༢༠༡༠ ཟླ་ ༩ ཚེས་ ༣༠ རེས་གཟའ་ཕུར་བུ།
སྐུ་ཞབས་བསྟན་འཛིན་ནོར་བུ་ལགས་ཀྱིས་མཐོ་སྒང་བོད་ཀྱི་གནམ་གཤིས་དང་ཁོར་ཡུག་སྐོར་གསལ་བཤད་གནང་བཞིན་པ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༧ རེས་གཟའ་ཟླ་བའི་ཉིན་སུད་སིའི་གྲོང་ཁྱེར་ཇི་ཎི་བར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༡༥ པའི་ཚོགས་ཆེན་གྱི་ཞར་བྱུང་ཚོགས་དུས་སྐབས་ཤིག་ལ་བཙན་བྱོལ་བོད་གཞུང་ཕྱི་དྲིལ་ཁོར་ཡུག་ཚན་པའི་འགན་འཛིན་སྐུ་ཞབས་བསྟན་འཛིན་ནོར་བུ་ལགས་ནས་མཐོ་སྒང་བོད་ཀྱི་གནམ་གཤིས་སྐོར་གསུང་བཤད་གནང་དོན། འདས་པའི་ལོ་ ༤༠ ནང་མཐོ་སྒང་བོད་ཀྱི་འཁྱག་རོམ་བརྒྱ་ཆ་ ༢༠ ཙམ་བཞུར་ཡོད། ད་ལྟ་བོད་ནང་གནམ་གཤིས་ཚ་དྲོད་རྒྱས་ཚད་དེ་འཛམ་གླིང་སྤྱི་ཡོངས་ཀྱི་གནམ་གཤིས་ཚ་དྲོད་འཕར་ཚད་ལས་ལྡབ་གསུམ་ཙམ་ཆེ་བ་ཡོད། དེར་བརྟེན་མཐོ་སྒང་བོད་ཀྱི་གནམ་གཤིས་འགྱུར་ལྡོག་གི་དཀའ་ངལ་དེ་བོད་མི་ས་ཡ་དྲུག་ཙམ་མིན་པར་རྒྱ་གར་དང་རྒྱ་ནག་དེ་བཞིན་བོད་ཀྱི་ཁྱིམ་མཚེས་རྒྱལ་ཁབ་ཀྱི་མི་མང་ཐེར་འབུམ་མང་པོར་དཀའ་ངལ་འཕྲད་རྒྱུ་ཡིན། རྒྱ་ནག་གཞུང་གིས་གསང་བའི་ཐོག་ཡར་ཀླུང་གཙང་པོ་དང་འབྲི་ཆུ་དེ་བཞིན་སལ་ཝིན་རྒྱུག་ཆུ་བཅས་ལ་ཆུ་རགས་བརྒྱབ་པ་དེས་རྒྱུག་ཆུ་དེ་དག་ལ་བརྟེན་ནས་འཚོ་གནས་བྱེད་བཞིན་པའི་ཁྱིམ་མཚེས་རྒྱལ་ཁབ་ཝི་ཐི་ནམ་དང་ལའོ་སི། ཁེམ་བྷོ་ཌི་ཡ། པ་ཀི་སི་ཐན། བྷར་མ། རྒྱ་གར་བཅས་ལ་ཛ་དྲག་གི་དཀའ་ངལ་འཕྲད་ངེས་ཡིན་པ་མ་ཟད། རྒྱལ་ཁབ་དེ་དག་གི་སྐྱེ་དངོས་སྣ་མང་ལའང་དོ་ཕོག་ཤུགས་ཆེ་འགྲོ་རྒྱུ་རེད། གལ་ཏེ་རྒྱལ་སྤྱིའི་ཚོགས་པ་དང་མཐོ་སྒང་བོད་ཀྱི་ཁོར་ཡུག་ཐོག་སེམས་འཚབ་ཡོད་མཁན་རྒྱལ་ཁབ་རྣམས་ཀྱིས་བོད་ཀྱི་ཁོར་ཡུག་སྲུང་སྐྱོབ་མ་ཐུབ་ཚེ་འབྱུང་འགྱུར་ལོ་ཤས་ནང་འཐུང་ཆུ་མ་འདང་པའི་དཀའ་ངལ་ཧ་ཅང་ཆེན་པོ་འཕྲད་ངེས་ཡིན། རྒྱ་ནག་གཞུང་གིས་རྩྭ་ཐང་བདག་གཅེས་དང་ཁོར་ཡུག་སྲུང་སྐྱོབ་ལ་ཁ་གཡར་ནས་བཙན་དབང་གིས་བོད་ནང་བོད་མི་འབྲོག་ཁྱིམ་ ༧༠༠༠༠༠ ཙམ་གདོད་མའི་འབྲོག་སའི་རྩྭ་ཐང་ནས་སྤོ་བཞུད་ཀྱི་ས་ཁང་ནང་གནས་སྤོ་བྱས་འཇུག་ཡོད།
དཔེར་ན་ཉེ་ལམ་བོད་ཀྱི་པལ་ཡུལ་དང་དཀར་མཛེས་སོགས་ཀྱི་ནང་རྒྱ་ནག་གཞུང་གིས་གཏེར་དངོས་སྔོག་འདོན་བྱས་པར་ས་གནས་བོད་མི་ཚོས་ཞི་བའི་ངོ་རྒོལ་བྱས་ཡོད། སྐབས་དེར་རྒྱ་ནག་གཞུང་གི་སྐོར་སྲུང་ཉེན་རྟོག་པས་མེ་མདའ་བརྒྱབ་སྟེ་བོད་མི་འགའ་དམར་གསོད་བཏང་ཡོད་ཅེས་སོགས་ཀྱི་གསུང་བཤད་གནང། སྐུ་ཞབས་བསྟན་འཛིན་ནོར་བུ་ལགས་ཀྱིས་སྐར་མ་ ༤༠ ཙམ་གྱི་རིང་བོད་ཀྱི་ཁོར་ཡུག་སྐོར་གསུང་བཤད་གནང་སྐབས་གོ་ལའི་གནམ་གཤིས་འགྱུར་ལྡོག་ལ་བརྟེན་ནས་མཐོ་སྒང་བོད་ཀྱི་ཁོར་ཡུག་ལ་རྗེས་འབྲས་ཇི་བྱུང་དང་འབྲེལ་བའི་གཙོ་བོ་གནད་དོན་བཞིའི་ཐོག་གསུང་བཤད་གནང། དེ་ཡང་གཙོ་བོ་གནད་དོན་བཞི་པོ་ནི། ༡༽ མཐོ་སྒང་བོད་ཀྱི་འཁྱག་རོམ་ཇེ་ཉུང་དུ་འགྲོ་བཞིན་པ། ༢༽ མཐོ་སྒང་བོད་ནས་བྱུང་བའི་ཆུ་དང་ཆུ་རགས་སྐོར། ༣༽ མཐོ་སྒང་བོད་ཀྱི་བརྟན་ཆགས་འཁྱག་རོམ་ཉམས་རྒུད་འགྲོ་བཞིན་པ་དང་བོད་ཀྱི་འཁྱག་རོམ་བཞུར་པར་བརྟེན་གོ་ལའི་ཁོར་ཡུག་གནས་སྟངས་ལ་རྗེས་འབྲས་ཇི་བྱུང། ༤༽ འབྲོག་པ་རྣམས་གདོད་མའི་འབྲོག་སའི་རྩྭ་ཐང་ནས་སྤོ་བཞུད་ཀྱི་ས་ཁང་ནང་གནས་སྤོ་བྱས་འཇུག་པ་སོགས་ཡིན་འདུག ༴༴ཚོགས་འདུའི་སྐབས་ཨ་རི་དང་ཅེག་སྤྱི་མཐུན་རྒྱལ་ཁབ། སུད་སི། སྦེལ་ཇམ། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་བཅས་ནས་ཁྱོན་སྐུ་ཚབ་མི་གྲངས་ ༤༠ ཙམ་ལྷན་ཞུགས་གནང་འདུག་པ་བཅས།།
