༢༠༡༠ ཟླ་ ༨ ཚེས་ ༧ རེས་གཟའ་སྤེན་པ།

༄༅། །ཕྱི་ལོ་ ༢༠༡༠ ཟླ་ ༨ ཚེས ༦ ཉིན་ལྡི་ལི་བོད་ཁང་ནས་གོ་སྒྲིག་ཐོག་ཧང་གྷ་རིའི་རི་མོ་བ་གྲགས་ཅན་ཞིག་གིས་བྲིས་པའི་ནང་ཆོས་དང་འབྲེལ་བའི་རི་མོ་ཁག་གཅིག་འགྲེམས་སྟོན་གནང་ཡོད། དེ་ཡང་གོང་ཚེས་ཉིན་གྱི་ཕྱེད་ཡོལ་རྒྱ་གར་རྒྱལ་ས་ལྡི་ལིའི་ (India International Center) ཞེས་པའི་བསྟི་གནས་ཁང་དུ་ཧང་གྷ་རིའི་དགེ་རྒན་ཆེན་མོ་གྷ་ཚབ་བི་རྡ་ནམ་ཧཱ་པེ་མཆོག་གིས་རི་མོ་འགྲེམས་སྟོན་དབུ་འབྱེད་གནང་ཡོད། དབུ་འབྱེད་མཛད་སྒོའི་ཐོག་ལྡི་ལི་བོད་གཞུང་སྐུ་ཚབ་དོན་གཅོད་དང་བཀའ་བློན་གཅིག་ལྕོགས་བསྟན་པ་ཚེ་རིང་མཆོག་གིས་དབུས་ཧང་གྷ་རིའི་རིག་གཞུང་འགན་འཛིན་སོགས་གནད་ཡོད་མི་སྣ་ལྔ་བཅུ་ཙམ་ཞིག་ཕེབས་ཡོད་པ་དང་། སྣུམ་ཚོས་རི་མོ་གྲགས་ཅན་དེ་དག་ནི་ཨི་ལི་ཛེ་ཕཱ་ཐ་སཱ་སེ་རུ་ནཱ་དང་ཁོང་གི་བུ་མོ་ཨི་ལི་ཛེ་ཕཱ་ཐ་བྷུ་རུ་ནཱ་གཉིས་ཀྱིས་ཕྱི་ལོ་ ༡༩༣༠ ཙམ་ནས་ ༡༩༧༠ བར་བྲིས་པ་ཤ་སྟག་ཡིན་པ་མ་ཟད། རི་མོ་དེ་དག་གི་ཁོངས་སུ་བདག་ཅག་གི་སྟོན་པ་བཅོམ་ལྡན་འདས་དང་ནང་པའི་མཆོད་རྟེན་སྣ་ཚོགས། དེ་བཞིན་ཕྱི་ལོ་ ༡༩༥༩ ལོར་བྲིས་པའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་རྒྱལ་བ་ཀརྨ་པ་སྐུ་ཐོག་སྔོན་མའི་སྐུ་པར་སོགས་ཁྱོན་སྣུམ་ཚོས་ཀྱི་རི་མོ་ ༢༣ ཡོད་པ་རྣམས་འགྲེམས་སྟོན་གནང་འདུག སྐབས་དེར་ལྡི་ལིི་བོད་ཁང་གི་འགན་འཛིན་རྡོ་འབུམ་རིན་ཆེ་མཆོག་གིས་རི་མོ་དེ་དག་གི་སྐོར་ལ་གསུང་དོན། ཧང་གྷི་རི་ནས་ཡིན་པའི་ཨི་ལི་ཛེ་ཕཱ་སཱ་སེ་ཐ་རུ་ནཱ་དང་ཁོང་གི་བུ་མོ་གཉིས་ཀྱིས་བྲིས་པའི་རི་མོ་དེ་དག་དེ་རིང་འདིར་འགྲེམས་སྟོན་ཞུ་གི་ཡོད། འོན་ཀྱང་ད་ལྟ་ཁོང་རྣམ་པ་གཉིས་སྐུ་འཚོ་བཞུགས་མེད་པ་རེད། ཁོང་གཉིས་ནི་མི་ཚེ་མང་ཆེ་བ་རྒྱ་གར་ནང་བསྐྱལ་བར་བརྟེན་རྒྱ་གར་གྱི་རིག་གཞུང་སྤྱི་དང་ལྷག་པར་ནང་པའི་རིག་གནས་ཐོག་ཧ་ལས་པའི་དོ་སྣང་ཆེན་པོ་གནང་མཁན་ཞིག་རེད། ཁོང་གཉིས་ནས་བྲིས་པའི་རི་མོ་མང་པོ་ཡོད་པའི་ནང་ནས་ནང་པའི་རི་མོ་ཁག་གཅིག་ཡོད་པ་རྣམས་༸གོང་ས་མཆོག་ལ་འབུལ་ལམ་ཞུ་རྒྱུའི་ཡིན་ཞེས་སྲས་མོ་ཁོང་རང་མ་གྲོངས་གོང་སྙན་སྒྲོན་ཞུས་པར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་རི་མོ་དེ་དག་ལྡི་ལི་བོད་ཁང་ནས་ཉར་ཚགས་བྱེད་དགོས་པའི་བཀའ་མངགས་ཕེབས་བྱུང་ཞེས་གསུངས་ཡོད་པ་བཅས།