ་བརྒྱ་བཞི་བརྒྱ་སྔོན་ལ་དར་བ་རེད། རྒྱ་ནག་མི་འབོར་མང་གི་རེད། ཡིན་ནའང་རྒྱ་གར་ནས༌བྱུང་བའི་སངས་རྒྱས་པའི་ཆོས་ང་ཚོ་བོད་པར་ཆ་བཞག་ན་བཀའ་འགྱུར་བསྟན་འགྱུ༜ར་པུ་ཏི་གསུམ་བརྒྱ་ཙམ་ཡོད། པུ་ཏི་གསུམ་བརྒྱ་དེ་གཞི་ལ་བཞག་ནས་དེ་ཚོའི་དགོངས་འགྲེལ་རྩོམ་མཁན་བོད་པ་ནང་བཞིན་སུ་གཅིག་མེད། བོད་པས་ལོ་བརྒྱ་ཕྲག་དང་ཧ་ལམ་སྟོང་ཕྲག་རིང་བཀའ་འགྱུར་བསྟན་འགྱུར་དེ་དག་གི་དགོངས་འགྲེལ་མཁས་པ་མང་པོས་བརྩམས་ཡོད། དཔེར་ན། རྗེ་རིན་པོ་ཆེས་ལྗགས་རྩོམ་གནང་བའི་བསྟན་བཅོས་ལེགས་བཤད་སྙིང་པོ་ཡོད། སེམས་ཙམ་པ་དང་དབུ་མ་པའི་ལྟ་བའི་སྐོར་གསུངས་ཡོད། མཁྲེགས་པོ་དང། དོན་ཟབ་པོ་ཞེ་དྲག་རེད། ཝ་རཱ་ཎ་སིར་རཱམ་ཤང་ཀར་ཏི་རི་པཱ་ཊི་ཁོང་རང་ཧིན་རྡུའི་བྲམ་ཟེ་དང་ལེགས་སྦྱར་ལ་མཁས་པ་རེད། ཕྱིས་སུ་ནང་ཆོས་བསླབས་ཏེ་ནང་པ་ཆགས་པ་རེད། ཁོང་གིས་རོགས་རམ་བྱས་ཏེ་ལེགས་བཤད་སྙིང་པོ་ཧིན་ཡིག་ལ་བསྒྱུར་བ་རེད། ད་ཆ་ཧ་ལམ་ལོ་བཅོ་ལྔ་ཙམ་ཕྱིན་པ་རེད། ཁོང་གིས་ཧིན་སྐད་ཐོག་བསྒྱུར་ཚར་ནས་ཉིན་གཅིག་ངོས་ཀྱིས་ཁོང་ལ་ཁྱེད་རང་གིས་ལེགས་བཤད་སྙིང་པོ་ཧིན་སྐད་ཐོག་བསྒྱུར་བ་རེད། ལེགས་བཤད་སྙིང་པོ་འབྲི་མཁན་བོད་ཀྱི་མཁས་པ་ཞིག་རེད། མཁས་པ་དེས་ནཱ་ལེནྡྲའི་མཁས་པའི་གྲལ་དུ་ཚུད་པ་འདུག་གམ་ཞེས་དྲིས་པས་ཁོང་གིས་ཐེ་ཚོམ་མེད་པར་དཔེ་ཆ་དེ་འབྲི་མཁན་ནཱ་ལེནྡྲའི་མཁས་པའི་གྲལ་དུ་ཚུད་པ་ཙམ་མ་ཟད། མཁས་པའི་ཡང་རྩེའི་གྲལ་དུ་བསླེབ་ས་རེད་ཅེས་བརྗོད་བྱུང། དེས་བོད་པའི་རྣམ་དཔྱོད་ཕལ་ཆེར་མཚོན་བཞིན་ཡོད། ངོས་ཀྱིས་འགྲན་བསྡུར་བྱས་ནས་བཤད་པ་མིན། རྒྱ་ནག་མཁས་པའི་ནང་ནས་ཕལ་ཆེར་ལོ་སྟོང་ཕྲག་གཉིས་ལྷག་ཙམ་ནང་དེ་