༢༠༡༠ ཟླ་ ༩ ཚེས་ ༢༡ རེས་གཟའ་མིག་དམར།
༅༅། །འདི་ག་བོད་གཞུང་ཕྱི་དྲིལ་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་ནས་སུད་སི་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༩ ཚེས་ ༡༦ ནས་ ༡༩ བར་སུད་སིར་བྱ་སྤྱོད་དང་སྒྱུ་རྩལ་མཉམ་སྤྱོད་ཀྱི་ཟབ་སྦྱོང་ཐེངས་གཉིས་པ་ཡུ་རོབ་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཞུས་ཡོད། སྐབས་དེར་བོད་གཞུང་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་
འགན་འཛིན་བསྟན་འཛིན་ནོར་བུ་ལགས་ནས་ཆུ་ཚོད་གཅིག་རིང་བོད་ནང་འགྱུར་བ་འགྲོ་བཞིན་པའི་གནམ་གཤིས་དང་ཁོར་ཡུག་སྐོར་གསུང་བཤད་ཟབ་རྒྱས་གནང་སྟེ་དྲི་བ་དྲིས་ལན་ཡང་བྱས་ཡོད་པ་མ་ཟད། ཁོང་གིས་ཟབ་སྦྱོང་ཐོག་སུད་སི་དང་ཇར་མ་ནི་ནས་བོད་རིགས་གཞོན་སྐྱེས་ཉི་ཤུ་བརྒལ་བ་མཉམ་ཞུགས་བྱེད་མཁན་རྣམས་ལ་རྒྱ་ནག་གཞུང་གིས་བོད་ནང་གཉན་འཕྲང་ཆེ་བའི་འབྲོག་ཁྱིམ་བསྐྱར་འཛུགས་ཀྱི་ལས་གཞི་དང་གཏེར་ཁ་སྔོག་འདོན་གྱི་ལས་གཞི་སོགས་ཀྱི་སྐོར་ལའང་འགྲེལ་བརྗོད་གནང་ཡོད། ཡུ་རོབ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ནོར་འཛིན་ལྷ་མོ་ལགས་ཀྱིས་སྐུ་ཞབས་བསྟན་འཛིན་ནོར་བུ་ལགས་ཟབ་སྦྱོང་འདིར་དམིགས་བསལ་སྐུ་མགྲོན་དུ་ཕེབས་པར་ཕན་ཐོགས་ཆེན་པོ་བྱུང་གསུངས་བ་དང་ཆབས་ཅིག ཟབ་སྦྱོང་འདིར་མཉམ་ཞུགས་གནང་མཁན་རྣམས་ནས་ཀྱང་ཁོང་རང་འདིར་ཕེབས་པར་བསྔགས་བརྗོད་ཞུ་བཞིན་འདུག ཅེས་གསུངས་ཡོད།
དེ་བཞིན་ཟབ་སྦྱོང་དེར་མཉམ་ཞུགས་གནང་མཁན་ཚོས་གནམ་གཤིས་འགྱུར་ལྡོག་དང་རྒྱ་ནག་གཞུང་གི་སྲིད་བྱུས་ནོར་བའི་རྐྱེན་གྱི་བོད་ནང་ཁོར་ཡུག་ཉམས་ཆག་འགྲོ་བཞིན་པ་དེར་དམིགས་བསལ་གྱི་དོ་སྣང་ཆེན་པོ་བྱེད་ཀྱི་ཡོད་སྐོར་འཁོད་འདུག ཕྱི་ཚེས་ ༡༩ ཉིན་སྦེ་སེལ་དུ་གནས་པའི་བོད་རིགས་རྣམས་ནས་བསྟན་འཛིན་ནོར་བུ་ལགས་བོད་ནང་གི་འཁོར་ཡུག་གནས་སྟངས་སྐོར་གསུང་བཤད་གནང་བར་མགྲོན་འབོད་གནང་འདུག་པ་བཅས།།
