༢༠༡༠ ཟླ་ ༩ ཚེས་ ༢༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༧ ཉིན་རྡ་ས་བོད་ཀྱི་དཔེ་མཛོད་ཚོགས་ཁང་དུ་བོད་གཞུང་ཤེས་རིག་ལས་ཁུངས་ནས་གོ་སྒྲིག་ཐོག་གཏན་ཉིན་སློབ་གྲྭ་ཁག་གི་མདུན་ལམ་སློབ་སྟོན་པའི་ཚོགས་འདུ་དང་ཟབ་སྦྱོང་ཐེངས་གཉིས་པ་དེ་དབུ་འཛུགས་གནང་ཡོད། དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་དང་། འཆར་འགོད་ལྷན་ཁང་གི་འགན་འཛིན་དཀོན་མཆོག་བརྩོན་འགྲུས་ལགས། ཤེས་རིག་གི་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་དང་མདུན་ལམ་སློན་སྟོན་པ་སྒྲོལ་དཀར་དབང་མོ་ལགས། དེ་བཞིན་ཟབ་སྦྱོང་བ་བོད་ཁྱིམ་སློབ་གྲྭ་ཁག་དང་། ཤེས་རིག་གི་མདུན་ལམ་སློབ་སྟོན་པ་བཅས་མི་གྲངས་ ༡༡ ཙམ་མཉམ་ཞུགས་ཀྱིས་ཐོག་མར་ཤེས་རིག་གི་མདུན་ལམ་སློབ་སྟོན་པ་སྒྲོལ་དཀར་དབང་མོ་ལགས་ཀྱིས་ཟབ་སྦྱོང་ངོ་སྤྲོད་གནང་མཚམས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་འདིར་འབྲེལ་ཡོད་རྣམ་པ་ཚོ་ཕེབས་པར་ཤེས་རིག་ལས་ཁུངས་དང་ང་རང་སྒེར་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་གི་ཡོད། གལ་ཆེ་ཤོས་མདུན་ལམ་སློབ་སྟོན་པའི་ལས་གཞིའི་ཐོག་རྣམ་པ་ཚོ་འཛོམས་ནས་ཉན་བཤད་བྱས་ན་དགེ་མཚན་ཞིག་ཏན་ཏན་ཡོད།
འོན་ཀྱང་དགེ་མཚན་ཆེ་ཤོས་དེ་དངོས་སུ་ཕྱག་ལས་གནང་མཁན་དེ་དག་མཉམ་དུ་འཛོམས་ཏེ་ཉམས་མྱོང་བརྗེ་ལེན་གྱི་སྒོ་ནས་དཀའ་ངལ་ལ་གདོང་ལེན་བྱེད་སྟངས་དེ་དག་སེལ་ཐབས་ཁུངས་སོ་སོས་གང་འདྲ་བྱེད་ཀྱི་ཡོད། མདུན་ལམ་སློབ་སྟོན་པ་ཚོའི་ངོས་ནས་དཀའ་ངལ་ལ་གདོང་ལེན་གནང་ཕྱོགས་ཀྱི་ཐབས་ལམ་འདྲ་མིན་ཡོང་སྲིད་སོགས་དང་། ཡང་ཁོང་གིས་གསུང་དོན། མདུན་ལམ་སློབ་སྟོན་པ་ཞེས་པ་རྒྱལ་ཁབ་གཞན་ལ་ལུགས་སྲོལ་ཡོད་པ་ལྟར་ང་ཚོས་ཀྱང་དཔེ་བླངས་ས་ཚིག་ཙམ་ལས་དོན་ལ་མི་སླེབས་མཁན་དེ་འདྲ་མིན་པར་ང་རང་ཚོའི་དགོས་མཁོ་དང་འཚམས་པའི་ནུབ་ཕྱོགས་པའི་ལྟ་གྲུབ་གང་ཡོད་པའི་སྟེང་ང་ཚོའི་ཆོས་ཀྱི་གཟུགས་བརྙན་ཙམ་མེད་ནའང་ཆོས་ཀྱི་སྙིང་པོ་ཡོད་པའི་ཐོག་གནའ་དེང་ཟུང་འབྲེལ་བྱེད་ཐུབ་ན་གཞན་ལས་ལྷག་པ་ཞིག་ཡོང་ཐུབ་རྒྱུ་ངས་མཐོང་གི་ཡོད་ཅེས་སོགས་ཀྱི་གསུང་བཤད་གནང་ཡོད། དེ་ནས་མདུན་ལམ་སློབ་སྟོན་པ་བསོད་ནམས་དཔལ་མོ་ལགས་ནས་ཐུགས་རྗེ་ཆེ་ཞུས་ཡོད། དེ་ཡང་ཚེས་ ༢༧ སྔ་དྲོ་བརྗོད་གཞི་མི་འབོར་ཉམས་ཞིབ་དང་འབྲེལ་བའི་ཤེས་ཡོན་དང་ལས་གནས། འཕྲོད་བསྟེན་སྐོར་ལ་འཆར་འགོད་འགན་འཛིན་དང་ཕྱེད་ཡོལ་འདེམས་ལྷན་གྱི་འགན་འཛིན་འཇམ་དཔལ་ཆོས་བཟང་མཆོག་གིས་གསུང་བཤད་གནང་ཡོད། ཚེས་ ༢༨ ཉིན་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ངོ་སྤྲོད་སྐོར་ལ་ཤེས་རིག་དྲུང་ཆེས་གསུང་བཤད་གནང་རྒྱུ་དང་། ཚེས་ ༢༩ ཉིན་ཤེས་རིག་གི་སློབ་ཡོན་དང་རིགས་གཅིག་རྐང་འཛིན་གལ་ཆེའི་སྐོར་ལ་ཤེས་རིག་གི་མདུན་ལམ་སློབ་སྟོན་པས་གསུང་བཤད་གནང་རྒྱུ་དང་། ཕྱེད་ཡོལ་ཕྱི་དྲིལ་དྲུང་འཕར་བཀྲ་ཤིས་ལགས་ཀྱིས་དབུ་མའི་ལམ་གྱི་སྐོར་ལ་གསུང་བཤད་གནང་རྒྱུ། ཚེས་ ༣༠ ཉིན་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་སེམས་དང་སེམས་འབྱུང་། དེ་བཞིན་བློ་སྦྱོང་ཚིགས་བརྒྱད་མའི་སྐོར་ལ་གསུང་བཤད་གནང་རྒྱུ་དང་། ཚེས་ ༣༠ ཉིན་བཀའ་ཁྲི་མཆོག་གིས་མི་ཚེ་དོན་དང་ལྡན་པའི་སྐོར་ལ་གསུང་བཤད་གནང་རྒྱུ་ཡིན་འདུག་པ་བཅས།