འདྲའི་སངས་རྒྱས་པའི་གྲུབ་མཐའི་སྐོར་ལ་བསྟན་བཅོས་བརྩམས་པ་ཧ་ལམ་གཅིག་ཀྱང་བྱུང་ཨེ་ཡོད། དེ་ལྟར་རྒྱ་ནག་ནང་མེད་དུས་ཉི་ཧོང་དང་ཀོ་རི་ཡ། ཝི་ཏི་ནམ་སོགས་ཀྱི་ནང་དུའང་མེད། ཐེ་ར་ཝ་ཐའི་ལུང་པ་ཚོར་ཐེག་པ་ཆེན་པོའི་གཞུང་ལ་སློབ་སྦྱོང་བྱེད་ཀྱི་མེད། སྐབས་རེ་བོད་པ་ཏོག་ཙམ་གླེན་རྟགས་ཚ་པོ་བྱས་ནས་ཕུགས་རྒྱང་རིང་པོའི་བསམ་བློ་མ་འཁོར་བར་མགོ་ལོག་ཏོག་ཙམ་རྩེད་ཀྱི་ཡོད། རྒྱ་ནག་གོང་མར་བོད་པས་གོ་མིང་དང་དམ་ཕྲུག་ཆེད་བྱབ་སྐྱེལ་མཁན་དེ་འདྲ་བྱུང་ཡོད། རྩ་བའི་ང་ཚོ་མི་རིགས་ལ་ཆ་བཞག་ན་ཞེ་དྲག་གྱོང་པོ་རེད། རྒྱ་ནག་གི་ས་མཚམས་སུ་ཡོད་པའི་མདོ་སྟོད་སྨད་ཀྱི་ས་ཁུལ་དེ་ཚོའི་ནང་ལོ་སྟོང་ཕྲག་རིང་བོད་རང་གི་སྐད་ཡིག་ཟིན་ནས་བསྡད་ཡོད། ལོ་སྟོང་ཕྲག་རིང་ས་མཚམས་བྱས་ནས་བསྡད་ཀྱང་རྒྱ་དང་བོད་ཅེས་ས་མཚམས་དེ་ལོ་སྟོང་ཕྲག་རིང་ལ་ས་མཚམས་གསལ་པོ་ཟུང་ནས་བསྡད་ཡོད་ཅེས་ཁམས་པ་དང་ཨ་མདོ་འགའ་རེས་བརྗོད་པ་དེ་བདེན་པ་རེད། ང་ཚོ་བོད་མི་རིགས་རྒྱ་གར་དུ་བསླེབས་ཏེ་རང་དབང་ཞིག་ཐོབ་ཡོང་དུས་བོད་པའི་ཕྲུ་གུས་དེང་དུས་ཤེས་ཡོན་ནང་སློབ་སྦྱོང་བྱེད་རྒྱུ་འདྲ་འདྲ་བསླེབས་ཐུབ་ཀྱི་ཡོད། ཆ་རྐྱེན་དང་མཐུན་རྐྱེན་འཛོམས་མ་འཛོམས་དེ་འདྲའི་ཁྱད་པར་ཕྲན་བུ་ཡོང་གི་ཡོད་མ་གཏོགས་གཞན་བོད་པ་གྱོང་ཐག་ཆོད་ཡོད། སྤྱི་ཡོངས་ཀྱི་ང་ཚོ་བོད་པ་ཧ་ལས་པ་རེད་འདུག སོ་སོའི་མི་རིགས་ཀྱི་ཞེན་ཁོག་སྙིང་སྟོབས་དཀའ་ལས་རྒྱག་ཐུབ་མཁན་གྱི་རྣམ་དཔྱོད་ཡོད་མཁན་ཞིག་ཡིན་པ་ང་ཚོས་ཤེས་དགོས། དཔེར་ན། ང་ཚོ་བཙན་བྱོལ་དུ་འབྱོར་མ་ཐག་བོད་པ་འགའ་རེས་བོད་པའི་གོས་གྱོན་རྒྱུར་ངོ་ཚ་ཡི་འདུག་ཟེར་མཁན་བྱུང་བ་རེད། བོད་པར་སྐྱེས་པ་དེས་གྱོང་རག་འདུག་ཟེར་མཁན་ཡང་བྱུང་ཡོད། དེ་ནས་འཛམ་གླིང་འདིའི་སྟེང་ང་ཚོས་ཕར་དྲིལ་བསྒྲགས་བྱེད་ཐུབ་ཀྱི་མེད་ལ་བྱས་ཀྱང་མེད། འོན་ཀྱང་འཛམ་གླིང་ནང་བློ་གཟུ་བོར་གནས་མཁན་མི་མང་པོས་བོད་པ་ཞེས་བརྗོད་སྐབས་ཡ་རབས་དང་དྲང་པོ་སེམས་པ་བཟང་པོ་ཡིན་པ་ཞིག་ལ་ངོས་འཛིན་བྱས་པར་བརྟེན་བོད་པའི་སྤུས་ཚད་དང་ཆེ་མཐོང་ཞེ་དྲག་ཆེ་རུ་ཕྱིན་ཡོད། འོན་ཀྱང་དེང་སང་བོད་པ་སྐྱག་རྫུན་ཤོད་མཁན་མང་དུ་ཕྱིན་ནས་ཨ་རི་གཞུང་ཚབ་ཁང་གིས་མཐོང་མཆན་སྤྲོད་རྒྱུ་དེའང་དཀའ་ལས་ཁག་པོ་ཆགས་ནས་ལྡི་ལི་དོན་གཅོད་ཀྱི་ངོས་སྦྱོར་ཡོད་ནའང་ངོས་ལེན་བྱེད་ཀྱི་མེད་པ་བརྗོད་ཀྱི་འདུག དོན་གཅོད་ནས་ངོས་སྦྱོར་བཏང་བའི་མི་འགའ་ཤས་ཨ་རིར་ཕར་ཕྱིན་ནས་ཚུར་མ་ལོག་པར་བརྟེན་དོན་གཅོད་ལའང་ཡིད་ཆེས་བརླག་ཡོད། ན་ནིང་ངོས་རང་ཨ་རིའི་གཞུང་ཚབ་གསར་པ་དང་ཐུག་སྐབས་ངོས་ཀྱིས་ཁོང་ལ་དེང་སང་བོད་པ་མགོ་སྐོར་གཏོང་མཁན་དེ་འདྲ་ཡོད་པ་འདྲ། དགོངས་དག་ཅེས་བརྗོད་པ་ཡིན། ངོས་ཀྱིས་དགོངས་དག་ཞུ་རྒྱུ་འཁེལ་བ་རེད། དགོངས་དག་བརྗོད་ན་ཡག་གི་རེད། བོད་པས་ཞབས་འདྲེན་ཞུས་པ་དེ་དངོས་ཡོད་གནས་ཚུལ་རེད། དེར་བརྟེན་ང་ཚོའི་སྤུས་ག་ཏོག་ཙམ་སྡུག་ཏུ་འགྲོ་བཞིན་ཡོད་པ་ལྟ་བུ་འདུག སྤྱི་ཡོངས་ཀྱི་ཆ་ནས་བོད་པ་ཞེས་བརྗོད་དུས་འཛམ་གླིང་འདིའི་སྟེང་མཐོང་བསླེབས་ཡོད། བོད་ནང་དུ་རྒྱ་མི་ཡུལ་འཁོར་སྤྲོ་འཆམ་འགྲོ་མཁན་དང་དེ་བཞིན་ལས་བྱེད་པ་དེ་འདྲའང་ངོས་དང་ཐུག་པ་མང་པོ་ཡོད། དེ་ཚོ་ཚང་མས་ཁ་གཅིག་གྲགས་ཐོག་ནས་བོད་པ་ཞེས་བརྗོད་དུས་སེམས་རྒྱུད་བཟང་པོ་དང་དྲང་པོ། ཡ་རབས་གཞན་དང་མི་འདྲ་བ་ཞིག་ཡོད་པ་བརྗོད་ཀྱི་འདུག