༢༠༡༠ ཟླ་ ༩ ཚེས་ ༡ རེས་གཟའ་ལྷག་པ།
སྐུ་ཞབས་རོ་ལན་ཀོ་ཤི་མཆོག་དང་བཀའ་ཁྲི་མཆོག
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༣༡ རེས་གཟའ་མིག་དམར་ཉིན་བཀའ་ཁྲི་སློབ་དཔོན་ཟམ་གདོང་རིན་པོ་ཆེ་མཆོག་ཇར་མན་མངའ་སྡེ་ཧེ་སེའི་ (Hasse) རྒྱལ་ས་ཝེ་སི་བྷ་ཌེན་ (Wiesbaden) ནང་ཕེབས་འབྱོར་སྐབས་ཇར་མན་གྲོང་ཁྱེར་ཕེ་རེང་ཕོ་ཊི་གནམ་ཐང་དུ་ཧེ་སི་མངའ་གཞུང་གི་སྣེ་ལེན་མི་སྣས་ཕེབས་བསུར་བཅར་ཡོད་པ་མ་ཟད། བཀའ་ཁྲི་མཆོག་ལ་ཧེ་སི་མངའ་གཞུང་གིས་དམིགས་བསལ་སྐུ་མགྲོན་གྱི་ཆེ་མཐོང་ཞུས་ཡོད། དེ་ཡང་བཀའ་ཁྲི་མཆོག་གནམ་ཐང་ནས་མགྲོན་ཁང་དུ་ཕེབས་སྐབས་ཧེ་སེ་མངའ་གཞུང་གི་གནད་ཡོད་མི་སྣའི་ཕེབས་འགྲོ་གོ་སྒྲིག་གནང་ཡོད་པ་མ་ཟད། བཀའ་ཁྲི་མཆོག་གི་ཕེབས་འགྲོའི་གཡས་གཡོན་དུ་ཇར་མན་ཧེ་སེའི་མངའ་གཞུང་བདེ་འཇགས་སྐོར་སྲུང་བའི་རླངས་འཁོར་ཞིག་དང་ཉེན་རྟོག་པའི་སྦག་སྦག་དྲུག་གིས་མཐའ་སྐོར་ཐོག་ཕེབས་བསུ་ཞུས་འདུག བཀའ་ཁྲི་མཆོག་ཐེངས་འདིར་ཇར་མན་ནང་ཕེབས་དོན་གཙོ་བོ་ནི་ཇར་མན་བོད་དོན་རྒྱབ་སྐྱོར་བ་སྐུ་ཞབས་རོ་ལན་ཀོ་ཤི་ (Roland Koch) མཆོག་གཞུང་གི་སྲི་ཞུའི་ལས་དོན་ནས་དགོངས་ཞུས་ཀྱིས་མཛད་སྒོར་ཕེབས་ཏེ་ཁོང་གིས་བོད་དོན་ལ་རྒྱབ་སྐྱོར་གནང་བར་གཞིས་བྱེས་བོད་མི་ཡོངས་ཀྱིས་ཚབ་ཞུས་ཏེ་ཐུགས་རྗེ་ཆེ་ཞུ་ཆེད་ཡིན་འདུག མི་གྲངས་ ༥༠༠ ཙམ་ཆེད་ཕེབས་གནང་བའི་མཛད་སྒོ་དེའི་སྐབས་ཇར་མན་སྲིད་བློན་ལྕམ་སྐུ་ཨེན་ཇེ་ལཱ་མར་ཀེལ་ (Angela Markel) མཆོག་དང་ཇར་མན་སྲིད་བློན་ཟུར་པ་སྐུ་ཞབས་ཧེལ་མུཊ་ཀོལ་ (Helmut Kohl) ཀྱང་མཉམ་ཞུགས་གནང་འདུག
