༢༠༡༠ ཟླ་ ༨ ཚེས་ 4 རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢ ཉིན་ཨ་རིའི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཚོགས་པས་ (ICT) རོང་རྒྱལ་ཨ་གྲགས་ཀྱིས་ཕྱི་ལོ་ ༢༠༠༧ ཟླ་ ༨ ཚེས་ ༡ ཉིན་བོད་ཤར་ཕྱོགས་ཁམས་ལི་ཐང་གི་རྟ་རྒྱུག་རྩེད་འགྲན་དུ་བོད་མི་སྟོང་ཕྲག་མང་པོ་འདུ་འཛོམས་སྐབས་༸གོང་ས་༸སྐྱབས་མགོན་ཆེན་པོ་མཆོག་བོད་ནང་གདན་ཞུ་དགོས་པ་དང། ཁོང་ནི་བོད་མི་ས་ཡ་དྲུག་གི་རེ་བའི་མིག་དཔེ་ཡིན་ཞིང་། བོད་ནང་དུ་ཡོད་པའི་བོད་མི་རྣམས་ཀྱིས་ལུས་པོ་གཡོ་འགུལ་བྱེད་ཐུབ་ནའང་རང་གི་སེམས་ནང་ཡོད་པའི་སྐད་ཆ་ཕྱིར་འདོན་རྒྱུའི་རང་དབང་མེད་ཅེས་ལྗིད་ཉམས་དོད་པོས་འབོད་སྒྲ་སྒྲོགས་པའི་གློག་བརྙན་དེ་ཐེངས་དང་པོར་འཛམ་གླིང་ཕྱིར་བཏོན་ཡོད། དེ་ཉིན་རྒྱལ་སྤྱིའི་བོད་དོན་ལས་འགུལ་ཚོགས་པས་བསྒྲགས་གཏམ་ཞིག་སྤེལ་བའི་ནང་། གནད་དོན་དེ་བྱུང་ནས་ལོ་གསུམ་འཁོར་བའི་དུས་དྲན་སྲུང་བརྩི་ཞུས་པ་དང་སྟབས་བསྟུན་གློག་བརྙན་དེ་ཐེངས་དང་པོར་ཕྱིར་བཏོན་པ་རེད་ཅེས་འཁོད་ཡོད། གློག་བརྙན་དེ་རྟ་རྒྱུག་སྐབས་ཡོད་པའི་ཕྱི་རྒྱལ་ཡུལ་སྐོར་སྤྲོ་འཆམ་པ་ཞིག་གིས་བཟོས་པ་ཞིག་ཡིན་པ་དང་སྐབས་དེར་ཁོང་གིས་རོང་རྒྱལ་ཨ་གྲགས་ཀྱི་གཏམ་བཤད་ཆ་ཚང་ཞིག་གློག་བརྙན་བརྒྱབ་མེད། ད་ལྟ་རང་ལོ་ ༥༦ སོན་པའི་རོང་རྒྱལ་ཨ་གྲགས་ལགས་རྒྱ་ནག་གཞུང་གིས་ལོ་བརྒྱད་ཀྱི་དུས་བཀག་བཙོན་འཇུག་གི་ཁྲིམས་ཆད’འོག་གནས་ཡོད།