ཉེ་ལམ་ (Lonely Planet) ཞེས་པའི་དཔེ་དེབ་འབྲི་མཁན་དབྱིན་ཇི་གསར་འགོད་པ་ཞིག་ངོས་དང་ཐུག་སྐབས་ཁོང་པེ་ཅིང་ནས་ལྷ་ས་བར་མེ་འཁོར་ནང་ཡོང་དུས་འགྲུལ་པ་མང་ཆེ་བ་རྒྱ་མི་ཡིན་པ་དང། རྒྱ་མི་སློབ་ཕྲུག་དང་ལས་བྱེད། ཡུལ་འཁོར་སྤྲོ་འཆམ་པ་མང་པོ་ཡོད་པ་ལས་བོད་མི་ཉུང་ཉུང་ལས་མི་འདུག་ཅེས་བརྗོད་བྱུང། རྒྱ་མི་དེ་ཚོའི་གཤིས་ཀ་མ་རབས་དང་གདུག་རྩུབ་བྱེད་མཁན་ཞེ་དྲག་ཡོད་པ་དང་། བོད་མི་ཉུང་ཤས་དེ་ཚོ་ཡ་རབས་དང་ཉམ་ཆུང་ཡོད་པས་ཕྱོགས་གཉིས་དབར་ཧེ་བག་ཆེན་པོ་ཞེ་དྲག་ཡོད་སྐོར་ངོས་ལ་བརྗོད་བྱུང།  ང་ཚོའི་བདེན་པའི་རྣམ་པ་དེ་ཇེ་གསལ་ཇེ་གསལ་དུ་འགྲོ་བཞིན་ཡོད། དེ་བོད་མི་རིགས་ཀྱི་སྟོབས་ཤུགས་རེད། ཞབས་འདྲེན་ཞུ་མཁན་འགའ་ཤས་ཡོང་བ་དེ་ཡང་ང་ཚོས་མཐོང་དགོས་པ་རེད། མ་འོངས་པར་ང་ཚོས་དེ་འདྲའི་རིགས་མ་ཡོང་བ་བྱེད་དགོས། ཁྱེད་རང་ཚོས་བོད་པ་ཞབས་འདྲེན་ཞུ་མཁན་དེ་འདྲ་མ་ཡོང་བར་དངོས་བརྒྱུད་ནས་གང་བྱེད་དགོས་མིན་དེ་བྱེད་དགོས་པ་རེད། ཡང་ཁྱེད་རང་ཚོའི་ངོས་ནས་ཆེད་ལས་པ་ཡིན་ཟེར་ནས་དྲང་པོའི་ཐོག་ལ་ཆེད་ལས་པ་མེད་པ་ལྟ་བུ་བྱུང་ན་ཡག་པོ་མེད།  དངོས་ནས་དྲང་པོ་དྲང་ཤག་བདེན་པ་བདེན་གཏུགས་བྱེད་དགོས་པ་རེད། འཛམ་གླིང་སྟེང་དཔལ་འབྱོར་དཀའ་ངལ་དེ་དག་ཡོང་དགོས་པའི་རྒྱུ་རྐྱེན་གང་ཡིན་ངོས་ཀྱི་གྲོགས་པ་དེ་ཚོར་དྲིས་པས་ཁོང་ཚོས་འདོད་རྔམ། དེ་ནས་ (Speculation) དངོས་ཡོད་གནས་ཚུལ་ཞེ་དྲག་མ་ཤེས་པར་ཚོང་ཡོང་རྒྱུའི་དོན་དུ་སྐད་ཆ་སྒྲོ་བཏགས་ཤོད་རྒྱུ། ཕྱོགས་ཡོངས་ཀྱི་གནས་ཚུལ་མ་ཤེས་པ་ (Ignorance) དང་དངོས་ཡོད་གནས་ཚུལ་མི་ཤེས་པ་དེ་ཚོ་ཡིན་སྐོར་བརྗོད་ཀྱི་འདུག