༢༠༡༠ ཟླ་ ༩ ཚེས་ ༣༠ རེས་གཟའ་ཕུར་བུ།

༅༅། །ཕྱི་ལོ་ ༢༠༡༠ ཟླ་ ༩ ཚེས་ ༡༡ དང་ ༡༢ ཉིན་གཉིས་རིང་ཕ་རན་སི་དོན་གཅོད་ལས་ཁུངས་ཀྱི་གོ་སྒྲིག་འོག་ཕ་རན་སི་རྒྱལ་ས་པཱ་རི་སིའི་སྐྱེད་མོ་ཚལ་ Bois de Vincennes དུ་བོད་དང་ཧི་མཱ་ལ་ཡའི་རི་རྒྱུད་མི་རིགས་ཀྱི་རིག་གཞུང་དུས་སྟོན་ཐེངས་བཅུ་པ་སྲུང་བརྩི་གཟབ་རྒྱས་ཞུས་འདུག སྐབས་དེར་སྐུ་མགྲོན་གཙོ་བོ་ཕ་རན་སི་གློག་བརྙན་འཁྲབ་སྟོན་པ་གྲགས་ཅན་ལྕམ་ཝེ་རོ་ནིཀ་ཡ་ནོ་ Mrs. Veronique Jannot ཡིན་པ་དང་། དུས་སྟོན་དེར་མི་མང་ ༦༧༠༠ བརྒལ་བ་མཉམ་ཞུགས་བྱས་འདུག

དུས་སྟོན་གྱི་དབུ་འབྱེད་མཛད་སྒོའི་ཐོག་སྐུ་ཚབ་དོན་གཅོད་བཀྲ་ཤིས་དབང་འདུས་ལགས་ཀྱིས་དགའ་བསུའི་གསུང་བཤད་དང་ཆབས་ཅིག་ཉེ་ཆར་འཛམ་གླིང་གི་ཡུལ་གྲུ་མང་པོར་འབྱུང་བའི་གནོད་འཚེ་བྱུང་རྐྱེན་ཚེ་སྲོག་ཤོར་བ་དང་རྨས་སྐྱོན་ཕོག་པ་རྣམས་ལ་གདུང་སེམས་མཉམ་སྐྱེ་མཚོན་ཆེད་སྐར་མ་གཅིག་རིང་ངག་བཅད་མྱ་ངན་དང། དུས་སྟོན་གྱི་སྟངས་འཛིན་པ་ཀེ་ཐེ་རིན་སྦེ་རི་ Catherine Barry དང་ Alain Wang ཨེ་ལེན་ཝང་གཉིས་ཀྱིས་ཐེངས་འདིའི་དུས་སྟོན་འདི་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༥ ཕེབས་པར་ཆེད་དུ་བསྔོ་བ་ཡིན་ཞེས་གསུངས་ཡོད།

དེ་ཡང་སྐབས་དེར་འབྲས་སྤུངས་དགོན་པའི་དགེ་འདུན་པ་བཞིའི་རྡུལ་མཚོན་དཀྱིལ་འཁོར་ཞིག་བཞེངས་ཡོད་པ་དང། ཡུལ་དེར་གནས་སྡོད་བོད་རིགས་རྣམས་ནས་བོད་ཀྱི་རིག་གཞུང་དང་འབྲེལ་བའི་གཞས་སྣ་སོགས་ཀྱང་འཁྲབ་སྟོན་བྱས་ཡོད།

ཉིན་དང་པོར་བསོད་རྒྱལ་རིན་པོ་ཆེ་མཆོག་ནས་ནང་ཆོས་སྐོར་གསུང་བཤད་གནང་། ཉིན་གཉིས་པར་སྐུ་ཞབས་ Claude Apri ལགས་ཀྱིས་འཛམ་གླིང་མི་མང་གི་འཚོ་བ་དང་། སྲུང་སྐྱོབ། ཞི་བདེ་སོགས་ཀྱི་ཆེད་བོད་དེ་གནད་འགག་ཆེན་པོ་ཞིག་ཆགས་ཀྱི་ཡོད་སྐོར་གསུང་བཤད་གནང་ཡོད། དེ་བཞིན་ལྗང་ཁུ་ཚོགས་པའི་ཚོགས་མི་ Mr. Jean Marc Brule དང་ Mr. Antoine Gotelain གཉིས་ནས་བོད་ཀྱི་འགྲོ་བ་མིའི་ཐོབ་ཐང་དང། ཁོར་ཡུག རིག་གཞུང་གཅེས་འཛིན་གྱི་ཆེད་ཞི་བའི་འཐབ་རྩོད་བྱེད་བཞིན་པ་དེར་རྒྱབ་སྐྱོར་ཤུགས་ཆེན་ཡོད་པའི་གསུང་བཤད་ཀྱང་གནང་ཡོད། དུས་སྟོན་གྱི་མཐའ་མར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཡུན་རིང་གནས་པ་དང། འཛམ་གླིང་ཞི་བདེའི་ཆེད་སྨོན་འདུན་ཞུས་ཏེ་དུས་སྟོན་རྒྱལ་ཁའི་ངང་གྲོལ་བ་བཅས།།