༢༠༡༠ ཟླ་ ༨ ཚེས་ ༡༣ རེས་གཟའ་པ་སངས།
༄༅། མེ་སོར་ས་གནས་ཁྲིམས་ཞིབ་ཁང་གི་ཁྱབ་ཁོངས་ལྷོ་ཕྱོགས་གཞིས་ཆགས་ཁག ༥ དང་། བེང་ག་ལོར་དང་ཨུ་ཌི་བོད་མིའི་འདུས་སྡོད་ ༢ བཅས་ས་གནས་ཁག ༧ ནས་མི་གྲངས་ ༣༥ ལ་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༠ ཟླ་ ༧ ཚེས་ ༢༣ ནས་ཉིན་གྲངས་ ༡༠ རིང་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་གྱི་ལས་རིམ་ཞིག་མ་སུར་ས་གནས་ཁྲིམས་ཞིབ་ཁང་དུ་གོ་སྒྲིག་གནང་སྟེ།
༢༠༡༠ ཟླ་ ༧ ཚེས་ ༢༣ ཉིན་སྔ་དྲོ་སྦྱོང་བརྡར་དབུ་འབྱེད་མཛད་སྒོར་སྦེལ་ཀོབ་དང་བདེ་སླར་གཞིས་ཆགས་གཉིས་ཀྱི་ས་གནས་འགོ་འཛིན་རྣམ་པ་དང་། ས་གནས་རང་བདེན་ཚོགས་ཆུང་གི་སྐུ་ཚབ་བཅས་གདན་ཞུས་ཐོག གོང་གསལ་ས་གནས་ཁག ༧ ནས་སྦྱོང་བརྡར་བ་མི་གྲངས་ ༣༥ ལྷན་འཛོམས་ཀྱིས་དཔལ་ལྡན་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་སྒྲོལ་རིན་པོ་ཆེའི་སྐུ་མདུན་དུ་རྟེན་འབྱུང་སྣང་གསལ་ཞལ་འབྱེད་གནང་སྟེ། ས་གནས་ཁྲིམས་ཞིབ་ཁང་གི་ཁྲིམས་དྲུང་བསྟན་འཛིན་མཁྱེན་རབ་ནས་མཛད་རིམ་སྙན་སྒྲོན་ཞུས་རྗེས། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་ནས་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་ཐེངས་ ༢ པ་གོ་སྒྲིག་གནང་དགོས་པའི་དམིགས་ཡུལ་ངོ་སྤྲོད་གནང་དོན། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་ད་བར་རྒྱ་གར་དང་བལ་ཡུལ་ཁུལ་བོད་མིའི་གཞིས་ཆགས་དང་། ཁ་འཐོར་བོད་མིའི་འདུས་སྡོད་ཁག་བཅས་ཀྱི་སེར་སྐྱ་མང་ཚོགས་ལ་བཙན་བྱོལ་བོད་མིའི་ཁྲིམས་ལུགས་སྐོར་ཟབ་སྦྱོང་སྔ་རྗེས་གོ་སྒྲིག་ཞུས་ཡོད་ནའང་། རང་རིགས་མང་ཚོགས་ཁྲོད་ད་དུང་ཁ་མཆུ་ཞུ་གཏུག་གི་བྱ་རིམ་གསལ་པོ་མགོ་མ་འཚོས་པའི་དཀའ་ངལ་ཡོད་རིགས་དེ་དག་རིམ་བཞིན་སེལ་ཐབས་སུ་གཞིས་ཆགས་དང་། ཁ་འཐོར་བོད་མིའི་འདུས་སྡོད་ཁག་ཏུ་བཙན་