༢༠༡༠ ཟླ་༩ ཚེས་༢༨ རེས་གཟའ་མིག་དམར།
༅༅། །འདི་གར་ལྡི་ལི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ཟླ་༩ ཚེས་༢༠ ཉིན་གྱི་སྔ་དྲོ་ནས་བཟུང་ད་བར་ལྡི་ལིའི་བོད་སྒར་བསམ་ཡས་གླིང་དང་བྷོཌ་ཝི་ཧར་ས་གནས་སོགས་སུ་ཆུ་ལོག་དང་དྲག་ཆར་བབ་སྟེ་གནོད་སྐྱོན་ཚབས་ཆེན་བྱུང་ནས་བྷོཌ་ཝི་ཧར་བོད་གཞུང་ཡན་ལག་སྣེ་ལེན་ཁང་དང། བོད་སྒར་བསམ་ཡས་གླིང་གཞིས་ཀེམ་རྙིང་པའི་དུད་ཚང་༦༠ ཐམ་པའི་སྡོད་ཁང། གཞིས་ཀེམ་གསར་པའི་སྡོད་ཁང་རེ་ཟུང། བྷོཌ་ཝི་ཧར་ཁུལ་གྱི་མི་མང་རྣམས་ཀྱི་སྡོད་ཁང་ཡོངས་རྫོགས། ཁྲོམ་ས་ཡོད་མཁན་རྣམས་ཀྱི་ཚོང་ཁང་སོགས་ཆུས་ཁེངས་ཏེ་ཅ་དངོས་རིགས་ཆུར་བྱིང་ནས་འཕྲོ་བརླག་ཕྱིན་པ། ལྡི་ལིའི་ས་གནས་འགོ་འཛིན་ལས་ཁུངས་ཀྱི་ལས་བྱེད་རྣམས་ལ་སྡོད་ཁང་དཀྱུས་མ་ཞིག་ལས་མེད་སྟབས་ཁང་པ་ཆུས་ཁེངས་ཏེ་ཅ་དངོས་ཕལ་མོ་ཆེ་འཕྲོ་བརླག་ཏུ་ཕྱིན་ཡོད། གྲོང་མི་རྣམས་སྡོད་ས་མ་རག་པར་མགྲོན་ཁང་དང་སྐམ་ས་ཡོད་པའི་ཁང་པ་སོགས་ལ་འཚང་ཀ་བརྒྱབ་ནས་བསྡད་ཡོད། དེ་བཞིན་ས་གནས་བོད་ཁྱིམ་ཉིན་སློབ་ཀྱི་ཚོགས་ཁང་ནང་གནས་སྐབས་རིང་སྡོད་ཐབས་
བྱེད་བཞིན་ཡོད་ཀྱང་དུག་སྦྲང་གི་གནད་གཞི་འགོ་བ་དང་ཆུ་དང་གློག་སོགས་མེད་པའི་དཀའ་ངལ་རབ་དང་རིམ་པ་འཕྲད་བཞིན་ཡོད། ལྡི་ལིའི་ས་གནས་འགོ་འཛིན་ལས་ཁུངས་ཀྱི་གནས་བབ་ལ་གཞིགས་ཏེ་ཛ་དྲག་རོགས་རམ་དང་གནོད་སེལ་གྱི་ལས་དོན་ཆེན་པོ་རིགས་གང་ཡང་བྱ་ཐབས་མེད་ཀྱང། བོད་སྒར་བསམ་ཡས་གླིང་དང་བྷོཌ་ཝི་ཧར་བཅས་སུ་རྟོག་ཞིབ་དང་། ས་གནས་ཀྱི་ཚོགས་སྐྱིད་ཁག་དང་བརྒྱ་འཐུས་ལས་ཁུངས་བཅས་ལ་མི་མང་རྣམས་ཀྱི་ཅ་དངོས་སོགས་སྐམ་སར་དབོར་རྒྱུ་དང་ཕན་ཚུན་རོགས་སྐྱོར་ཅི་ནུས་བྱ་དགོས་སྐོར་ལམ་སྟོན་སོགས་གང་ཐུབ་གནང་ཡོད། དེ་བཞིན་རྒྱ་གར་ས་གནས་ཀྱི་འཐུས་མི་(MLA Pralad Singh Sawney) མཆོག་གིས་ས་གནས་སུ་གཟིགས་སྐོར་གནང་སྟེ་ཉིན་ཤས་རིང་ཞལ་ལག་གནང་རྒྱུ་དང་མ་འོངས་པར་བཙོག་ཆུ་བརྒྱུག་སའི་ཡུར་བ་གསར་བཟོ་བྱ་རྒྱུའི་ཁས་ལེན་ཡང་གནང་ཡོད། གཞན་ཡང་ཕྱི་ལོ་༢༠༡༠ ཟླ་༩ ཚེས་༢༣ ཉིན་བཀའ་བློན་བསྟན་པ་ཚེ་རིང་མཆོག་དང། ལྡི་ལི་དོན་ཁང་གི་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་ས་གནས་སུ་གཟིགས་སྐོར་ཕེབས་པར་གཞིས་མི་རྣམས་དགའ་སྤྲོ་ཚད་མེད་སྐྱེས་ཡོད། ཕྱིས་སུ་ཆུ་རྣམས་སྐམ་རྗེས་ནད་རིགས་འདྲ་མིན་ཡོང་བའི་ཉེན་ཁ་ཆེན་པོ་ཡོད་པར་བརྟེན་རང་གཞུང་ནས་མི་མང་རྣམས་ཀྱི་ཅ་དངོས་འཕྲོ་བརླག་ཕྱིན་པ་རྣམས་ཀྱི་ཆེད་གུན་གསབ་ཕྲན་བུ་ཞིག་གནང་ཐབས་དང་ནད་རིགས་སྔོན་འགོག་དང་བཅོས་ཐབས་ཆེད་དགོངས་བཞེས་ཡོང་བ་ཞུ་རྒྱུ་དང། ད་བར་ས་གནས་མི་མང་རྣམས་ཀྱི་ཚེ་སྲོག་ལ་གནོད་སྐྱོན་གང་ཡང་བྱུང་མེད། ཐེངས་འདིར་ལྡི་ལི་ས་གནས་འགོ་འཛིན་ལས་ཁུངས་ནས་དོ་སྣང་དང་གཟབ་ནན་གང་ཐུབ་གནང་བཞིན་ཡོད་འདུག་པ་བཅས།།
