༢༠༡༠ ཟླ་ ༨ ཚེས་ ༡༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༨ ཉིན་ཕ་ཡུལ་དྲ་རྒྱའི་ནང་ལྷོ་སྤྱི་ལས་ཁུངས་ལ་འོས་བསྡུའི་སྒྲིག་གཞི་ལོག་སྤྱོད་བྱས་ཏེ་བོད་མིའི་མང་གཙོ་ནག་སུབ་བཏང་སྐོར་གྱི་གནས་ཚུལ་བཀོད་ཡོད། འོན་ཀྱང་ཕྱི་ཟླ་ ༨ ཚེས་ ༡༠ ཉིན་རྡ་ས་དབུས་འོས་བསྡུ་ལས་ཁང་གིས་བཏང་གནས་ལ་གཞིགས་ན་སྦེང་ལོར་ས་གནས་འོས་བསྡུའི་འགན་འཛིན་ནམ་ལྷོ་སྤྱི་མཆོག་གིས་ལྷོ་སྤྱིའི་ཁྱབ་ཁོངས་ས་གནས་ཁག་ཏུ་ཟླ་ ༨ ཚེས་ ༧ ཉིན་མིང་གཞུང་དེབ་འགོད་བྱེད་རྒྱུ་མཚམས་འཇོག་བྱས་པ་དེ་ནི་འགྲིག་པ་ཞིག་ཡིན། གང་ཡིན་ཟེར་ན་རྒྱ་གར་དང་ཕྱི་རྒྱལ་ཡུལ་གྲུ་ཁག་གི་ས་གནས་འོས་བསྡུ་ལས་ཁུངས་ཁག་ཏུ་མིང་གཞུང་དེབ་འགོད་མཚམས་འཇོག་བྱེད་རྒྱུའི་ཚེས་གྲངས་དུས་བཀག་འདྲ་མིན་ཡོད། རྡ་ས་དབུས་འོས་བསྡུ་ལས་ཁང་གིས་སྦེང་ལོར་ས་གནས་འོས་བསྡུའི་འགན་འཛིན་མཆོག་ལ་བཏང་གནས་ནང་འཁོད་དོན། ལྷོ་སྤྱི་ལས་ཁུངས་ནས་ཕྱི་ལོ་ ༢༠༡༠ ཟླ་ ༨ ཚེས་ ༩ འཁོད་མིང་གཞུང་དེབ་འགོད་དང་འབྲེལ་བའི་ལྷོ་སྤྱི་ལས་ཁུངས་ནས་ཚོགས་སྡེ་ཁག་གི་འགན་འཛིན་བརྒྱུད་ས་གནས་མང་ཚོགས་ལ་གསལ་བསྒྲགས་གནང་བའི་ཡིག་ཆ་ངོ་བཤུས་དང་ཁ་ཤོག་བསྡོམས་ཤོག་ལྷེ་ ༧ ཅན་དབུས་འོས་བསྡུ་ལས་ཁང་ལ་གནང་དོན་བཞིན། ལྷོ་སྤྱི་ལས་ཁུངས་ནས་ད་བར་མིང་གཞུང་དེབ་འགོད་དང་འབྲེལ་བའི་ལས་རིམ་ཁག་གང་ལེགས་གནང་བར་བསྔགས་བརྗོད་དང། ཉེ་ཆར་སྦེང་ལོར་ས་གནས་ནས་ལས་བྱེད་ཡིན་ཟེར་བའི་བུ་མོ་ཞིག་གིས་ཞལ་པར་བྱུང་དོན་ས་གནས་སུ་དེབ་འགོད་བྱེད་རྒྱུ་མི་མང་ཁ་ཤས་ལུས་ཡོད་ལུགས་གསུངས་འདུག རྩ་བའི་ལྷོ་སྤྱི་ལས་ཁུངས་ནས་ས་གནས་སུ་གསལ་བསྒྲགས་ཞིབ་ཕྲ་གནང་ཡང་དོ་བདག་སོ་སོའི་དོ་སྣང་ཆུང་བའི་རྐྱེན་གྱིས་དེབ་འགོད་བྱ་རྒྱུ་ལུས་པར་ངོ་འཛིན་ཞུ་རྒྱུ་དང། རྡ་ས་དབུས་འོས་བསྡུ་ལས་ཁང་ནས་ལྷོ་སྤྱི་ལས་ཁུངས་ཀྱི་ནོར་འཁྲུལ་བྱུང་མེད་པ་དོ་བདག་ལ་གསལ་བཤད་ཀྱང་ཞུས་འདུག ལྷོ་སྤྱི་མཆོག་ནས་འདི་ཟླའི་ཚེས་ ༡༨ བར་མིང་གཞུང་དེབ་འགོད་ལུས་པ་རྣམས་དེབ་འགོད་གནང་སྟེ་དབུས་འོས་བསྡུ་ལས་ཁང་དུ་ཕྱི་ཚེས་ ༢༥ འགྱངས་མེད་འབྱོར་ཐུབ་པ་གནང་དགོས་བཅས་དེ་དོན་དགོངས་འཇགས་ཞུ། ཞེས་བཀོད་འདུག་ན། དེ་ལུགས་མང་གཙོ་ལོངས་སུ་སྤྱོད་བཞིན་པའི་མི་མང་རྣམས་ནས་གོ་བ་ལོག་སྤྱོད་མི་ཡོང་བ་ཞུ་རྒྱུ་བཅས།།
