༢༠༡༠ ཟླ་ ༨ ཚེས་ ༡༨ རེས་གཟའ་ལྷག་པ།
༄༅། །འདི་ག་ཤེས་རིག་ལས་ཁུངས་ནས་བཏང་གནས་ནང་། ཕྱི་ལོ་ ༢༠༡༠ ཟླ་ ༨ ཚེས་ ༡༩ དང་ ཚེས་ ༢༠ ཉིན་གཉིས་རིང་མ་སུ་རི་བོད་ཁྱིམ་ནས་གོ་སྒྲིག་ཞུས་པའི་བོད་སློབ་ནང་ཁུལ་ཨང་རྩིས་མཐུད་རྒྱུགས་ཀྱི་དབུ་འབྱེད་མཛད་སྒོའི་སྐུ་མགྲོན་གཙོ་བོར་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ཕེབས་གཏན་འཁེལ་བ་ལྟར་ཕྱི་ཚེས་ ༡༨ སྔ་དྲོ་ལྡ་ས་ནས་ཕེབས་ཐོན་གནང་ཡོད། འགྲན་བསྡུར་ནང་སམ་བྷོ་ཊ་དང་བོད་ཁྱིམ་གཉིས། དབུས་བོད་སློབ་འཛིན་ཚོགས་བཅས་ཀྱི་སློབ་གྲ་ཁག་གི་འཛིན་རིམ་ལྔ་པ་ནས་བཅུ་པ་བར་གྱི་སློབ་ཕྲུག་རྣམས་ཆ་ཤས་ལེན་རྒྱུ་ཡིན་འདུག ཕྱི་ཚེས་ ༡༩ ཉིན་དབུ་འབྱེད་མཛད་སྒོའི་སྐབས་མ་སུ་རི་བོད་ཁྱིམ་སློབ་གྲའི་སློབ་ཕྲུག་ནས་རིགས་ལམ་བརྒྱུད་ཨང་རྩིས་སྦྱོང་བརྡར་གནང་ཕྱོགས་གཟིགས་འབུལ་ཞུ་རྒྱུ་དང་། དེ་རྗེས་སློབ་ཁག་ནང་ཁུལ་ཨང་རྩིས་མཐུད་རྒྱུགས་འགྲན་བསྡུར་དངོས་གཞི་གནང་རྒྱུ། ཕྱི་ཚེས་ ༢༠ སྔ་དྲོ་ཨང་རྩིས་འགྲེམས་སྟོན་དང་རྩེད་རིགས། ཕྱི་དྲོ་སློབ་ཁག་ནང་ཁུལ་ཐད་བརྗོད་གཏམ་བཤད་འགྲན་བསྡུར་དང་མཇུག་བསྡོམས་མཛད་སྒོར་བྱ་དགའ་གསོལ་བསྩལ་གནང་རྒྱུ་རེད་འདུག ཤེས་རིག་དྲུང་ཆེ་མཆོག་མ་སུ་རིར་བཞུགས་རིང་མ་སུ་རི་གཏན་སློབ་ཏུ་གཟིགས་སྐོར་དང་། ཕྱི་ཚེས་ ༢༡ ཉིན་བདེ་སྐྱིད་གླིང་ཉིན་སློབ་དང་། སྤོན་ཊ་གཏན་སློབ། པུར་ཝ་ལ་ཉིན་སློབ་བཅས་ལ་གཟིགས་ཞིབ་གནང་གཏན་འཁེལ་ཡོད་པ་རེད། གོང་གསལ་སློབ་གྲྭ་ཁག་ལ་གཟིགས་ཞིབ་སྐབས་ཤེས་ཡོན་འགན་འཛིན་ཚེ་རིང་བསམ་གྲུབ་ལྷན་བཅར་ཞུ་རྒྱུ་ཡིན་པ་དང་། ཕྱི་ཚེས་ ༢༣ ཉིན་ཤེས་ཡོན་འགན་འཛིན་ཚེ་རིང་བསམ་གྲུབ་ནས་བདེ་སྐྱིད་གླིང་ས་གནས་མི་མང་ལ་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་སྐོར་ངོ་སྤྲོད་དང་དྲི་བ་དྲིས་ལན་གནང་གཏན་འཁེལ་ཡོད་པའི་གནས་ཚུལ་བཅས།།
