༢༠༡༠ ཟླ་ ༨ ཚེས་ ༡༦ རེས་གཟའ་ཟླ་བ།

༄༅། །ཕྱི་ལོ་ ༢༠༡༠ ཟླ་ ༨ ཚེས་ ༧ མཚན་མོའི་ཆུ་ཚོད་ ༡༠ ཙམ་ལ་བོད་ལྗོངས་མདོ་སྨད་ས་ཁུལ་འབྲུག་ཆུ་རྫོང་དུ་ཆུ་ལོག་གི་རྐྱེན་པས་འདས་གྲོངས་སུ་གྱུར་བའི་མི་གྲངས་ཚེས་ ༡༢ བར་ ༡༡༤༤ སྐོར་ཟིན་པ་ཡོད་པ་དང་། དེ་བཞིན་མི་གྲངས་ ༦༤ རྨས་སྐྱོན་ཚབས་ཆེ་ཕོག་པ། མི་གྲངས་ ༦༠༠ ལྷག་གར་སོང་ཆ་མེད་དུ་གྱུར་ཐོག་མཁར་དངོས་སོགས་ལ་གོད་ཆག་ཤུགས་ཆེ་བྱུང་བར་བརྟེན་ཕྱི་ལོ་ ༢༠༡༠ ཟླ་ ༨ ཚེས་ ༡༤ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་གཞུང་ཆོས་རིག་ལས་ཁུངས་དང་། མདོ་སྨད་ཆོལ་ཁ་ཐུན་མོང་ནས་གོ་སྒྲིག་འོག་བོད་ལྗོངས་མདོ་སྨད་ས་ཁུལ་འབྲུག་ཆུ་རྫོང་དུ་ཆུ་ལོག་གིས་གོད་ཆག་ཕོག་པ་རྣམས་ཀྱི་ཆེད་སྨོན་ལམ་གསོལ་འདེབས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་ཆོས་རིག་དྲུང་ཆེ་མགོན་པོ་ཕུན་ཚོགས་དང་བོད་མི་མང་སྤྱི་འཐུས་དང་མདོ་སྨད་ཆོལ་ཁའི་སྐུ་ཚབ་ཡེ་ཤེས་སྒྲོལ་མ་རྣམ་གཉིས་ཀྱིས་༸གོང་ས་མཆོག་ཕོ་བྲང་ནས་སྤོས་སྣེས་སྔོན་བསུས་ཏེ་གཙུག་ལག་ཁང་གི་ཡང་སྟེང་དུ་༸ཞབས་སོར་འཁོད་རྗེས་མགོན་པོ་གང་ཉིད་མཆོག་དབུ་བཞུགས་ཐོག་རྒྱལ་བ་ཀརྨ་པ་མཆོག་དང་། རྣམ་གྲྭ་ཕན་བདེ་ལེགས་བཤད་གླིང་གི་མཁན་རིན་པོ་ཆེ་དང་དགེ་འདུན་འདུས་མང་གིས་དབུས་རྡ་སའི་ཉེ་འཁོར་གྱི་དགོན་སྡེ་ཁག་གི་གྲྭ་བཙུན་དང་བཙན་བྱོལ་བོད་གཞུང་གི་ཆེས་མཐོའི་ཁྲིམས་ཞིབ་པ་ཆེ་བས་དབུས་ཁྲིམས་ཞིབ་པ་གཞན་དང་། བཀའ་བློན་ཁྲི་པ་མཆོག་གིས་དབུས་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཙོ་མཆོག་གིས་དབུས་སྤྱི་འཐུས་རྒྱུན་ལས་རྣམ་པ།

རང་དབང་ཅན་གྱི་འགན་འཛིན་རྣམ་པ། ལས་ཁུངས་ཁག་གི་དྲུང་ཆེ་ཆུང་དང་ལས་བྱེད། ཕྱི་ནང་གི་སེར་སྐྱ་མི་མང་སོགས་ཁྱོན་མི་གྲངས་སྟོང་ཕྲག་བརྒལ་བ་མཉམ་འཛོམས་ཀྱིས་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་བརྒྱ་ཚར་དང་། མར་མེ་སྟོང་ཚར་འབུལ་བཤམས་དང་འབྲེལ་འཕགས་ཚོགས་འདུས་པ་རྒྱ་མཚོར་བསྙེན་བཀུར་མང་ཇ་དང་། དགེ་འདུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ རེ་ཕུལ་ཏེ་ཆུ་རུད་འཇིག་པས་རྐྱེན་འདས་སུ་སོང་བ་རྣམས་ཀྱིས་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་རྒྱལ་བའི་གོ་འཕང་རིན་པོ་ཆེ་མྱུར་དུ་ཐོབ་པ་དང་། རྨས་སྐྱོན་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱིས་ཚེ་ལྷག་དོན་ལྡན་ཡོང་བ་གཙོས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་། ཁྱད་པར་འབྱུང་བཞིའི་འཇིག་པ་མི་འབྱུང་བར་བདེ་སྐྱིད་རྗོགས་ལྡན་གྱི་དཔལ་ལ་ལོངས་སུ་སྤྱོད་ཐུབ་པ་སོགས་ཀྱི་སྨོན་ལམ་གསོལ་འདེབས་ཚོགས་ཡོད་པ་བཅས།