༢༠༡༠ ཟླ་ ༨ ཚེས་ ༢༧ རེས་གཟའ་པ་སངས།
༄༅། །འདི་གར་ཨ་རི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་འདི་ཚེས་ ༡༧ ཉིན་ཨ་རིའི་མངའ་སྡེ་ཨོ་ཧཱ་ཡོ་དང་། ཁེ་ཎ་ཌའི་གྲོང་ཁྱེར་ཊོ་རོན་ཊོར་འདི་ལོའི་ཕྱི་ཟླ་ ༡༠ པའི་ནང་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་གྲ་སྒྲིག་ལས་དོན་ཆེད་གཞུང་དོན་ཕྱོགས་བསྐྱོད་ལ་ཕེབས་ཤིང་། སྐུ་ཚབ་དོན་གཅོད་མཆོག་གིས་ཨོན་ཏྲེ་ར་ཡོ་ས་གནས་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་པ་ལྟར། ཕྱི་ཚེས་ ༢༡ རེས་གཟའ་སྤེན་པའི་གུང་སེང་དུས་ཚོད་དང་སྟབས་བསྟུན་ནས་ཁུལ་དེའི་བོད་མི་མང་ཚོགས་ ༣༠༠ ཙམ་དང་ལྷན་འཛོམས་ཀྱིས་གསུང་བཤད་གནང་དོན། ཉེ་བའི་ལོ་ཤས་ནང་ཨ་རི་དང་། ཁེ་ཎ་ཌ་ཁུལ་དུ་བཙན་བྱོལ་བོད་མིའི་མི་འབོར་མངོན་གསལ་དོད་པོས་མང་དུ་ཕྱིན་པ་དེས་ཆབ་སྲིད་དང་། སྤྱི་སྒེར་གྱི་དཔལ་འབྱོར་གནས་སྟངས་ཐོག་ནས་བཤད་ན་ཕན་ཐོགས་བྱུང་ཡོད་ན་ཡང་། དེ་དང་ཆབས་ཅིག་མི་རིགས་རང་ཉིད་ཀྱི་སྐད་ཡིག་སྲུང་སྐྱོབ་ཐོག་ཉེན་ཁ་གསར་པ་ཞིག་ཀྱང་ཡོང་གི་ཡོད་སྟབས། ཕ་མས་གཙོས་ང་ཚོ་ཚང་མས་གཞོན་སྐྱེས་རྣམས་ཀྱིས་མི་རིགས་རང་ཉིད་ཀྱི་སྐད་ཡིག་ཤེས་པ་བཟོ་རྒྱུར་ངེས་པར་དུ་དོ་སྣང་མི་ལྷོད་པ་དགོས། རང་རིགས་གཞོན་སྐྱེས་ཚོས་བོད་ལུང་པ་མཐོང་མ་མྱོང་ཡང་གཙོ་བོ་ཕ་མ་སོ་སོ་དང་། བཙན་བྱོལ་བོད་མིའི་སྤྱི་ཚོགས་ཀྱི་བབ་ཆགས་ལ་བརྟེན་ནས་གཞོན་སྐྱེས་ཚོའི་བོད་སྤྱི་དོན་གྱི་སེམས་ཤུགས་དང་། མི་རིགས་ཀྱི་ཞེན་ཁོག་ཆེན་པོ་ཡོད་པ་དེ་ནི་ང་རང་ཚོ་སྤོབས་པ་བྱེད་དགོས་པ་ཞིག་ཡིན་པའི་སྐོར་ལ་གསུང་བཤད་གནང་ཡོད། དེ་རྗེས་ས་གནས་བོད་མི་ཁག་གཅིག་ནས་སྐུ་ཚབ་དོན་གཅོད་མཆོག་ལ་སྤྱི་འཐུས་ལྷན་ཚོགས་དང། བཀའ་བློན་ཁྲི་པའི་འོས་བསྡུའི་སྐོར་དང་། དེ་མིན་ཆབ་སྲིད་གནད་དོན་དང་། དང་བླང་དཔྱ་དེབ་སྐོར་དྲི་བ་ཕུལ་བ་དེ་ཚོར་ལན་དགོས་སར་ལན་དང་། གསལ་བཤད་དགོས་སར་གསལ་བཤད་གནང་ཡོད་པ་རེད།ཡང་སྐུ་ཚབ་དོན་གཅོད་མཆོག་ནས་གཞུང་དོན་ཕྱོགས་བསྐྱོད་དུ་ཕེབས་པའི་གོ་སྐབས་དམ་འཛིན་གནང་སྟེ་ཊོ་རོན་ཊོར་ཡོད་པའི་བོད་པའི་ཆེད་ལས་པའི་ཚོགས་པའི་( GTPN) རྒྱུན་ལས་དང་། དེ་བཞིན་ས་གནས་ཆུ་བཞི་སྒང་དྲུག་དང་། གཞོན་ནུ་ཚོགས་པ། བུད་མེད་ཚོགས་པ། ཁེ་ཎ་ཌ་བོད་དོན་རྒྱབ་སྐྱོར་ཚོགས་པའི་( CTC) བཅས་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་རྣམས་དང་མཇལ་འཛོམས་གནང་ནས་ཕན་ཚུན་ངོ་ཤེས་རྒྱུས་ལོན་དང་། བསམ་ཚུལ་བརྗེ་རེས་གནང་ཡོད་པ་བཅས།།
