༢༠༡༠ ཟླ་ ༨ ཚེས་ ༧ རེས་གཟའ་སྤེན་པ།
༅༅། །ཕྱི་ལོ་ ༢༠༡༠ ཟླ་ ༥ ཚེས་ ༢༦ དང་ ༢༧ བཅས་ཉིན་གཉིས་རིང་ཕ་རན་སིའི་གྲོང་ཁྱེར་སེ་ཀྲ་སི་སྦག་ (Strasbourg) འཛམ་གླིང་ནང་གི་མང་གཙོ་ཅན་གྱི་རྒྱལ་ཁབ་ནས་རྒྱ་ནག་གཙོས་པའི་ཨེ་ཤི་ཡའི་རྒྱལ་ཁབ་ནང་མང་གཙོ་ཡོང་ཐབས་ཀྱི་རྒྱབ་སྐྱོར་ཚོགས་འདུར་མགྲོན་འབོད་ལྟར་སྐུ་ཚབ་དོན་གཅོད་བཀྲ་ཤིས་དབང་འདུས་མཆོག་དང་བློ་བཟང་ཉི་མ་ལགས་གཉིས་ནས་མཉམ་ཞུགས་གནང་ཡོད། དེ་ཡང་ཚོགས་འདུའི་ནང་ཨི་ཊཱ་ལིའི་གྲོས་ཚོགས་ཀྱི་འཐུས་མི་དང་ཉི་ཧོང་གཞུང་འཛིན་མི་སྣ། ཇར་མན་བདེ་སྲུང་བློན་ཆེན་ཟུར་པ། དེ་བཞིན་ཧོོང་ཀོང་དང་ཐེ་ཝན། རྒྱ་ནག ཁེ་ཎ་ཌ། ཨ་རི། འབར་མ། ཐེ་ལེན་ཌི། ཡུ་རོབ་བཅས་ཀྱི་ནང་ཡོད་པའི་རྒྱ་རིགས་མཁས་དབང་དང་ཆབ་སྲིད་ཉམས་ཞིབ་པ། རྩོམ་པ་པོ་དང་གསར་འགོད་པ་བཅས་ཁྱོན་མི་གྲངས་ ༧༠ ཙམ་ཕེབས་ཡོད། སྐབས་དེར་སྐུ་ཚབ་དོན་གཅོད་བཀྲ་ཤིས་དབང་འདུས་མཆོག་གིས་བཙན་བྱོལ་བོད་གཞུང་གི་མང་གཙོའི་ལྟ་གྲུབ་དང་རྒྱ་བོད་གཉིས་ཀྱི་གནད་དོན་ཐོག་གསུང་བཤད་གནང་ཡོད་པ་མ་ཟད། བློ་བཟང་ཉི་མ་ལགས་ནས་ཀྱང་སྐབས་དེར་གསུང་བཤད་གནང་ཡོད། ཚོགས་འདུ་གོ་སྒྲིག་ཚོགས་ཆུང་གིས་བརྗོད་པར་གཞིག་ན་ཉིན་གཉིས་རིང་གི་ཚོགས་འདུ་དེར་རྒྱ་ནག་སྐམ་ས་ནས་མི་གྲངས་ ༣༠༠༠ ཙམ་མཉམ་ཞུགས་གནང་འདུག དེ་བཞིན་ཟླ་ ༧ ཚེས་ ༣ ཉིན་ཕ་རན་སིའི་རྒྱལ་ས་པེ་རི་སི་ནང་རྒྱ་བོད་མཛད་འབྲེེལ་མཐུན་ཚོགས་བཙུགས་ཏེ་ལོ་གཅིག་འཁོར་བའི་མཛད་སྒོར་ཕ་རན་སི་འབྲེལ་མཐུད་ལས་ཁང་གི་ཟུང་དྲུང་དབང་པོ་སྦ་གཞིས་ལགས་དང་བློ་བཟང་ཉི་མ་ལགས། དེ་བཞིན་རྒྱ་ནག་གི་མང་གཙོའི་ཐོག་མཁས་དབང་ཕ་རན་སིའི་ལྕམ་མཱ་རི་ཡ་དང་། ཕ་རན་སི་རྒྱལ་སའི་ནང་གནས་སྡོད་རྒྱ་རིགས་མང་གཙོ་ཚོགས་པའི་ཚོགས་གཙོ་དང་ཚོགས་མི། རྒྱ་རིགས་མི་མང་། ཚོང་པ། སློབ་ཕྲུག་བཅས་ཕེབས་ཡོད། སྐབས་དེར་བློ་བཟང་ཉི་མ་ལགས་ཀྱིས་བོད་ཀྱི་རིག་གཞུང་དང་ནང་ཆོས། ལྷག་པར་གཞིས་བྱེས་བོད་མི་ཡོངས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཇི་འདྲ་ཞུ་བཞིན་ཡོད་སྐོར་གྱི་གཏམ་བཤད་གནང་ཡོད་པ་མ་ཟད། སྐབས་དེར་ཚོགས་ཅར་བ་རྣམས་ཀྱིས་ཚོགས་འདུའི་བརྗོད་གཞི་དང་འབྲེལ་བའི་བགྲོ་གླེང་ཡང་གནང་འདུག ཕྱོགས་མཚུངས་ཟླ་ ༧ ཚེས་ ༡༣ ཉིན་སྦེལ་ཇམ་རྒྱལ་ས་སྦར་སིེལ་ནང་གནས་སྡོད་བོད་མི་རྒྱ་སྐད་ཤེས་མཁན་རྣམས་ལ་བློ་བཟང་ཉི་མ་ལགས་ཀྱིས་རྒྱ་བོད་མི་རིགས་དབར་འབྲེལ་ལམ་བཟང་དུ་གཏོང་རྒྱུའི་ཟབ་སྦྱོང་ཞིག་སྤྲད་ཡོད། ཚེས་ ༡༤ ཉིན་བོད་མི་ཁག་གཅིག་དང་། ཇར་མན། ཧོ་ལེན་ཌི། སྦེལ་ཇམ། སུད་སི་བཅས་ཀྱི་ནང་གནས་སྡོད་རྒྱ་རིགས་མང་གཙོ་དོན་གཉེར་ཅན་དང་སློབ་ཕྲུག ཚོང་པ། སོག་རིགས་བཅས་ཁྱོན་མི་གྲངས་ ༡༠༠ ཙམ་ཚང་འཛོམས་ཐོག་བློ་བཟང་ཉི་མ་ལགས་ཀྱིས་རྒྱ་ནག་གཞུང་གིས་བོད་མིར་ཆོས་དད་རང་མོས་ཀྱི་སྲིད་བྱུས་ལག་བསྟར་བྱེད་བཞིན་པ་དེ་ནོར་འཁྲུལ་ཞིག་ཡིན་སྐོར་དང། ས་གནས་བོད་རིགས་ནང་ཁུལ་རྡོག་རྩ་ཆིག་སྒྲིལ་ངང་གནས་དགོས་པའི་འབོད་སྐུལ་ཡང་གནང་ཡོད། ཕྱོགས་མཚུངས་སྐབས་དེར་རྒྱ་རིགས་རྩོམ་པ་པོ་སྐུ་ཞབས་ཕིང་ཤའོ་མིང་ནས་ལོ་རྒྱུས་ཀྱི་ཐོག་ནས་རྒྱ་བོད་མི་རིགས་དབར་འབྲེལ་ལམ་ཇི་ཡོད་སྐོར་འགྲེལ་བརྗོད་བྱས་ཡོད་པ་མ་ཟད། རྒྱ་བོད་མི་རིགས་གཉིས་པོའི་དབར་མཐུན་ལམ་གོང་མཐོར་གཏོང་བར་རྒྱ་བོད་མི་རིགས་གཉིས་ཀས་འབད་བརྩོན་བྱེད་དགོས་པའི་འབོད་སྐུལ་ཡང་གནང་འདུག དེ་རྗེས་ཚོགས་བཅར་བ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་གློག་བརྙན་རྒྱ་སྐད་ཐོག་བསྟན་ཡོད་པ་བཅས།།