དེ་ཡང་ཇར་མན་སྲིད་བློན་མཆོག་མཛད་སྒོར་ཕེབས་ཏེ་བཞུགས་གྲལ་དུ་མ་འཁོད་སྔོན་བཀའ་ཁྲི་མཆོག་ལ་མཇལ་འཕྲད་གནང་སྟེ་ཕན་ཚུན་འཚམས་འདྲི་ཞུས་ཡོད། ཕྱོགས་མཚུངས་མཛད་སྒོ་དེའི་སྐབས་བཀའ་ཁྲི་མཆོག་གིས་ཧེ་སེི་མངའ་སྡེའི་འབྱུང་འགྱུར་གྱི་སྲིད་བློན་གསར་པ་སྐུ་ཞབས་ཝོལ་ཀར་བྷོ་ཕར་མཆོག་དང་ཡང་མཇལ་འཕྲད་གནང་ཡོད།
ཇར་མན་ཧེ་སེི་མངའ་གཞུང་གིས་བཀའ་ཁྲི་མཆོག་སྣེ་ལེན་ཞུ་བཞིན་པ།
ཕྱི་ཚེས་ ༡ སྔ་དྲོ་སྐུ་ཞབས་རོ་ལན་ཀོ་ཤི་མཆོག་དང་བཀའ་ཁྲི་མཆོག ༸གོང་ས་མཆོག་གི་ཡུ་རོབ་སྐུ་ཚབ་སྐལ་བཟང་རྒྱལ་མཚན་མཆོག ཚེ་བརྟན་བསམ་གྲུབ་ཆོས་སྐྱབས་པ་བཅས་ལྷན་དུ་མཇལ་འཛོམས་གནང་ཡོད། སྐབས་དེར་བཀའ་ཁྲི་མཆོག་གིས་སྐུ་ཞབས་རོ་ལན་ཀོ་ཤི་མཆོག་ནས་ད་བར་བོད་མི་ཚོར་མཛའ་གྲོགས་ཀྱིས་འདུ་ཤེས་བཅངས་ཏེ་སེམས་ཐག་ཉེ་པོས་བོད་དོན་རྒྱབ་སྐྱོར་གནང་བར་༸གོང་ས་༸སྐྱབས་མགོན་ཆེན་པོ་མཆོག་དང་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་ཡོད་པ་དང། སྐུ་ཞབས་རོ་ལན་ཀོ་ཤི་མཆོག་ནས་ཀྱང་བཀའ་ཁྲི་མཆོག་མཛད་སྒོར་ལྷན་ཞུགས་གནང་བར་ཁོང་ལ་ཆེ་མཐོང་ཐོབ་ཡོད་སྐོར་དང་།
ཇར་མན་ཧེ་སི་མངའ་གཞུང་གིས་བཀའ་ཁྲི་མཆོག་ལ་སྣེ་ལེན་ཞུ་བཞིན་པ།
ཁོང་གིས་མ་འོངས་པར་མུ་མཐུད་བོད་དོན་རྒྱབ་སྐྱོར་གནང་རྒྱུ་ཡིན་སྐོར་གསུངས་ཡོད། སྐུ་ཞབས་རོ་ལན་ཀོ་ཤི་མཆོག་གིས་ལོ་ ༡༡ དང་ཕྱེད་ཙམ་གྱི་རིང་ཇར་མན་མངའ་སྡེ་ཧེ་སེའི་སྲིད་བློན་གནང་སྐབས་ཧེ་སི་མངའ་སྡེ་དང་བོད་གཉིས་དབར་འབྲེལ་བ་དམིགས་བསལ་ཞིག་ཆགས་ཡོད། ཁོང་ནི་ཡུན་རིང་ནས་བོད་དོན་རྒྱབ་སྐྱོར་གནང་མཁན་ཞིག་ཡིན་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་དང་ཐེངས་མང་མཇལ་འཕྲད་གནང་མྱོང་ཡོད་པ་བཅས།།
