༢༠༡༠ ཟླ་ ༩ ཚེས་ ༢༠ རེས་གཟའ་ཟླ་བ།

༅༅། །འདི་གར་སུད་སི་སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༩ ཚེས་ ༡༩ ཉིན་༸གོང་ས་༸སྐྱབས་མགོན་ཆེན་པོ་མཆོག་བྷུ་ཌ་པེ་སིར་ཉིན་གཉིས་རིང་གི་བཀའ་དབང་ལེགས་པར་གྲུབ་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱན་རས་གཟིགས་ཀྱི་བཀའ་དབང་སྩོལ་སྐབས་བཀའ་སློབ་ཕེབས་དོན། ཁྱེད་རང་ཚོ་སྒོམ་རྒྱག་སྐབས་བྱམས་སྙིང་རྗེ་དང་སེམས་བཟང་པོ་བྱེད་རྒྱུའི་ཐོག་བསམ་བློ་གཏོང་ཐབས་དང། འགྲོ་བ་མིའི་རིན་ཐང་དེ་དག་གོང་འཕེལ་གཏོང་ཐབས་བྱེད་དགོས་ཞེས་སོགས་ཀྱི་བཀའ་སློབ་སྩལ་ཡོད། ཉིན་རྒྱབ་མགོན་པོ་གང་ཉིད་མཆོག་གིས་བྱམས་བརྩེ་ནི་བདེ་སྐྱིད་བསྐྲུན་ཐབས་ཤིག་ཡིན། (Compassion: Art of Happiness) ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་དོན། ཁོང་ཁྲོ་དང། དངངས་སྐྲག བློ་དོགས་སོགས་ཀྱི་འགྲོ་བ་མིའི་འཆར་ཅན་གྱི་མི་ཚེའི་འགྲོ་སྟངས་ཁག་པོ་བཟོ་གི་ཡོད། གཞན་དོན་སྒྲུབ་པའི་ཚོར་བ་ཇི་ཙམ་གྱི་མང་བ་ཡོད་ན་དེ་ཙམ་གྱི་སོ་སོའི་འཕྲོད་བསྟེན་ལ་ལེགས་པ་དང་ཞི་བདེ་ཡོང་གི་ཡོད་པ་མ་ཟད། འགྲོ་བ་མིའི་རིན་ཐང་ཡང་གོང་སྤེལ་གཏོང་རྒྱུར་ཕན་ཐོགས་ཡོད། ཅེས་སོགས་ཀྱི་བཀའ་སློབ་ཕེབས་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་མང་ཚོགས་དང་ལྷན་དྲི་བ་དྲིས་ལན་ཡང་མཛད་ཡོད། དེ་ཉིན་བྷུ་ཌ་པེ་སིར་རྟེན་གཞི་བྱས་པའི་རྒྱ་གར་དང། སོག་པོ། དེ་བཞིན་ཝི་ཨ་ནའི་(Vienna)གཞུང་ཚབ་བཅས་ཀྱིས་མགོན་པོ་གང་ཉིད་མཆོག་དང་མཇལ་འཕྲད་ཞུས་ཡོད། ཉིན་གཉིས་རིང་གསུང་ཆོས་ཀྱི་ཕྱག་འཁྱེར་ ༢༢༤༠༠ བརྒལ་བ་བྲིན་ཡོད་པ་མ་ཟད། མི་གྲངས་ ༤༥༠༠༠ བརྒལ་བས་ཐད་ཀར་དྲ་རྒྱ་བརྒྱུད་དབྱིན་སྐད་དང། འཇར་མན། ཨུ་རུ་སུ། རོ་མ་ནི་ཡ། སོ་ལོ་ཝག ཧང་གྷ་རི་བཅས་ཀྱི་སྐད་ཡིག་ཐོག་ནས་གསུང་ཆོས་ཞུ་ཐུབ་ཡོད་པ་བཅས་ཀྱི་གནས་བསྡུས་སུ།།