ངས་ཆེད་ལས་པ་ཡིན་ཟེར་ནས་ལག་ཤེས་དང་སྦྱོང་བརྡར་ཞེ་དྲག་ཡག་པོ་ཡོད་ནའང་རྩ་བའི་ལྷག་བསམ་དང་ཕྱོགས་ཡོངས་ཀྱི་ལྟ་ཚུལ་དེ་འདྲ་མེད་པ་ཡིན་ན་གྱོང་རག་རྒྱུ་རེད།  ཕྱོགས་ཡོངས་ཀྱི་གནས་ཚུལ་ལ་ལྟ་ཐུབ་པ་ཞིག་ཡོང་བར་སངས་རྒྱས་པའི་ལྟ་གྲུབ་རྟེན་ཅིང་འབྲེལ་བར་བྱུང་བ་ཞེས་གསུང་བཤད་ནང་བཤད་ཡོད། ང་ཚོ་ནང་པ་སངས་རྒྱས་པ་ཚོས་རྒྱ་ཆེན་པོའི་ཐོག་ནས་ལོ་སྟོང་ཕྲག་རིང་ལ་རྟེན་ཅིང་འབྲེལ་བར་བྱུང་བ་ཟེར་བ་དེ་ཤོད་ཀྱི་ཡོད། དེ་ཚོ་ང་ཚོ་མི་སུ་འདྲ་ཞིག་ལའང་རྟེན་ཅིང་འབྲེལ་བར་བྱུང་བ་ཟེར་བ་དེ་ཤེས་ན་དེ་ཆོས་ཀྱི་སྐད་ཆ་ཙམ་མིན་པར་དངོས་ཡོད་གནས་ཚུལ་རྟོགས་རྒྱུར་ལྟ་སྟངས་དེ་འདྲ་ཞིག་བྱུང་ན་ཕན་ཐོགས་ཧ་ཅང་ཆེན་པོ་ཡོད་པས་ཁྱེད་ཚོས་དོ་སྣང་བྱེད་པ་ཡག་པོ་རེད། མདོར་ན། ངོས་ཀྱིས་ཁྱེད་ཚོར་བརྗོད་དོན་རིམ་པ་དང་པོ་དེ་བོད་པ་གཅིག་ཡིན་པའི་ངོས་ནས་སོ་སོར་སྤོབས་པ་བྱེད་དགོས་པ་ལས་ང་བོད་པ་སྐྱབས་མེད་མགོན་མེད་ཡིན་བསམ་ནས་ཞུམ་སྡོད་རྒྱུ་མེད། བོད་པ་ཞེས་དུས་ཡུན་ལོ་སྟོང་ཕྲག་རིང་ནས་ལོ་རྒྱུས་ཡོད་པ། དངོས་གནས་དབུས་ཨེ་ཤི་ཡའི་བྱས་རྗེས་ཡོད་པའི་མི་རིགས་ཤིག་ཡིན་བསམ་པ། འདས་པའི་ལོ་ ༦༠ ནང་བོད་པའི་ཞབས་འདྲེན་ཞུས་མེད། བོད་པས་རང་ཚུགས་ཟིན་ནས་བསྡད་པ་དེ་ཤེས་པའི་ཐོག་ནས་སོ་སོར་སྤོབས་པ་བྱ་རྒྱུ་དེ་གལ་ཆེན་པོ་རེད། དེ་ནས་ང་ཚོ་བཙན་བྱོལ་ནང་ཡོད་པ་ཚོ་རང་དབང་ལུང་པའི་ནང་བསྡད་ཡོད། ང་ཚོར་རང་དབང་གི་གོ་སྐབས་ཡོད། རང་དབང་ཡོད་དུས་ལས་རིགས་གང་དང་གང་བྱས་ཀྱང་སོ་སོས་འཇོན་ན་གོ་སྐབས་ཡོད། ཁྱེད་རང་ཚོ་སྤྱི་ཚོགས་ནང་ནས་འབད་བརྩོན་དང་ལམ་ལྷོང་བཅས་ཕྱོགས་མང་པོའི་ཐོག་ནས་ཤེས་ཡོན་ཡོད་མཁན་གཏེ་པོའི་ནང་ནས་གཟུགས་བཟང་ཆགས་ཡོད། ཇི་ཙམ་གྱི་སོ་སོའི་ངོས་ནས་བྱེད་ཐུབ་རྒྱུའི་གོ་སྐབས་ཡོད་པ་དེ་ཚོད་ཀྱིས་ལས་འགན་ཞིག་ཆགས་ཀྱི་ཡོད། གཞིས་ཆགས་ནང་སྐྱོ་པོ་ཡིན་མཁན་ཚོར་ལྷག་བསམ་དང་སེམས་ཤུགས་ཡོད་ནའང་བྱ་རྒྱུ་གང་ཡང་མེད། ཁྱེད་རང་སོ་སོའི་འགྲོ་སྟངས་གང་ལ་གང་ཙམ་ཧྲ་ཏག་ཏག་ཆགས་ནས་ཏོག་ཙམ་ལས་ཀ་བྱེད་ཐུབ་རྒྱུའི་ཆ་རྐྱེན་ཡོད་པའི་སྐབས་དེར་སོ་སོའི་འགན་དེ་མ་བརྗེས་པ་བྱེད་དགོས། སོ་སོ་རང་མགོ་གང་ཐོན་བྱས་ན་གཞིས་ལུས་རྒྱ་ཆེའི་མི་མང་ང་ཚོར་རེ་བ་བྱས་ནས་སྡོད་མཁན་ཚོས་གང་དྲན་གྱི་རེད། བོད་མི་བཙན་བྱོལ་བ་དེ་ཚོས་བོད་སྤྱི་པའི་དོན་དུ་བསམ་བློ་གང་ཡང་གཏོང་གི་མི་འདུག རང་མགོ་གང་ཐོན་བྱས་ནས་འགྲོ་གི་འདུག་བསམས་དྲན་པ་ཡིན་ན་ཁོང་ཚོ་བློ་ཕམ་ཡོང་རྒྱུ་རེད། ལས་རྒྱུ་འབྲས་ལ་ཆ་བཞག་པ་ཡིན་ནའང་མ་འགྲིག་པ་རེད། ང་ཚོ་བཙན་བྱོལ་བར་ཆ་བཞག་པ་ཡིན་ནའང་ང་ཚོ་བཙན་བྱོལ་བ་མང་པོ་ཞིག་དཀའ་ངལ་ནང་གནས་ཡོད་པ་མ་གཏོགས་གྲ་སྒྲིག་པ་གང་ཡང་མེད། དེ་ཚོ་ཤེས་པ་བྱས་ནས་ཁྱེད་རང་ཚོར་དམིགས་བསལ་འགན་ཞིག་ཡོད་བསམ་པ་བྱས་ཏེ་འགན་དེ་ཁྱེར་ནས་དངོས་སུ་ལག་ལེན་བྱ་རྒྱུ་གང་ཡོད་བརྗོད་ན་གོང་དུ་ཁྱེད་རང་ཚོའི་འཆར་གཞི་བཀོད་པ་དེ་དག་ཧ་ཅང་ཡག་པོ་འདུག ཁྱེད་རང་ཚོས་སྤྱི་ཚོགས་ནང་ཕན་པ་ཞིག་བྱེད་རྒྱུ། ཡིན་གཅིག་མིན་གཅིག་བཙན་བྱོལ་ནང་སྡོད་མི་དགོས་པར་འཛམ་གླིང་ས་ཆ་གང་སར་བོད་པའི་མིང་བཟོ་རྒྱུ་དང་མིང་ཐོན་རྒྱུ་ལྟ་བུ་གང་བྱེད་རྒྱུ་འདུག