བྱོལ་བོད་མིའི་ཁྲིམས་རྩོད་པ་གང་མང་སྐྱེད་སྲིང་ཞུ་ཐུབ་པ་བྱུང་ན། ས་གནས་སོ་སོར་ཁ་མཆུ་ཞུ་གཏུག་གི་བྱ་རིམ་མི་ཤེས་མཁན་རྣམས་ནས་ལམ་སྟོན་ཞུ་ཡུལ་ཡོད་པ་མ་ཟད། ཁྲིམས་རྩོད་པ་བསྟེན་དགོས་རིགས་ལ་ཁྲིམས་རྩོད་པའི་ལས་དོན་སྒྲུབ་མཁན་ཡོད་པ་བཅས་ཀྱི་དགོས་མཁོའི་མཐུན་རྐྱེན་དེས་མང་ཚོགས་སྤྱི་དང་། ལྷག་པར་དུ་མི་མང་སྙོམས་ཆུང་ཉམ་ཐག་རྣམས་ལ་ཕན་ཐོགས་ཆེ་ཙམ་ཡོང་རྒྱུའི་ཐོག ས་གནས་ཁྲིམས་ཞིབ་ཁང་སོ་སོའི་ནང་ཁ་མཆུའི་བྱ་རིམ་དུས་འགྱངས་མི་འབྱུང་བའི་དགེ་མཚན་ཆེ་ཙམ་ཡོང་རྒྱུར་དམིགས་ཏེ། རིང་མིན་ལོ་ཤས་ནང་རྒྱ་གར་དང་བལ་ཡུལ་ཁུལ་བོད་མིའི་སྤྱི་ཚོགས་ནང་མི་འགྲོ་དོ་ཆོད་ ༡༥༠ ཙམ་ལ་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་གྱི་ལས་རིམ་ད་དུང་མུ་མཐུད་གནང་འཆར་ཡོད་ལུགས་སོགས་ཀྱི་བཀའ་སློབ་གནང་། ཉིན་གྲངས་ ༡༠ རིང་ཉིན་རེར་ཚོགས་ཐུན་ ༤ རེ་བྱས་ཏེ། སྦྱོང་བརྡར་སློབ་ཁྲིད་པ་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང་། ཁྲིམས་ཞིབ་པ་ཆུ་སྟེང་ངག་དབང་ཐུབ་བསྟན་མཆོག ས་གནས་ཁྲིམས་ཞིབ་པ་མཚོ་སྣ་ལྷག་པ་མཆོག ཁྲིམས་ལུགས་རིག་པ་བ་དྲུང་གཞོན་རྣམ་རྒྱལ་ཚེ་སྐྱིད། ས་གནས་ཁྲིམས་དྲུང་བསྟན་འཛིན་མཁྱེན་རབ་བཅས་ནས་ཁྲིམས་ལུགས་དབང་འཛིན་གྱི་ཁྲིམས་དེབ་གསུམ་དང་། བཅའ་ཁྲིམས། བཙན་བྱོལ་བོད་མིའི་ཁྲིམས་རྩོད་པའི་བླང་དོར་ལམ་སྟོན་བཅས་སློབ་འཁྲིད་གནང་སྐབས་དྲི་བ་དྲིས་ལན་ཐོག་དམིགས་བསལ་དུས་ཚོད་བཏང་སྟེ། སྦྱོང་བརྡར་གྱི་ཉིན་ ༨ པ་དང་ ༩ པ་ཉིན་གཉིས་རིང་སྦྱོང་བརྡར་བ་རྣམས་ཚོགས་ཆུང་ཁག ༤ ལ་བགོས་ཏེ་ཁ་མཆུའི་ཞུ་རྩ་དང་། ཞུ་ལན་འབྲི་སྟངས་ཀྱི་སྦྱོང་བརྡར་ལས་རིམ་ནང་ཁ་མཆུ་མི་འདྲ་བ་གྲངས་ ༨ ཀྱི་ཞུ་རྩ་དང་ཞུ་ལན་བཟོས་ཏེ་དོན་དུ་སྦྱོང་བརྡར་བ་རྣམས་ལ་བོད་མིའི་ཁྲིམས་ལུགས་དང་། ཁ་མཆུ་ཞུ་གཏུག་བྱེད་སྟངས་བཅས་ཀྱི་སྐོར་གང་ལེགས་ཤེས་རྟོགས་ཐུབ་པ་བྱུང་ཡོད།
