༢༠༡༠ ཟླ་ ༨ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༧ རེས་གཟའ་སྤེན་པའི་ཉིན་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་བཙན་བྱོལ་བོད་གཞུང་གི་དབུས་འོས་བསྡུའི་སྤྱི་ཁྱབ་འགན་འཛིན་འཇམ་དཔལ་ཆོས་བཟང་མཆོག་དང་འོས་བསྡུ་འགན་འཛིན་ལས་འཕར་དགེ་བཤེས་རིག་འཛིན་ཆོས་གྲགས་ལགས། དེ་བཞིན་དབྱངས་མགོ་རྒྱལ་བཅས་ཀྱིས་བཙན་བྱོལ་བོད་གཞུང་གི་སྲི་ཞུ་བ་གཙོ་བོར་གྱུར་བའི་རྡ་ཤོད་དང་གངས་སྐྱིད་ལ་གནས་སྡོད་བོད་མི་རྣམས་ལ་འབྱུང་འགྱུར་བཀའ་སྤྱིའི་འོས་བསྡུ་དང་འབྲེལ་བའི་ལམ་སྟོན་གསུང་བཤད་གནང་ཡོད། སྐབས་དེར་འཇམ་དཔལ་ཆོས་བཟང་མཆོག་གིས་འབྱུང་འགྱུར་བཀའ་སྤྱིའི་འོས་བསྡུ་གལ་ཆེ་ཡིན་ཡང་འོས་བསྡུ་ཚགས་ཚུད་ཡོང་མིན་ནི་བོད་མི་རྣམས་ཀྱིས་སྐབས་བབས་རང་འཁྲིད་འོས་བསྡུའི་ལས་འགན་སྒྲུབ་ཐུབ་མིན་ལ་རག་ལུས་ཡོད། དེ་བཞིན་བོད་མི་རང་ལོ་ ༡༨ སོན་པ་རྣམས་ནས་དབུས་སྤྱི་ཁྱབ་འོས་བསྡུ་ལས་ཁུངས་དང་ས་གནས་འོས་བསྡུ་ལས་ཁུངས་གང་རུང་དུ་དང་བླངས་དཔྱ་ཁྲལ་ལག་དེབ་དེབ་སྐྱེལ་གནང་ཡོད་ཚེ་འབྱུང་འགྱུར་བཀའ་སྤྱིའི་འོད་བསྡུའི་ནང་འོས་འཕེན་ཆོག། དང་བླངས་དཔྱ་ཁྲལ་དེབ་སྐྱེལ་ཞུས་ཡོད་ཚེ་རང་ཉིད་ས་གནས་གང་དུ་ཡོད་རུང་དབུས་འོས་བསྡུ་ལས་ཁུངས་ཀྱིས་གོ་སྒྲིག་ཞུས་པའི་ས་གནས་འོས་བསྡུའི་ཚོགས་ཆུང་དེ་རང་དུ་འོས་འཕེན་ཆོག ཕྱོགས་མཚུངས་བོད་མི་གྲངས་ ༥༠ ཚང་བའི་ས་གནས་གང་དུའང་གལ་ཏེ་བོད་མི་ ༥༠ པོ་དེ་དག་གི་མིང་ཐོ་དབུས་འོས་བསྡུ་ལྷན་ཁང་དུ་ཕུལ་ཚེ་ས་གནས་དེར་དབུས་འོས་བསྡུ་ལྷན་ཁང་གིས་འོས་ཤོག་ཁང་ཆུང་ (polling