དེ་བཞིན་དཔལ་འབྱོར་ནང་ལས་ཀ་བྱེད་ཐུབ་པ་ཡོད་ན་ཁྱེད་རང་ཚོས་ག་ལེར་ག་ལེར་བོད་པ་ས་ཡའི་བདག་པོ་དེ་འདྲ་ཡོང་དགོས་པ་རེད། དེ་ཞེ་དྲག་གལ་ཆེན་པོ་ཡིན། དངུལ་མེད་ན་བྱ་རྒྱུ་གང་ཡང་མེད། ངོས་ཀྱིས་དུས་རྒྱུན་རྩེད་མོ་དང་སྦྲགས་ནས་ཤོད་ཀྱི་ཡོད། བོད་པར་ནོར་ལྷ་ཛམ་བྷ་ལ་སོགས་ཡོད་ནའང་བོད་པ་ས་ཡ་བདག་པོ་དེ་འདྲ་གཅིག་ཀྱང་མཐོང་རྒྱུ་མེད། རྒྱ་མི་གུང་ཁྲན་ལ་ནོར་ལྷ་མེད་ཀྱང་ས་ཡ་བདག་པོ་འདུག ཕྱི་རྒྱལ་བ་ཚོའང་དེ་བཞིན་རེད། ང་ཚོ་བོད་པ་ཚོར་ཛམ་བྷ་ལ་གྲོད་པ་ལུག་པ་དེས་ལྷ་ཁོང་རང་ས་ཡ་བདག་པོ་ཡིན་ན་མ་གཏོགས་ང་ཚོ་ས་ཡ་བདག་པོ་བཟོ་ཐུབ་ཀྱི་མེད། དེར་བརྟེན་དཀའ་ལས་བརྒྱབ་ནས་དངུལ་བཟོ་དགོས་པ་རེད་མ་གཏོགས་ལྷ་གསོས་ནས་དངུལ་བཟོ་ཐུབ་ཀྱི་མེད་པས་ཁྱེད་རང་ཚོས་བྱེད་ཐུབ་ན་སྐྱག་རྫུན་དང་ཧམ་པ་མིན་པར་དྲང་པོ་དྲང་ཤག་ཐོག་ནས་སོ་སོས་ངོས་ནས་ཀམ་པ་ནི་ (Company)  བཟོ་འདྲ་པོ་དེ་འདྲ་བཙུགས་ནས་ག་ཚོད་ཐུབ་ཐུབ་ཀྱི་ཡར་རྒྱས་གཏོང་ཐུབ་པ་བྱུང་ན་ཡག་པོ་རེད། ཉེ་ལམ་གཞིས་ཆགས་སུ་རྒྱལ་ཁབ་ ༡༣ གྱི་ཕྱི་རྒྱལ་སྐུ་མགྲོན་འགའ་ཤས་བསླེབས་ཡོད།  སྐབས་དེར་ངོས་ནས་ཁོང་ཚོར་ང་ཚོ་གཞིས་ཆགས་ཀྱི་ས་ཞིང་དེ་ཚོ་ཕྱི་ལོ་ ༡༩༦༠ ཙམ་ནས་གཏན་འཁེལ་བ་རེད། རྒྱ་གར་ནང་ས་ཆ་མེད་མཁན་སྐྱོ་པོ་མང་པོ་ཡོད་པའི་གནས་སྟངས་འོག་ང་ཚོས་རྒྱ་གར་གཞུང་ལ་ས་ཆ་རྒྱ་སྐྱེད་གཏོང་རོགས་བརྗོད་རྒྱུ་ཁག་པོ་ཆགས་ཡོད། ང་ཚོར་ས་ཆ་ཏོག་ཙམ་ཡོད་པ་དེ་བེད་སྤྱོད་བྱས་ནས་འཆར་ཅན་གྱི་ཞིང་ལས་ཁོ་ན་མིན་པར། ཞིང་ལས་དེ་ཡང་ཨ་ཤོམ་ལྟ་བུ་སོ་སོ་བཟའ་རྒྱུ་དང་ཚོང་རྒྱུ་ཙམ་མིན་པར་ཐོན་སྐྱེད་དེ་དག་རིན་གོང་ཆེ་ཙམ་གྱི་ཐོན་སྐྱེད་བྱེད་རྒྱུ་དང་། དེ་བཞིན་ལག་ཤེས་ཟོ་གྲྭ་ཆུང་ཆུང་དེ་འདྲ་བཙུགས་ཏེ་དཔལ་འབྱོར་ཡར་རྒྱས་གཏོང་རྒྱུའི་ཐབས་ཤེས་བྱས་ཡོད་སྐོར་ངོས་ཀྱིས་སྐུ་མགྲོན་ཚོར་བརྗོད་ཡོད། ཁོང་ཚོས་ཀྱང་དོ་སྣང་ཞེ་དྲག་གནང་བཞིན་འདུག