༢༠༡༠ ཟླ་ ༨ ཚེས་ ༡༩ རེས་གཟའ་ཕུར་བུ།
ཚོགས་དྲུང་ལས་ཁུངས་ཀྱི་དྲུང་ཡིག་ཆེན་མོ་སྐུ་ཞབས་སྟོབས་རྒྱལ་ལགས།
༄༅། །དེ་སྔ་ཚོགས་དྲུང་ལས་ཁུངས་ཀྱི་དྲུང་འཕར་སྐུ་ཞབས་སྟོབས་རྒྱལ་ལགས་ཕྱི་ལོ་ ༢༠༡༠ ཟླ་ ༨ ཚེས་ ༢༠ ནས་ཚོགས་དྲུང་ལས་ཁུངས་ཀྱི་དྲུང་ཡིག་ཆེན་མོའི་ལས་གནས་ཐོག་ཕྱག་ལས་གནང་འགོ་འཛུགས་རྒྱུ་ཡིན་འདུག སྐུ་ཞབས་སྟོབས་རྒྱལ་ལགས་ནི་ཕྱི་ལོ་ ༡༩༥༡ ལོར་སྟོད་དིང་རི་ནང་འཁྲུངས་པ་དང། ཕྱི་ལོ་ ༡༩༥༩ ལོར་ཁོང་དགུང་གྲངས་ ༧ ལ་སོན་སྐབས་རྒྱ་གར་ནང་བྲོས་བྱོལ་དུ་ཕེབས་ཡོད། བཙན་བྱོལ་ནང་ཕེབས་རྗེས་ཐོག་མའི་ཆར་ཁོང་བལ་ཡུལ་ཤར་ཁུམ་བུར་བོད་མི་སྐྱབས་བཅོལ་བའི་སྡོད་ཁང་དུ་བཞུགས་པ་དང། ཕྱིས་སུ་ཀ་སྦུག་ཏུ་དབུས་བོད་གཞུང་སློབ་གྲྭར་སློབ་གཉེར་གནང་། ཕྱི་ལོ་ ༡༩༧༠ ནས་ ༡༩༧༦ བར་རྡ་ས་རྣམ་རྒྱལ་གྲྭ་ཚང་དུ་ཆོས་འགོར་བཞུགས། སྐབས་དེར་ཁོང་ནས་ནང་པའི་རིགས་ལམ་གཙོ་བོར་གྱུར་བའི་ནང་པའི་གཞུང་ཆེན་ཁག་ལ་སློབ་གཉེར་གནང་ཡོད། སྐུ་ཞབས་སྟོབས་རྒྱལ་ལགས་ནས་ཕྱི་ལོ་ ༡༩༧༦ ལོར་ཐོག་མའི་ཆར་བཙན་བྱོལ་བོད་གཞུང་བོད་གནས་ཉམས་ཞིབ་ཁང་དུ་ཉམས་ཞིབ་པའི་ཕྱག་ལས་གནང་ཡོད། ལྷན་ཁང་དེར་ཉམས་ཞིབ་ལོ་དྲུག་གནང་རྗེས་ཕྱི་ལོ་ ༡༩༨༢ ལོར་ཚོགས་དྲུང་ལས་ཁུངས་སུ་གནས་སྤོས་ཀྱིས་ལོ་བདུན་རིང་ཕྱག་ལས་གནང། བོད་མི་མང་སྤྱི་འཐུས་ལྷན་ཚོགས་སྐབས་ ༩ པའི་འོས་བསྡུའི་ཚོགས་མི་གནང་ཡོད། ཕྱི་ལོ་ ༡༩༩༠ ལོར་ཁོང་བྷན་ཌ་ར་ས་གནས་འགོ་འཛིན་གནང་ཡོད་པ་དང། ཕྱི་ལོ་ ༡༩༩༡ ནས་ ༡༩༩༤ བར་བཙན་བྱོལ་བོད་མིའི་རྩ་ཁྲིམས་བསྐྱར་བཅོས་ཚོགས་ཆུང་གི་ཚོགས་མི་བགྲེས་པོའི་ཐོག་ཕྱག་ལས་གནང། དེ་རྗེས་བཀའ་དྲུང་ཡིག་ཚང་དུ་ལོ་ ༡༡ རིང་ཕྱག་ལས་གནང་ཡོད། ཕྱི་ལོ་ ༢༠༠༥ ལོར་བོད་མི་མང་སྤྱི་འཐུས་ལྷན་ཚོགས་ཀྱིས་རེ་འདུན་འོག་དྲུང་འཕར་གྱི་མཚན་གནས་ཐོག་ཚོགས་དྲུང་ལས་ཁུངས་སུ་ལས་བཅར་ཞུས་ཏེ་ད་བར་ལྷན་ཁང་དེར་ཕྱག་ལས་གནང་མུས་ཡིན། ཁོང་ནས་ཕྱི་ལོ་ ༡༩༩༠ ནང་རྡ་ས་ས་གཞོན་གྱི་ཚོགས་གཙོ་དང། གཞོན་ནུའི་དབུས་རྒྱུན་ལས་ཀྱི་ཚོགས་མི་ཡང་གནང་མྱོང་ཡོད། བོད་མི་མང་སྤྱི་འཐུས་རྒྱུན་ལས་དང་ཚོགས་དྲུང་ལས་ཁུངས་ཀྱི་ལས་བྱེད་ཡོངས་ནས་ཁོང་དྲུང་ཡིག་ཆེན་མོར་བསྐོ་གཞག་གནང་བར་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་ཆབས་ཅིག་ལས་དོན་ལེགས་གྲུབ་ཡོང་བའི་སྨོན་ལམ་ཞུས་འདུག་པ་བཅས།།