booth) འཛུགས་རྒྱུ་ཡིན་སྐོར་འགྲེལ་བརྗོད་གནང་ཡོད། འོས་བསྡུའིོ་འགན་འཛིན་ལས་འཕར་དགེ་བཤེས་རིག་འཛིན་ཆོས་གྲགས་ལགས་ཀྱིས་འབྱུང་འགྱུར་བཀའ་སྤྱིའི་འོས་བསྡུའི་སྐབས་བྲིས་ཀློག་མི་ཤེས་པ་དང་ནད་པའི་རིགས་ཡོད་ཚེ་འབྲེལ་ཡོད་ནང་མི་སུ་རུང་ཞིག་གིས་ཚབ་བྱས་ཏེ་བྲིས་ཀློག་མི་ཤེས་མཁན་དེ་དང་ནད་པ་དེའི་ལམ་སྟོན་འོག་འོས་ཤོག་འཕེན་ཆོག་ཡོད་སྐོར་གསུངས། དབུས་འོས་བསྡུ་ལྷན་ཁང་གི་འབྲེལ་ཡོད་ལས་བྱེད་རྣམས་བོད་མི་གནད་ཡོད་ཀྱི་ས་གནས་ལ་དྭགས་དང་མ་ནཱ་ལི། མན་ཌི། ཅོན་ཏཱ་ར། སྦིར། སིམ་ལ། རྡ་ས་བཅས་དང་གཞན་ཡང་རྒྱ་གར་བྱང་ཕྱོགས་བོད་མི་གནས་སྡོད་ཀྱི་ས་གནས་ཡོངས་དང། དེ་བཞིན་རྒྱ་གར་ཤར་ཕྱོགས་བོད་མི་གནས་སྡོད་ས་ཁུལ་ཀ་རྡོ་སྒང་གསུམ་གྱི་གཙོས་ས་གནས་ཁག་ཚང་མར་ཕེབས་ཏེ་འབྱུང་འགྱུར་བཀའ་སྤྱིའི་འོས་བསྡུའི་སྐབས་འོས་ཤོག་འཕེན་རྒྱུའི་ལམ་སྟོན་ཞིབ་ཕྲ་གསལ་བཤད་གནང་ཡོད་པ་མ་ཟད། དབུས་འོས་བསྡུ་ལྷན་ཁང་གི་འབྲེལ་ཡོད་ལས་བྱེད་རྣམས་ཀྱིས་ཕྱི་ཟླ་ ༨ ཚེས་ ༡༡ ཉིན་རྡེ་ར་ལྡུན་གནས་སྡོད་བོད་རིགས་རྣམས་ལ་འོས་བསྡུའི་ལམ་སྟོན་དང་འབྲེལ་བའི་གསུང་བཤད་གནང་རྒྱུ་དང་། ཕྱོགས་མཚུངས་རྒྱ་གར་ལྷོ་ཕྱོགས་བོད་མི་གནས་སྡོད་གཞིས་ཆགས་ཁག་ཏུའང་འོས་བསྡུ་དང་འབྲེལ་བའི་ལམ་སྟོན་གསུང་བཤད་དང་གསལ་བཤད་གནང་བར་བསྐྱོད་འཆར་ཡོད་པ་དང་། དེ་བཞིན་འབྱུང་འགྱུར་བཀའ་ཁྲི་འོས་བསྡུའི་ཆེད་དང་བླངས་དཔྱ་ཁྲལ་དེབ་སྐྱེལ་གནང་རྒྱུའི་དུས་ཚོད་ནི་ཕྱི་ལོ་ ༢༠༡༠ ཟླ་ ༦ ཚེས་ ༡༨ ནས་ ཟླ་ ༨ ཚེས་ ༡༨ བར་ཡིན། བཀའ་སྤྱིའི་སྔོན་འགྲོའི་འོས་འཕེན་གྱི་དུས་ཚོད་ནི་ཕྱི་ལོ་ ༢༠༡༠ ཟླ་ ༡༠ ཚེས་ ༣ ཉིན་ཡིན་པ་དང། བཀའ་སྤྱིའི་འོས་ཤོག་དངོས་གཞི་འཕེན་དུས་ནི་ཕྱི་ལོ་ ༢༠༡༡ ཟླ་ ༣ ཚེས་ ༢༠ ཉིན་ཡིན།
