༢༠༡༠ ཟླ་ ༩ ཚེས་ ༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༦ ཉིན་རྡ་ས་བོད་ཀྱི་དཔེ་མཛོད་ཁང་དུ་ལྡི་ལིར་རྟེན་གཞི་བྱས་པའི མདུན་བཟང་ལམ་སྟོན་ལས་རིམ་(Empowering the vision Project) ཞེས་པའི་གཞུང་འབྲེལ་མ་ཡིན་པའི་ཚོགས་པས་གོ་སྒྲིག་ཐོག་རྒྱལ་སྤྱིའི་བོད་མིའི་ཁྱད་ལས་པའི་ཚོགས་ཆེན་ཐེངས་དང་པོ་ཚོགས་ཡོད། དེ་ཡང་ཕྱི་ཚེས་ ༦ ནས་ ༨ བར་ཉིན་གསུམ་རིང་གི་ཚོགས་འདུའི་དབུ་འབྱེད་ཀྱི་མཛད་སྒོའི་ཐོག་བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་དང་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག ཕྱི་ལོ་ ༢༠༢༠ རྒྱ་གར་གྱི་འཆར་སྣང་ཞེས་པའི་ (India Vision 2020) དཔེ་དེབ་ཀྱི་རྩོོམ་པ་ པོ་དང་ཚན་རིག་པ་སྐུ་ཞབས་ཝ་ཡེ་ཨེས་ར་ཇན་ (Y.S Rajan)ལགས། དེ་བཞིན་ཨ་རི་དང་། ཁེ་ཎ་ཌ། སུད་སི། ཇར་མན་ནི། བལ་ཡུལ། ཝེ་ཏི་ནམ་བཅས་ནས་ཁྱོན་ཁྱེད་ལས་མི་གྲངས་ ༢༠ ཙམ་མཉམ་བཞུགས་གནང་ཡོད་པ་མ་ཟད། རྒྱ་གར་གྱི་ས་གནས་སྒང་ཏོག་དང་པུ་ནེ། མུམ་སྦེ་བཅས་གྲོང་ཁྱེར་ཆེ་ཁག་ནས་བོད་མི་མཁས་ལས་པ་ཁག་གཅིག་བཅས་ཁྱོན་མི་གྲངས་ ༨༥ ཙམ་དང་། དེ་བཞིན་རྡ་ས་ཁུལ་གྱི་བོད་རིགས་གསར་འགོད་པ་བཅས་ཕེབས་ཡོད།
དེ་ཡང་མཛད་སྒོའི་ཐོག་མར་ལྡི་ལི་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་གིས་ངོ་སྤྲོད་གསུང་བཤད་གནང་དོན། བོད་མིའི་སྤྱི་ཚོགས་ཡར་རྒྱས་གཏོང་སླད་ལྡི་ལི་དོན་ཁང་དང་ཐེངས་འདིའི་ཚོགས་འདུ་གོ་སྒྲིག་ཚོགས་ཆུང་གཉིས་ནས་མཉམ་རུབ་ཐོག་བོད་མི་ཁྱེད་ལས་པ་རྣམས་བསྡུ་སྐོང་བྱས་ཡོད། འདས་པའི་ལོ་ ༥༡ རིང་བོད་པའི་སྤྱི་ཚོགས་ནང་ཁྱད་ལས་པའི་ཐོག་དེ་ཙམ་ཤུགས་བརྒྱབ་ཐུབ་མེད། ཁྱད་ལས་པ་ཆགས་གྱུར་ཆ་རྐྱེན་མང་པོ་ཞིག་འཛོམས་དགོས་སྟབས་དོ་བདག་སོ་སོར་ཆ་རྐྱེན་དེ་དག་མ་འཛོམས་པར་བརྟེན་ཁྱད་ལས་པ་དེ་ཙམ་ཐོན་ཐུབ་མེད། དེ་བཞིན་ཁྱད་ལས་པ་ཡོད་བཞིན་པ་ཚོར་ཡང་ཁོང་ཚོར་རན་པའི་ལས་རིགས་སྤྲོད་ཐུབ་ཀྱི་མེད་པས། ང་ཚོའི་ཁྱད་ལས་པ་མང་པོ་ཞིག་སྤྱི་ཚོགས་གཞན་གྱི་ནང་སིམ་འགྲོ་རྒྱུའི་ཉེན་ཁ་ཡོད། དེར་བརྟེན་ལོ་ཤས་གོང་ནས་ཁྱད་ལས་པའི་བསྡུ་སྐོང་གི་ལས་གཞི་ལྡི་ལི་དོན་ཁང་ནས་སྤེལ་འགོ་བཙུགས་ཀྱང་དོན་ཁང་གི་ལས་དོན་མང་དག་ཅིག་ཡོད་རྐྱེན་མཇུག་བསྐྱལ་ཐུབ་མེད། དེ་རྗེས་ལས་གཞི་འདི་དེ་རིང་གི་ཚོགས་འདུ་གོ་སྒྲིག་གནང་མཁན་གྱི་ཚོགས་པ་དེས་འགན་བཞེས་པར་བརྟེན་ནས་ཚོགས་ཐུབ་ཡོད། ཅེས་སོགས་ཀྱི་གསུང་བཤད་གནང་རྗེས་བཀའ་ཁྲི་མཆོག་གིས་གསུང་བཤད་གནང་དོན། ཐོག་མ་དེར་བཀའ་ཤག་དང་ང་རང་སྒེར་གྱི་ངོས་ནས་ཚོགས་འདུ་འདིའི་ནང་མཉམ་ཞུགས་གནང་མཁན་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། བོད་མི་རིགས་དེ་མི་རིགས་གཞན་དང་མི་འདྲ་བ་ཞིག་ཆགས་ཡོད། བོད་ནང་སྤྱི་ཚོགས་ཀྱི་དཔལ་ཡོན་དུས་རབས་བདུན་པ་ནས་འགོ་བཙུགས་ཡོད། བསྒྱུར་གྱི་བྱུང་རབས་ནང་བོད་པ་ལྟར་མེད། གཞན་གྱི་སྐད་ཡིག་མ་ཟད། སོ་སོའི་སྐད་ཡིག་ཐོག་རྩོམ་མང་པོ་མཐོང་རྒྱུ་ཡོད་པ་དེ་དག་ཉམས་ཞིབ་བྱས་ནས་བྲིས་པ་ཞིག་རེད་མ་གཏོགས་རྨོངས་དད་ཙམ་མིན། ཁྱད་ལས་པ་ཞེས་པ་དེ་སོ་སོའི་འཚོ་བ་ཁོ་ནའིི་དོན་དུ་མིན་པར་སྤྱི་ཚོགས་ཀྱི་ཆེད་ཕྱག་ལས་གནང་རྒྱུ་གལ་ཆེན་པོ་ཡིན། སོ་སོའི་ལྟོ་གོས་དང་ཁྱིམ་གཞི་བཟོ་རྒྱུ་ནི་སྲོག་ཆགས་བྱ་བྱིའུ་སོགས་ནས་བྱེད་ཐུབ་ཀྱི་ཡོད། མིའི་སྤྱི་ཚོགས་ཀྱི་དོན་དུ་རང་བློས་བཏང་ནས་གཞན་གྱི་ཆེད་མོས་པ་དང་བསམ་ཚུལ་ཡོད་མཁན་དེར་ཁྱད་ལས་པའི་མཚན་ཉིད་ཚང་གི་ཡོད།
དངོས་ཤུགས་བརྒྱུད་གསུམ་ནས་གཞན་ལ་ཕན་པ་ནི་ཁྱད་ལས་པའི་མཚན་ཉིད་ཡིན། དེ་སྔ་ལྔ་བཅུ་ང་དགུའི་གོང་བོད་ནང་ཁྱད་ལས་པ་མང་པོ་ཞིག་ཐོན་གྱི་ཡོད། འོན་ཀྱང་དེ་རྗེས་བོད་མིའི་ཁྲོད་དུ་ཁྱད་ལས་པ་དེ་ཙམ་མཐོང་རྒྱུ་མེད་པའི་རྒྱུ་མཚན་གང་ཡིན་མིན་ཐེངས་འདིར་གྲོས་བསྡུར་དང་རྟོག་ཞིབ་བྱེད་དགོས། མཐའ་དོན་ཚོགས་འདུ་འདི་ཐེངས་གཅིག་ཙམ་མིན་པར་མུ་མཐུད་རྒྱུན་གནས་ཐུབ་པ་དགོས་ཞེས་སོགས་ཀྱི་གསུང་བཤད་གནང་ཡོད། དེ་རྗེས་ཚོགས་གཙོ་ཉི་མ་རྡོ་རྗེ་ལགས་ཀྱིས་སྐུ་ཞབས་ར་ཇན་ལགས་ངོ་སྤྲོད་མདོར་བསྡུས་ཤིག་གནང་རྗེས་སྐུ་ཞབས་ར་ཇན་ལགས་ཀྱིས་གསུང་བཤད་གནང་། ཉིན་རྒྱབ་ཏུ་ཕྱི་དྲིལ་དྲུང་འཕར་བཀྲ་ཤིས་ལགས་ཀྱིས་ཕྱི་འབྲེལ་གྱི་ཐོག་དང་། དེ་བཞིན་ཕྱི་དྲིལ་དྲུང་གཞོན་ཤེས་རབ་འོད་ཟེར་ལགས་ནས་གསར་སྒྱུར་བརྒྱུད་ལམ་གྱི་སྐོར་གསུང་བཤད་གནང་རྒྱུ་ཡིན་འདུག་པ་བཅས།།
