༢༠༡༠ ཟླ་ ༨ ཚེས་ ༢༣ རེས་གཟའ་ཟླ་བ།
༸གོང་ས་མཆོག་གིས་མ་ནཱ་ལིའི་དད་ལྡན་མང་ཚོགས་རྣམས་ལ་གསུང་ཆོས་བཀའ་དྲིན་སྩོལ་བཞིན་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢༢ ཉིན་གྱི་སྔ་དྲོ་ཆུ་ཚོད་ ༨ ཐོག་༸གོང་ས་༸སྐྱབས་མགོན་ཆེན་པོ་མཆོག་རྙིང་མ་དགོན་དུ་༸ཞབས་སོར་འཁོད་དེ་སྒྲུབ་གཞག་སྔོན་དུ་བཏང་སྟེ་ཁ་ཉིན་གྱི་སྔོན་འགྲོའི་གསུང་ཆོས་ལྷག་འཕྲོ་རྒྱལ་སྲས་ལག་ལེན་སོ་བདུན་མའི་ཆོས་འབྲེལ་མཛད་རྗེས་འཕགས་པ་སྤྱན་རས་གཟིགས་ཕྱག་སྟོང་སྤྱན་སྟོང་གི་བཀའ་དབང་ཟབ་མོ་སྩལ་བ་སོགས་ཁུལ་དེའི་མི་མང་རྣམས་ལ་ཁ་ཉིན་ཆོས་ཐུན་གཅིག་དང་དེ་རིང་ཆོས་ཐུན་གཅིག་བཅས་ནང་ཆོས་ངོ་སྤྲོད་གཙོ་བོར་གྱུར་བའི་ཆོས་ཐུན་གཉིས་སྩལ་ཡོད། དེ་ཡང་མ་ནཱ་ལི་དང་དེའི་གཡས་གཡོན་དུ་གནས་སྡོད་བྱེད་བཞིན་པའི་རང་རིགས་དང་དེ་བཞིན་ཁུལ་དེའི་ཡུལ་མི། ཕྱི་རྒྱལ་མི་རིགས་བཅས་ཁྱོན་བསྡོམས་མི་གྲངས་ ༤༠༠༠ ཙམ་ལ་ཆོས་འབྲེལ་བཀའ་དྲིན་ཆེ་བ་སྩལ་དོན། དེ་རིང་སྔོན་ལ་ཁ་སང་གི་ལྷག་འཕྲོ་ལག་ལེན་སོ་བདུན་མ་བྱེད་རྒྱུ་ཡིན། ཞེས་བཀའ་སྩལ་ཏེ་དེར་བཅར་བའི་སློབ་ཕྲུག་རྣམས་ལ། གང་གི་རྟེན་ཅིང་འབྲེལ་བ་བྱུང་། ཞེས་པ་དེ་བསྐྱོར་ཐུབ་ཀྱི་ཡོད་དམ་ཞེས་ཆེད་དུ་བཀའ་སྩལ་བ་དང་སྦྲགས་གང་གི་རྟེན་ཅིང་འབྲེལ་བ་བྱུང་ཞེས་པར་གོ་བ་ཇི་ལྟར་ལེན་དགོས་རེ་རེ་བཞིན་ངོ་སྤྲོད་མཛད།
མ་ནཱ་ལིར་ཚེ་དབང་སྐབས།
དེ་ནས་མུ་མཐུད་ཁ་ཉིན་གྱི་ལྷ་འཕྲོར་ལུས་པའི་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་ཆོས་འབྲེལ་གཟབ་རྒྱས་མཛད། སྔོན་འགྲོའི་ཆོས་འབྲེལ་ཡོངས་སུ་གྲུབ་བསྟུན་གྲ་སྒྲིག་ཚོགས་ཆུང་ནས་མཎྜལ་རྟེན་གསུམ་འདེགས་འབུལ་ཞུས་པ་དང་དེ་རྗེས་ཡུལ་མི་རྒན་རབས་ཁག་གཅིག་ལ་མཇལ་ཁ་སྩལ
། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དབང་དངོས་གཞི་བཀའ་དྲིན་ཆེ་བ་སྩལ་གྲུབ་རྗེས་བཅོམ་ལྡན་འདས་ཀྱི་མཚན་སྔགས་དང་ཨ་ར་པཱ་ཙ། སྒྲོལ་མའི་གཟུངས་སྔགས། བཛྲ་གུ་རུ། དམིགས་བརྩེ་མ་བཅས་ཀྱི་ལྗགས་ལུང་བཀའ་དྲིན་ཆེ་བ་སྩལ་རྗེས་བཀའ་སློབ་ཕེབས་དོན། ཁྱེད་ཚོས་ལག་ལེན་སོ་བདུན་མ་དུས་དུས་ལ་ཀློག་དགོས། སྤྱན་རས་གཟིགས་ཀྱི་བཀའ་དབང་ཐོབ་པ་ཡིན་ཙང་མ་ཎི་ཆད་མེད་འདྲེན་དགོས། ཕྲེང་འཁོར་རེ་ཙམ་དང་ཡང་ན་སྟོང་ཕྲག་རེ་ཟུང་གསོག་དགོས་པ་ཡིན། སྤོ་རྨོ་ལས་ཀ་མེད་པ་ཚོས་ཁྲི་རེ་ཙམ་གསོག་ཐུབ་ན་ཡག་པོ་ཡོད། ཡང་ཁྱེད་རང་ཚོ་བྲེལ་བ་ཆེ་བ་ཚོས་སྟོང་ཕྲག་རེ་ཙམ་བསག་ན་འགྲིག སློབ་གྲྭའི་ཕྲུ་གུ་ཚོས་ཨ་ར་པཱ་ཙ་སྐྱོར་ན་རིག་པ་ཡག་ཏུ་འགྲོ་རྒྱུར་ཏན་ཏན་ཕན་གྱི་རེད། དེ་མིན་ནད་ན་ཚ་དང་གནོད་པ་མིན་ནམ་བསམ་པའི་རྣམ་རྟོག་འདྲ་བྱུང་ཚེ་སྒྲོལ་མའི་གཟུངས་སྔགས་འདྲེན་ན་ཡག་པོ་ཡོད།
༸གོང་ས་མཆོག་མ་ནཱ་ལིའི་མཛད་འཆར་ལེགས་གྲུབ་ཀྱིས་མཎ་ཌིར་ཆིབས་ཐོན་སྐབས་ས་གནས་བོད་རིགས་ཚོས་ཕེབས་སྐྱེལ་ཞུ་བཞིན་པ།
གཙོ་བོ་བསྟན་པའི་བདག་པོ་སྟོན་པ་བཅོམ་ལྡན་འདས་ཡིན་པས་སྟོན་པའི་མཚན་སྔགས་འདྲེན་ན་ཡག་པོ་ཡོད། ཅེས་བཀའ་སྩལ་གྲུབ་རྗེས་ཆོས་འབྲེལ་ཡོངས་སུ་གྲུབ་བསྟུན་ཐེངས་འདིའི་གདན་ཞུ་བ་གཙོ་བོ་ཡིན་པ་སྐུ་ཞབས་ར་ཝི་ཁྲ་ཀུར་ལགས་ཀྱིས་བཀའ་དྲིན་གཏང་རག་གི་མཎྜལ་རྟེན་གསུམ་འདེགས་འབུལ་ཞུས་རྗེས་ཆོས་འབྲེལ་གྱི་མཛད་འཕྲིན་ཁག་ཡོངས་སུ་ལེགས་པར་གྲུབ། ༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་གུང་ལྗགས་སྨིན་རྙིང་མའི་དགོན་པར་མཛད་དེ་ཕྱེད་ཡོལ་ཆུ་ཚོད་ ༡།༣༠ ཙམ་ལ་མ་ནཱ་ལི་ས་གནས་འགོ་འཛིན་ནས་ལོ་འཁོར་གཅིག་རིང་ཁུལ་དེའི་ས་གནས་བོད་མིའི་ལས་བསྡོམས་སྙིང་བསྡུས་ཤིག་༸གོང་ས་མཆོག་ལ་སྙན་སྒྲོན་ཞུས། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་ཡུལ་དེར་གནས་པའི་བོད་མི་རྣམས་ལ་གཙོ་བོར་དམིགས་གནང་མཛད་དེ་བཀའ་སློབ་སྩལ་གྲུབ་རྗེས་ཐེངས་འདིའི་མཛད་འཕྲིན་ཁག་ཡོངས་སུ་ལེགས་གྲུབ་པ་དང་སྦྲགས་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་དང་བཅས་མཎ་ཌིར་ཆིབས་༸ཞལ་བསྒྱུར་བ་བཅས།། །།
