༢༠༡༠ ཟླ་ ༩ ཚེས་ ༡༤ རེས་གཟའ་མིག་དམར།
༸གོང་ས་མཆོག་ལ་ལ་དྭགས་དད་ལྡན་མང་ཚོགས་རྣམས་ཀྱིས་ཕེབས་བསུ་ཞུ་བཞིན་པ།
༸གོང་ས་མཆོག་ལམ་སྒྲོན་སློབ་གྲྭའི་རྩེད་ཐང་དུ་ཐུགས་སྨོན་མཛད་བཞིན་པ།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༡༣ རེས་གཟའ་ཟླ་བའི་སྔ་དྲོ་ཆུ་ཚོད་ ༨།༣༠ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་ཆིབས་སྒྱུར་བསྐྱངས་ཏེ་ཆུ་ཚོད་ ༩།༤༥ ཙམ་ལ་ལ་དྭགས་ཀྱི་རྒྱལ་ས་སླེ་རུ་༸ཞབས་སོར་འཁོད་སྐབས་ཇམ་མུ་ཀ་ཤི་མིར་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ངག་དབང་རིག་འཛིན་ཇོ་ར་ལགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་ནས་ཐོག་མར་༸གོང་ས་མཆོག་ལྕོག་ལམ་གསར་གྱི་སོ་ལར་ཀོ་ལོ་ནི་ (Solar Colony) ཞེས་པའི་གྲོང་ཚོ་དེར་ཆིབས་སྒྱུར་བསྐྱངས་ཏེ་ཆུ་རུད་ཀྱི་གོད་ཆག་ཕོག་པའི་རྗེས་ཤུལ་ནང་མི་སྤུན་མཆེད་ཚོར་སྐར་མ་ ༡༥ རིང་སེམས་གསོ་མཛད། དེ་རྗེས་ལ་དྭགས་ཀྱི་རྒྱལ་ས་སླེ་རུ་ཆིབས་སྒྱུར་བསྐྱངས་ཏེ་སླེ་ཇོ་ཁང་དུ་ཉེ་ལམ་ཆུ་རུད་ཀྱི་གོད་ཆག་འོག་རྐྱེན་འདས་སུ་གྱུར་བ་རྣམས་ཀྱི་ཆེད་དུ་ཐུགས་སྨོན་གསོལ་འདེབས་མཛད་གྲུབ་མཚམས་རྗེས་ཤུལ་ནང་མི་སྤུན་མཆེད་ཚོར་སེམས་གསོ་མཛད་ཡོད།
ལམ་སྒྲོན་སློབ་གྲྭའི་རྩེད་ཐང་དུ་མང་ཚོགས་ ༢༥༠༠༠ ལྷག་ཙམ་འདུ་འཛོམས་བྱུང་བ།
དེ་ནས་ལམ་སྒྲོན་སློབ་གྲྭའི་རྩེད་ཐང་དུ་༸ཞབས་སོར་འཁོད་དེ་བཀའ་སློབ་སྩལ་དོན། རྐྱེན་ངན་ནི་བྱུང་ཚར་བ་རེད། ཁྱེད་རང་ཚོ་རྗེས་ཤུལ་ནང་མི་སྤུན་མཆེད་ཚོས། ངའི་ནང་མི་ཚང་མ་འདས་གྲོང་ཕྱིན་སོང་། ང་ལ་གང་ཡང་བྱུང་མ་སོང་། བསམ་
སྟེ་སེམས་ཤུགས་མ་ཆག་པར་མི་ཚེ་གསར་པ་ཞིག་འགོ་འཛུགས་རྒྱུའི་བློ་སྤོབས་སྐྱེ་དགོས། སྨོན་ལམ་གང་ཐུབ་རྒྱག་དགོས། ངོས་ཀྱིས་ཀྱང་སྨོན་ལམ་བརྒྱབ་ཆོག་ཅེས་སོགས་ཀྱི་བཀའ་སློབ་སྩལ། གཞན་ཡང་མགོན་པོ་གང་ཉིད་མཆོག་གིས་ཁང་ཁྱིམ་རྩ་གཏོར་ཕྱིན་པ་རྣམས་ཉམས་གསོའི་ཆེད་ཧིན་སྒོར་འབུམ་ ༢༥ ཞལ་འདེབས་གསོལ་རས་བཀའ་དྲིན་ཆེ་བ་སྩལ། ཕྱོགས་མཚུངས་ཆུ་རུད་ཀྱི་གོད་ཆག་འོག་དཀའ་སྡུག་མྱོང་བཞིན་པའི་མང་ཚོགས་རྣམས་ལ་སེམས་གསོ་མཛད་པ་དང་ཆབས་གཅིག་༸གོང་ས་མཆོག་སྐུ་ཉིད་ཀྱི་རྒྱལ་ཡུམ་ཆེན་མོ་མཆོག་དགོངས་པ་རྫོགས་སྐབས་མ་ཎི་འབུམ་དྲུག་ཙམ་བསགས་གནང་མཛད་ཡོད་སྐོར་བཀའ་སློབ་སྩལ་བ་དང་། རབ་བྱུང་ན་མང་ཚོགས་རྣམས་ཀྱིས་མ ་ཎི་འབུམ་དྲུག་ཙམ་གསོག་དགོས་པ་དང་།
དེ་ལྟར་མ་བྱུང་ནའང་ཉུང་མཐར་མ་ཎི་འབུམ་རེ་གསོག་དགོས་པའི་སྐུལ་མ་ཡང་མཛད་ཡོད། སྐབས་དེར་མང་ཚོགས་ ༢༥༠༠༠ ཙམ་འདུ་འཛོམས་བྱུང་བ་རྣམས་ལ་༸གོང་ས་མཆོག་གིས་སྨན་བླ་དང་སྒྲོལ་མ། མ་ཎི། བཇྲ་གུ་རུ། མི་འཁྲུག་པ་བཅས་ཀྱི་ཟུངས་སྔགས་གསོག་སྒྲུབ་མཛད་པ་དང། བཟང་སྤྱོད་སྨོན་ལམ་སོགས་བཏོན་གནང་མཛདཡོད། ཕྱི་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་ཀཱར་གིལ་དུ་ཆིབས་སྒྱུར་བསྐྱང་གནང་མཛད་ཡོད་པ་བཅས།།