ཕྱི་ལོ་ ༢༠༡༠ ཟླ་ ༨ ཚེས་ ༡ སྦྱོང་བརྡར་གྱི་མཇུག་བསྡོམས་མཛད་སྒོར་ལུགས་བསམ་དང་བདེ་སླར་གཞིས་ཆགས་གཉིས་ཀྱི་ས་གནས་འགོ་འཛིན་གྱི་སྐུ་ཚབ་ལས་དྲུང་རྣམ་གཉིས་དང་ས་གནས་རང་བདེན་ཚོགས་ཆུང་གི་སྐུ་ཚབ་བཅས་ཕེབས་ཡོད་པ་དང་། དཔལ་ལྡན་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་ནས་སྦྱོང་བརྡར་བ་མི་གྲངས་ ༣༥ ལ་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་ལག་ཁྱེར་གསོལ་སྩལ་གནང་བ་དང་། སྦྱོང་བརྡར་བ་མི་གྲངས་ ༣༥ ཁོངས་ནས་མི་གྲངས་ ༢༩ ལ་ཁྲིམས་ཡིག་དགོངས་དོན་ལྟར་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་ནས་བཙན་བྱོལ་བོད་མིའི་ཁྲིམས་རྩོད་པའི་དེབ་འགོད་ལག་ཁྱེར་གསོལ་སྩལ་གནང་། འཕྲོས་སྦྱོང་བརྡར་བ་ ༣ ཁྲིམས་ཡིག་དགོངས་དོན་རང་ལོ་ ༢༥ མ་སོན་པ་དང་། སྦྱོང་བརྡར་བ་ ༣ ནས་གནས་སྐབས་རིང་ཁྲིམས་རྩོད་པའི་དེབ་འགོད་ལག་ཁྱེར་ཞུ་རྒྱུའི་སྙན་ཞུ་ཕུལ་མེད། སྦྱོང་བརྡར་བའི་སྐུ་ཚབ་བཀྲ་ཤིས་ཚེ་རིང་ལགས་ནས་བོད་མིའི་ཁྲིམས་རྩོད་པའི་སྦྱོང་བརྡར་དང་འབྲེལ་བའི་གཏམ་བཤད་ནང་ཟབ་སྦྱོང་དེ་གནད་དུ་སྨིན་པ་དང་། མང་ཚོགས་ལ་ཕན་ཐོགས་ཆེན་པོ་ཡོང་ངེས་ལ་འབྱུང་འགྱུར་ཡང་དེ་ལྟའི་ཟབ་སྦྱོང་གོ་སྒྲིག་སྐྱབས་འཇུག་ཡོང་བའི་རེ་བསྐུལ་ཡང་ཞུས་འདུག དེ་རྗེས་ཁྲིམས་ཞིབ་པ་ཆུ་སྟེང་ངག་དབང་ཐུབ་བསྟན་མཆོག་ནས་ད་རེས་བཙན་བྱོལ་བོད་ཁྲིམས་རྩོད་པའི་སྦྱོང་བརྡར་འབུལ་རྒྱུའི་དགོས་པ་རྒྱུ་མཚན་དང་། མ་འོངས་གཞིས་སྒར་སོ་སོའི་ནང་ལས་དོན་བྱེད་ཕྱོགས་ཀྱི་ལམ་སྟོན་འབོད་སྐུལ་དང་འབྲེལ་བའི་མཇུག་བསྡོམས་གསུང་བཤད་གནང་། ས་གནས་ཁྲིམས་ཞིབ་པ་མཚོ་སྣ་ལྷག་པ་མཆོག་ནས་ཐུགས་རྗེ་ཆེ་ཞུའི་གསུངས་བཤད་གནང་བ་བཅས་ཀྱི་གསར་གནས་ཕྱོགས་བསྡུས་སུ། ཆེས་མཐོའི་ཁྲིམས་ཞིབ་ཁང་ནས་ ༢༠༡༠ ཟླ་ ༨ ཚེས་ ༡༣ ལ།།
