༢༠༡༠ ཟླ་ ༩ ཚེས་ ༢༡ རེས་གཟའ་མིག་དམར།

༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཧང་གྷ་རི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་དང་ཆབ་སྲིད་ཚོགས་པ་(Lahet Mas a Politika)ནས་ཇི་ལྟར་གདན་ཞུའི་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་ཐོབ་སྟེ་ཧང་གྷ་རི་གྲོས་ཚོགས་སུ་ཆིབས་སྒྱུར་བསྐྱངས་ཡོད། དེ་ཡང་ཧང་གྷ་རི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་དང་ཆབ་སྲིད་ཚོགས་པའི་འགོ་ཁྲིད་གཞོན་པས་མགོན་པོ་གང་ཉིད་མཆོག་གྲོས་ཚོགས་ཀྱི་དབུས་སྒོ་ནས་གདན་འདྲེན་ཞུས་པ་མ་ཟད། ཧང་གྷ་རི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོས་༸གོང་ས་མཆོག་དང་མཇལ་འཕྲད་ཞུས་ཡོད། སྐབས་དེར་ཆབ་སྲིད་ཚོགས་པའི་འགོ་ཁྲིད་གཞོན་པ་ལྕམ་སྐུ་(Szabo Timea)ལགས་ཀྱིས་གསུང་དོན། ང་ཚོས་བོད་ཀྱི་གནད་དོན་ཐོག་མཐའ་གཅིག་ཏུ་རྒྱབ་སྐྱོར་གྱི་རྣམ་པ་མཚོན་ཆེད་འདིར་འདུ་འཛོམས་ཞུས་ཡོད། ང་ཚོ་ཚང་མས་ལོ་སྟོང་ཕྲག་སྔོན་ནས་ཡོད་པའི་བོད་ཀྱི་རིག་གཞུང་དང་བོད་མིའི་ངོ་བོ་སྲུང་སྐྱོབ་ཆེད་བོད་མིར་མིང་དོན་མཚུངས་པའི་རང་སྐྱོང་དགོས་པར་རྒྱབ་སྐྱོར་བྱེད་ཀྱི་ཡོད། ང་ཚོར་བོད་ཀྱི་ཁོར་ཡུག་དང་གནམ་གཤིས་འགྱུར་ལྡོག་གིས་ཤུགས་རྐྱེན་ཐོག་སེམས་འཚབས་ཆེན་པོ་ཡོད། ཅེས་གསུངས་ཡོད། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་ཧང་གྷ་རི་གྲོས་ཚོགས་གོང་མའི་ནང་གྲོས་ཚོགས་ཀྱི་ཚོགས་མི་དང་སྐུ་མགྲོན་རྣམ་པར་བཀའ་སློབ་སྩལ་དོན། ངོས་རང་ལོ་ ༡༦ ཐོག་ངོས་མི་སྒེར་གྱི་རང་དབང་ཤོར་བ་དང། ལོ་ ༢༤ ཐོག་ངོས་ཀྱི་རྒྱལ་ཁབ་ཤོར་བ་རེད། འདས་པའི་ལོ་ངོ་ ༥༡ ནས་ངོས་རང་སྐྱབས་བཅོལ་བའི་གནས་བབ་ཐོག་གནས་ཡོད། ཅེས་བཀའ་སློབ་སྩལ་བ་དང། དེ་བཞིན་༸གོང་ས་མཆོག་གིས་ཕྱི་ལོ་ ༡༩༥༦ ཟླ་ ༡༠ པའི་ནང་ཧང་གྷ་རིར་དམར་པོའི་རིང་ལུགས་ལ་ངོ་རྒོལ་བྱེད་སྐབས་མགོན་པོ་གང་ཉིད་མཆོག་བོད་ནང་ཡོད་ཀྱང་ཐུགས་ཀྱི་ཚོར་སྣང་ལ་སྐབས་དེར་རང་དབང་འཐབ་རྩོད་གནང་མཁན་ཚོ་དང་ཐུགས་ཐག་ཉེ་པོ་ཡོད་སྐོར་བཀའ་སྩལ་ཡོད། ཡང་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། མེ་མདའི་ནུས་སྟོབས་ལས་དྲང་བདེན་གྱི་ནུས་སྟོབས་དེ་སྟོབས་ཤུགས་ཆེ་བ་ཡོད། མེ་མདའི་ནུས་སྟོབས་ནི་གནས་སྐབས་ཀྱི་ནུས་སྟོབས་ཤིག་ཡིན་པ་དང། དེས་དྲང་བདེན་གྱི་ནུས་སྟོབས་མེད་པ་བཟོ་མི་ཐུབ། བོད་མིའི་གནད་དོན་དེ་བཙན་གནོན་འོག་སེལ་ཐུབ་ཀྱི་མ་རེད། བོད་མི་རྣམས་ནས་རྒྱ་ནག་དང་ཁ་བྲལ་རྩོད་ཀྱི་མེད། འོན་ཀྱང་བོད་མིའི་གནད་དོན་སེལ་ཐབས་ནི་བོད་རྒྱ་གཉིས་སྨན་ཆེད་བོད་མི་ཡོངས་ལ་མིང་དོན་མཚུངས་པའི་རང་སྐྱོང་སྤྲོད་རྒྱུ་དེ་ཡིན། ཞེས་སོགས་ཀྱི་བཀའ་སློབ་སྩལ་ཡོད། གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཧང་གྷ་རི་གྲོས་ཚོགས་ཀྱི་འཐུས་མི་རྣམས་ལ་བོད་ནང་གི་གནས་སྟངས་ཐོག་རྟོག་ཞིབ་ཆེད་བོད་དུ་ཕེབས་དགོས་པའི་སྐུལ་མ་ཡང་མཛད་ཡོད།

ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་དབུས་ཡུ་རོབ་གཙུག་ལག་སློབ་གཉེར་ཁང་(Central European University)དུ་ཆིབས་སྒྱུར་བསྐྱངས་ཏེ་དེ་གའི་དགེ་ལས་སློབ་ཕྲུག་རྣམས་ལ་ལམ་སྟོན་བཀའ་སློབ་ཟབ་མོ་སྩལ་ཡོད།།