༢༠༡༠ ཕྱི་ཟླ་ ༨ ཚེས་ ༢༡ རེས་གཟའ་སྤེན་པ།
༄༅། །འདི་གར་ཉི་ཧོང་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཉི་ཧོང་བོད་གཞུང་སྐུ་ཚབ་དོན་ཁང་གིས་གོ་སྒྲིག་འོག་ཕྱི་ལོ་ ༢༠༡༠ ཟླ་ ༨ ཚེས་ ༢༠ ཉིན་ཉེ་ལམ་རྒྱ་གར་དང་། པ་ཀི་སི་ཐན། རྒྱ་ནག དེ་བཞིན་བོད་མདོ་སྨད་འབྲུག་ཆུའི་ས་ཁུལ་དུ་ཆུ་རུད་དང་ས་རུད་ཀྱི་གོད་ཆག་ཚབས་ཆེ་འོག་རྐྱེན་འདས་སུ་གྱུར་བ་རྣམས་དང། རྗེས་ཤུལ་ཚོར་དམིགས་ཏེ་དམིགས་བསལ་མཆོད་འབུལ་དང། སྨོན་ལམ་ཞིག་ཇོན་ཇི་ནང་པའི་ལྷ་ཁང་དུ་ཚོགས་ཡོད། སྐབས་དེར་བོད་རིགས་དང་ཉི་ཧོང་མི་རིགས་བཅས་ཁྱོན་མི་གྲངས་ ༤༠ ཙམ་མཉམ་ཞུགས་ཐོག་ཤེས་རབ་སྙིང་པོ་དང་། སྒྲོལ་མ། གུ་རུའི་གཟུངས་སྔགས། མ་ཎི་བཅས་གསུང་འདོན་གནང་ཡོད་པ་མ་ཟད། རྟེན་མཆོག་སྤྱན་སྔར་མཆོད་མེ་བརྒྱ་ཚར་ཕུལ་ཡོད། དེ་ཡང་དམིགས་བསལ་སྨོན་ལམ་གསུང་འདོན་གྲུབ་མཚམས་ཉི་ཧོང་བོད་གཞུང་སྐུ་ཚབ་དོན་ཁང་གི་འབྲེལ་མཐུད་པ་སྐུ་ཞབས་ཚེ་དབང་རྒྱལ་པོ་ལགས་ཀྱིས་རང་འབྱུང་གོད་ཆག་ཕོག་པའི་ས་གནས་དེ་དག་ནང་གནས་སྟངས་ཛ་དྲག་ཇི་ཙམ་ཡིན་མིན་གསལ་བཤད་གནང་ཡོད་པ་མ་ཟད། ཕྱི་རྒྱལ་དང་རྡ་ས་གཙོས་པའི་རྒྱ་གར་ནང་བོད་མི་གནས་ཡུལ་ས་གནས་གཞིས་ཆགས་ཚང་མའི་ནང་ཉིན་གཅིག་དུས་གཅིག་ཏུ་མཆོད་འབུལ་སྨོན་ལམ་གནང་གི་ཡོད་སྐོར་གསུངས་ཡོད། ཕྱོགས་མཚུངས་ཁོང་གིས་བོད་འབྲུག་ཆུ་ས་ཁུལ་དུ་བྱུང་བའི་རང་འབྱུང་གོད་ཆག་དེ་མིའི་བཟོས་པའི་གོད་ཆག་ཅིག་ཡིན་པ་མཁས་དབང་དང་། ཁོར་ཡུག་ཉམས་ཞིབ་པ་མང་པོས་ཁས་ལེན་བྱེད་ཀྱི་ཡོད་སྐོར་དང། དེ་བཞིན་ཁོང་ནས་རྒྱ་མི་དཔོན་རིགས་ཚོར་གཉན་འཕྲང་ཅན་གྱི་བོད་ཀྱི་ཁོར་ཡུག་ཐོག་གཏོར་བཤིག་འཕར་མ་མི་གཏོང་བའི་འབོད་སྐུལ་ཡང་ཞུས་ཡོད། ཕྱོགས་མཚུངས་སྐུ་ཞབས་ཚེ་དབང་རྒྱལ་པོ་ལགས་ཀྱིས་དེ་སྔོན་བོད་མདོ་ཁམས་སྐྱེ་རྒུ་མདོར་ས་ཡོམ་གྱིས་གོད་ཆག་བྱུང་སྐབས་ཉི་ཧོང་མི་མང་ཚོས་ཞལ་འདེབས་རོགས་རམ་གནང་བར་ཐུགས་རྗེ་ཆེ་ཞུས་ཡོད་པ་མ་ཟད། ལ་དྭགས་དང་བོད་འབྲུག་ཆུའི་ནང་དཀའ་ངལ་འོག་གནས་པའི་མི་མང་ཚོར་དེ་མཚུངས་ངལ་སེལ་ཆེད་རོགས་རམ་གནང་རྒྱུའི་འབོད་སྐུལ་ཞུས་ཡོད་པ་བཅས།།
