༢༠༡༠ ཟླ་ ༩ ཚེས་ ༢༨ རེས་གཟའ་མིག་དམར།

༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༥ རེས་གཟའ་སྤེན་པའི་ཉིན་སུད་སིའི་གྲོང་ཁྱེར་ཛུ་རིག་གི་བོལ་ཧའོ་སིའི་ (Volkshaus Zurich) ནང་སུད་བོད་མཛའ་འགྲེལ་ཚོགས་པས་ (Swiss Tibetan Friendship Association) གོ་སྒྲིག་འོག བོད་འཛམ་གླིང་གི་སྣེ་གསུམ་པ། ཞེས་པའི་བརྗོད་གཞིའི་ཐོག་བོད་ཀྱི་གནམ་གཤིས་འགྱུར་ལྡོག་དང་དེས་ད་ལྟའི་དུས་སྐབས་སུ་རྗེས་འབྲས་ཇི་བྱུང་སྐོར་བགྲོ་གླེང་ཚོགས་འདུ་ཞིག་ཚོགས་འདུག ཆུད་ཚོད་གཉིས་ཙམ་རིང་ཁོར་ཡུག་དང་འབྲེལ་བའི་ཚོགས་འདུ་དེའི་ཐོག་མར་སུད་བོད་མཛའ་འགྲེལ་ཚོགས་པའི་ཚོགས་གཙོ་བཀྲ་ཤིས་སྟག་ཚང་ལགས་ཀྱིས་ཚོགས་བཅར་བ་རྣམས་ལ་ཕེབས་བསུའི་གསུང་བཤད་གནང། དེ་རྗེས་བཙན་བྱོལ་བོད་གཞུང་ཕྱི་དྲིལ་ཁོར་ཡུག་ཚན་པའི་འགན་འཛིན་སྐུ་ཞབས་བསྟན་འཛིན་ནོར་བུ་ལགས་ནས་བོད་ཀྱི་ཁོར་ཡུག་གནས་སྟངས་དང་འབྲེལ་བའི་ངོ་སྤྲོད་གསུང་བཤད་གནང་གྲུབ་བསྟུན་ཇར་མན་བོད་དོན་རྒྱབ་སྐྱོར་བ་མཁས་དབང་སྐུ་ཞབས་ཡུ་བེ་མེ་ཡ་ (Dr Uwe Meya) ལགས་ཀྱིས་གཙོ་སྐྱོང་འོག་བགྲོ་གླེང་དངོས་གཞི་འགོ་འཛུགས་གནང་འདུག སྐབས་དེར་ཚོགས་བཅར་བ་གྲངས་ ༤༥ ཕེབས་པ་ཚང་མས་དོ་སྣང་ཆེན་པོས་དོགས་འདྲི་དང་བསམ་ཚུལ་བརྗེས་ལེན་ལྷུག་པོ་གནང་འདུག ཚོགས་འདུའི་སྐབས་རྒྱལ་སྤྱིའི་ཁོར་ཡུག་ཆེད་ལས་པ་སྐུ་ཞབས་ཨེ་ལེ་སི་མི་ཤེ་ལོ་ཝ་ (Alex Michaelowa) ལགས་དང། སྐུ་ཞབས་བསྟན་འཛིན་གམ་མི་ཊར་ (Tensing Gammeter) ལགས་བཅས་ཀྱང་མཉམ་ཞུགས་གནང་འདུག