༢༠༡༠ ཟླ་ ༨ ཚེས་ ༡༠ རེས་གཟའ་མིག་དམར།

༄༅། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྡི་ལི་གཙུག་ལག་སློབ་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༠ ཟླ་ ༨ ཚེས་ ༨ ཉིན་རྡ་ས་ནས་ལྡི་ལིར་ཆིབས་སྒྱུར་བསྐྱངས་ཏེ་ཕྱི་ཚེས་ ༩ ཉན་སྔ་དྲོ་ལྡི་ལི་གཙུག་ལག་སློབ་ཁང་གི་ཚོགས་ཁང་དུ་མི་ཚེའི་གོ དོན་སྙིང་པོ་གང་ཡིན་(What Life is all about) ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་སྩལ་ཡོད། དེ་ཡང་སྔ་དྲོ་ཆུ་ཚོད་ ༡༠ ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ལྡི་ལི་གཙུག་ལག་སློབ་ཁང་གི་སློབ་དཔོན་དང་འདེམས་སྒྲུག་བྱས་པའི་སློབ་ཕྲུག་གྲངས་ ༡༥༠ བརྒལ་བར་གོང་གསལ་བརྗོད་གཞིའི་ཐོག་བཀའ་སློབ་སྩལ་བའི་ནང་། སྤྱིར་འགྲོ་བ་རིགས་དྲུག་སེམས་ཅན་ཐམས་ཅད་བདེ་བ་འདོད་ཅིང་སྡུག་བསྔལ་མི་འདོད་པ་ཞིག་ཡིན་ནའང་། འགྲོ་བ་མིའི་རིགས་ལ་ལྡན་པའི་དམིགས་བསལ་གྱི་ཤེས་རབ་དེས་ལེགས་ཉེས་དབྱེ་འབྱེད་ཐུབ་ཀྱི་ཡོད་སྟབས་རྣམ་དཔྱོད་དེ་བཟང་པོའི་ཕྱོགས་སུ་བེད་སྤྱོད་བྱེད་དགོས་པ་དང་།

མིའི་རྣམ་དཔྱོད་དེའི་དབང་གི་རང་ཉིད་ལ་བདེ་བ་འདོད་པའི་ཆེད་དུ་ཆོས་ལུགས་འདྲ་མིན་ཁག་དང་ཆོས་རྩ་བ་ནས་ཁས་མི་ལེན་པ་སོགས་ཀྱི་ལྟ་གྲུབ་འདྲ་མིན་ཡོད་པ་དེ་དག་ཀྱང་བདེ་བ་འདོད་པ་གཅིག་གྱུར་ཡིན། ལྷག་པར་དུ་འཛམ་གླིང་ནང་ཚན་རིག་གི་སྒྱུ་རྩལ་སྣ་ཚོགས་ཀྱི་ལམ་ནས་འཕྲུུལ་ཆས་དང་དངོས་པོ་ཡར་རྒྱས་སོགས་བསམ་ཡུལ་ལས་འདས་པ་ཕྱིན་ཡོད་པ་དེ་དག་ཀྱང་འགྲོ་བ་མིའི་བདེ་བ་འདོད་ཐབས་སུ་ཡིན་སྐོར་བཀའ་སྩལ་བ་དང་སྦྲགས། དེང་སྐབས་ (Secular Ethics) མི་རིགས་དང་ཆོས་ལུགས་རིས་མེད་ཀྱི་བཟང་པོའི་ཡོན་ཏན་འཕེལ་རྒྱས་གཏོང་རྒྱུ་གལ་ཆེན་པོ་ཡིན་སྐོར་ལམ་སྟོན་བཀའ་སློབ་ཕེབས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་གྲུབ་བསྟུན་ལྡི་ལིའི་གཙུག་ལག་སློབ་ཁང་གི་དགེ་སློབ་རྣམས་ཀྱིས་བརྗོད་གཞི་དང་འབྲེལ་བ་ཡོད་པའི་དྲི་བ་མང་དག་ཅིག་ཕུལ་བར་བཀའ་ལན་མཛད་ཡོད། ཐེངས་འདིའི་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དང་བགྲོ་གླེང་གི་ལས་རིམ་ནང་མཉམ་ཞུགས་གནང་མཁན་སློབ་དཔོན་དང་སློབ་ཕྲུག་རྣམས་ནི་ལྡི་ལི་གཙུག་ལག་སློབ་ཁང་གི་ངོས་ནས་དམིགས་བསལ་རྩོམ་ཡིག་འགྲན་བསྡུར་གྱིས་འདེམས་སྒྲུག་བྱུང་བ་ཞིག་ཡིན་པ་དང་། སློབ་ཕྲུག་ཁོངས་སུ་རྒྱ་གར་མི་རིགས་ཙམ་མ་ཟད་བོད་རིགས་དང་ཕྱིའི་རྒྱལ་ཁབ་མང་པོ་ཞིག་གི་སློབ་ཕྲུག་ཀྱང་ཕེབས་ཡོད་པ་བཅས།།