༢༠༡༠ ཟླ་ ༩ ཚེས་ ༡༥ རེས་གཟའ་ལྷག་པ།

༄༅། །རྡ་སར་རྟེན་གཞི་བྱས་པའི་བོད་ཀྱི་དཔེ་མཛོད་ཁང་དང་ལྷོ་ཨ་མི་རི་ཀའི་གླིང་ཆེན་གྱི་རྒྱལ་ཁབ་བྷ་རཱ་ཛིལ་རྒྱལ་ས་སྭ་པོ་ལོའི་ནང་རྟེན་གཞི་བྱས་པའི་སྭ་པོ་ལོ་དབུས་གཙུག་ལག་སློབ་ཁང་ (Federal University of Sao Polo) གཉིས་དབར་ཕྱོགས་གཉིས་ཀའི་མོས་མཐུན་ཡོད་པའི་ཉམས་ཞིབ་ཀྱི་ལས་གཞི་དང་། ཚན་རིག་གཙོ་གྱུར་གྱི་ཤེས་ཡོན་གོ་རྟོགས་སྤེལ་རྒྱུ་དང་བརྗེ་ལེན་གནང་རྒྱུའི་གྲོས་མཐུན་ལ་མཚན་རྟགས་བཀོད་འདུག དེ་ཡང་སྭ་པོ་ལོ་དབུས་གཙུག་ལག་སློབ་ཁང་གི་རིགས་བདག་སྐུ་ཞབས་ཝལ་ཊར་མ་ནཱ་ཨལ་བྷར་ཊོ་ནི་ (Walter Manna Albertoni) ལགས་དང་རྡ་ས་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་གཉིས་ཀྱིས་གཙུག་ལག་སློབ་ཁང་དེ་གཉིས་དབར་གྱི་གྲོས་མཐུན་དེར་མཚན་རྟགས་བཀོད་ཡོད། གྲོས་མཐུན་དེའི་འོག་ཤེས་ཡོན་བསྟི་གནས་ཁང་གཉིས་དབར་འབྲེལ་ཡོད་མི་སྣ་དང་ཉམས་ཞིབ་པ། སློབ་ཕྲུག་བཅས་སྐབས་མཚམས་དགོས་མཁོ་དང་བསྟུན་ནས་གཏོང་ལེན་གནང་རྒྱུ་མ་ཟད། ཟུང་འབྲེལ་ཐོག་ཚན་རིག་གཙོ་གྱུར་གྱི་ཤེས་ཡོན་དང་འབྲེལ་བའི་ལས་གཞི་ཁྱབ་སྤེལ་དང་ཕྱོགས་གཉིས་ཀའི་མོས་མཐུན་ཡོད་པའི་ཉམས་ཞིབ་ཀྱི་ལས་རིགས་ཐོག་ཐུན་མོང་གིས་ལས་འཆར་བཀོད་སྒྲིག་གནང་རྒྱུ་དང་། ལས་རིགས་དེ་དག་ལ་གཞི་བཅོལ་བའི་གྲུབ་འབྲས་ཇི་བྱུང་ཐུན་མོང་གིས་དྲིལ་བསྒྲགས་གནང་རྒྱུ་ཡིན་སྐོར་སོགས་འཁོད་ཡོད། ལས་འཆར་དེ་ཐོག་མར་ཕྱི་ལོ་ ༢༠༠༦ ཟླ་ ༡༡ ནང་བཙན་བྱོལ་བོད་གཞུང་ལྷོ་ཨ་རིའི་འབྲེལ་མཐུད་པ་སྐུ་ཞབས་ཚེ་དབང་ཕུན་ཚོགས་ལགས་ཀྱིས་མགྲོན་འབོད་ཞུས་པ་ལྟར་རྡ་ས་བོད་ཀྱི་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་བྷ་རཱ་ཛིལ་ནང་ཕེབས་ཏེ་འགོ་འཛུགས་གནང་འདུག

བཙན་བྱོལ་བོད་གཞུང་ལྷོ་ཨ་མི་རི་ཀའི་འབྲེལ་མཐུད་པ་སྐུ་ཞབས་ཚེ་དབང་ཕུན་ཚོགས་ལགས་དང་གཙུག་ལག་སློབ་དཔོན་དང་སྭ་པོ་ལོའི་ནང་རྟེན་གཞི་བྱས་པའི་ (Palas Athena Association) ཞེས་པའི་ཚོགས་པ་དེའི་གཙོ་སྐྱོང་བ་སྐུ་ཞབས་ལི་ཡཱ་ཌི་སི་ཀིན་ (Lia Diskin) ལགས་གཉིས་ཀྱིས་ཤེས་ཡོན་བསྟི་གནས་གཉིས་དབར་གྲོས་མཐུན་དེ་འདྲ་ཞིག་འཇོག་ཐུབ་པར་མཐུན་འགྱུར་གནང་འདུག་པ་བཅས།།