འཆར་གཞི་ཏོག་ཙམ་ང་ཚོར་ཡོད། ད་དུང་འཆར་གཞི་བཟོས་ནས་ཁོང་ཚོར་འབོད་སྐུལ་བྱས་ནས་ཤུགས་མ་བརྒྱབ་པར་ལོ་སུམ་ཅུ་བཞི་བཅུ་འཆར་ཅན་བྱས་ནས་བསྡད་ན་ཁག་པོ་ཞེ་དྲག་རེད།  ང་ཚོ་བཙན་བྱོལ་ལ་ཡོད་མཁན་བོད་པའི་སྤྱི་ཚོགས་དཔལ་འབྱོར་ཧྲ་ཏག་ཏག་ཡོང་རྒྱུ་དང། དེ་བཞིན་ཤེས་ཡོན་ཐོག་ལ་ཡིན་ནའང་གཞི་རྩ་ཡག་ཐག་ཆོད་བཙུགས་ཡོད། ད་དུང་ཡར་རྒྱས་གཏོང་རྒྱུ་དང། དགོན་པ་ཁག་དེ་ཚོ་མང་ཆེ་བ་ཡག་པོ་ཡོད་པའི་བཟོ་འདྲ་པོ་འདུག དེའི་ཐོག་ཚན་རིག་སློབ་སྦྱོང་བྱེད་རྒྱུ་དང་བསམ་བློ་རྒྱ་ཆེ་རུ་དང་གུ་ཡངས་སུ་གཏོང་རྒྱུ་དེ་རྟག་པར་འབོད་སྐུལ་བྱེད་བཞིན་ཡོད་ལ་ང་ཚོས་ཚན་རིག་གི་སློབ་དེབ་དེ་འདྲ་བཟོ་རྒྱུའི་འཆར་གཞི་ཡོད། སྤྱིར་བཏང་ཡག་ཐག་ཆོད་རེད། ད་རེས་ངོས་རང་ལྷོ་ཕྱོགས་དགོན་པར་བསླེབས་པ་རེད། དགེ་འདུན་པ་གྲངས་སྟོང་ཕྲག་བཞི་ལྔ་ཡོད་པའི་ནང་སློབ་གཉེར་གནང་མཁན་ཧ་ལམ་སྟོང་ཕྲག་གསུམ་ཙམ་ཡོད་ཚོད་འདུག ཧྲ་ཏག་ཏག་འདུག   ཁོང་ཚོས་རང་དོན་རང་གཅེས་གནང་བ་རེད། ད་ཆ་ང་ཚོས་ཕྱོགས་ཡོངས་ནས་དཔལ་འབྱོར་དང་ཤེས་ཡོན་གང་ཅིའི་ཐོག་ནས་ཡར་རྒྱས་གཏོང་རྒྱུར་ཕྱར་བ་གྲུ་འདེགས་ཁུར་མཉམ་ལེན་བྱེད་རྒྱུ་དེ་གལ་ཆེན་པོ་འདུག ཁྱེད་རང་ཚོ་ས་ཆ་ག་པར་ཡོད་པ་ཡིན་ནའང་བོད་པ་ཟེར་བའི་མིང་ཞིག་ཡོད་སྟབས་དེ་དང་འབྲེལ་བའི་བོད་པའི་ཡ་རབས་ཀྱི་གཤིས་ཀ་དེ་སྟོན་ཐུབ་པ་དགོས། བོད་པའི་མིང་འཁྱེར་ནས་མ་རབས་གཡོ་སྒྱུ་ཅན་ཐ་ཤལ་གྱི་ལས་ཀ་བྱས་ན་བོད་པ་ཟེར་མཁན་དེ་མ་རབས་འདུག་ཅེས་བརྗོད་ཀྱི་རེད། དེ་སེམས་ལ་བཞག་ནས་གཟབ་གཟབ་བྱེད་རོགས། བཀྲ་ཤིས་བདེ་ལེགས། ཞེས་བཀའ་སློབ་ཕེབས་ཡོད།།