༢༠༡༠ ཟླ་ ༨ ཚེས་ ༢༠ རེས་གཟའ་པ་སངས།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་གསལ། ཕྱི་ལོ་ ༢༠༡༠ ཟླ་ ༨ ཚེས་ ༡༦ ཉིན་ཆུ་ཚོད་ ༢།༠༠ ཐོག་བལ་ཡུལ་སྤོག་ར་གློ་སྒྲིག་དཔལ་འབྱོར་གླིང་ཚོགས་ཁང་བཀྲ་ཤིས་ཕྱོགས་ལས་རྣམ་རྒྱལ་ནང་སྤོག་ར་གཞིས་ཁག་ཐུན་མོང་ལས་འགུལ་ཚོགས་ཆུང་དང་། སྤོག་ར་ཡུལ་མིའི་གཞུང་འབྲེལ་མ་ཡིན་པའི་ཚོགས་པ་སམ་བྷཌ་ནེ་པལ་ཐུན་མོང་གིས་གོ་སྒྲིག་འོག་བོད་མི་སྐྱབས་བཅོལ་བ་རྣམས་ལ་རྒྱལ་སྤྱིའི་ཁྲིམས་ལུགས་ཀྱི་ཐོབ་ཐང་སྐོར་སློབ་ཁྲིད་གནང་ཡོད། དེ་ཡང་ཆུ་ཚོད་ ༢།༠༠ ཐོག་ཚོགས་ཁང་ནང་སྤོག་ར་གཞིས་ཁག་བཞིའི་ཕོ་མོ་རྒན་གཞོན་མི་གྲངས་བཞི་བརྒྱ་བརྒལ་བ་འདུ་འཛོམས་ཐོག་སམ་བྷཌ་ནེ་པལ་གྱི་ཚོགས་མི་རྣམ་པ་བཞུགས་གྲལ་དུ་བཞུགས་མཚམས། གོ་སྒྲིག་ཚོགས་ཆུང་ནས་སྐུ་མགྲོན་མི་མང་བཅས་ལ་གསོལ་ཇ་དང་བཞེས་ཏོག་ཕུལ་གྲུབ་བསྟུན། སམ་བྷཌ་ནེ་པལ་གྱི་ཚོགས་མི་བསོད་ནམས་བཟང་པོ་ལགས་ཀྱིས་སློབ་གསོའི་ལས་འགུལ་སྤེལ་དགོས་པའི་སྐོར་ངོ་སྤྲོད་གནང་རྗེས། སམ་བྷཌ་ནེ་པལ་གྱིས་གདན་ཞུས་ཁྲིམས་རྩོད་པ་རམ་ཙནདྲ་ཏྲིཔཊི་ལགས་ཀྱིས་ཆུ་ཚོད་གཅིག་དང་ཕྱེད་ཀ་ཙམ་ཁྲིམས་ལུགས་ཀྱི་ཐོག་ནས་ཁེ་ཕན་ངོས་ཟིན་པ་བྱེད་དགོས་རྒྱུ་དང་། ཁྲིམས་དང་མ་འགལ་བར་ཚུལ་མཐུན་བརྩི་བཀུར་བྱེད་ཕྱོགས་སྐོར་གསུང་བཤད་གནང་ཡོད། དེ་ནས་སམ་བྷཌ་ནེ་པལ་གྱི་ཚོགས་གཙོ་ནིལ་ཀྟ་ཤཱར་མ་ལགས་གྱིས་བོད་མིའི་སྤྱི་ཚོགས་ལ་ཕན་ཐོགས་ཡོང་ཕྱིར་ཚོགས་པའི་ངོས་ནས་ལས་འགུལ་རིམ་པར་སྤེལ་བཞིན་པ་དཔེར་ན། དེ་སྔོན་འགྲོ་བ་མིའི་ཐོབ་ཐང་སྐོར་ལ་སློབ་གསོ་ཐེངས་གཅིག་དང་། རྒྱལ་སྤྱིའི་ཁྲིམས་ལུགས། ཡུལ་ཁྲིམས་ཀྱི་ཐོག་ནས་ཐོབ་ཐང་ལེན་ཆོག་མི་ཆོག་གི་གནད་དོན་གསལ་པོར་རྟོགས་ཐུབ་ཕྱིར་ལས་འགུལ་སྤེལ་ཡོད་པ་ལྟར་ཚང་མས་དོ་སྣང་གིས་བློ་དོགས་ཡོད་པ་དང་། གསལ་པོ་མ་ཆགས་པའི་རིགས་ལ་དྲི་བ་དྲིས་ལན་གྱི་ལམ་ནས་གསལ་པོ་ཤེས་པ་བྱེད་དགོས་པའི་གསུང་བཤད་གནང་ཡོད། དེ་ནས་དྲི་བ་དྲིས་ལན་ཚར་རྗེས་ཁྲིམས་རྩོད་པ་དང་། སམ་བྷཌ་ནེ་པལ་གྱི་ཚོགས་གཙོ་ཚོགས་མི་བཅས་ལ་གཞིས་ཆགས་ཁག་གི་ལས་འགུལ་གོ་སྒྲིག་ཚོགས་ཆུང་གི་ཚོགས་གཙོ་གློ་སྒྲིག་ས་གནས་འགོ་འཛིན་ཚེ་རིང་སྲི་བརྟན་ལགས་ཀྱིས་ཐུགས་རྗེ་ཆེ་ཞུས་པ་དང་ཆབས་ཅིག་བཀྲ་ཤིས་དཔལ་འཁྱིལ་ས་འཐུས་ཚོགས་གཙོ་བཀྲ་ཤིས་ཕུན་ཚོགས་ལགས་ཀྱིས་མཇལ་དར་ཕུལ་ཏེ་ཚོགས་འདུ་གྲོལ་བ་བཅས།།
