༢༠༡༠ ཟླ་ ༨ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢༡ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བཙན་བྱོལ་ལ་ཡོད་པའི་ཐེ་བོ་སྟོད་སྨད་བར་གསུམ་མི་མང་གིས་གོ་སྒྲིག་འོག་མདོ་སྨད་ཐེ་བོ་སྨད་ཀྱི་ཆར་གཏོགས་འབྲུག་ཆུ་རྫོང་དུ་ཆུ་ལོག་གིས་གོད་ཆག་འོག་འདས་གྲོངས་སུ་གྱུར་བ་རྣམས་ཀྱི་བདུན་ཚིགས་གཉིས་པར་སྨོན་ལམ་གསོལ་འདེབས་ཚོགས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ པར་རྒྱལ་བ་ཀརྨ་པ་མཆོག་དབུ་བཞུགས་ཐོག་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་མཆོག་གི་དབུས་བཀའ་བློན་རྣམ་པ་དང། དྲུང་ཆེ་ཁག་གཅིག་དང། རྣམ་གྲྭ་ཕན་བདེ་ལེགས་བཤད་གླིང་གི་མཁན་རིན་པོ་ཆེ་དང་དགེ་འདུན་འདུས་མང་གི་དབུས་རྡ་སའི་ཉེ་འཁོར་གྱི་དགོན་སྡེ་ཁག་གི་གྲྭ་བཙུན་དང་། བོད་ཁྱིམ་སློབ་ཕྲུག རྡ་སའི་སེར་སྐྱ་མི་མང་སོགས་ཁྱོན་མི་གྲངས་སྟོང་ཕྲག་བརྒལ་བ་ལྷན་འཛོམས་ཀྱིས་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་བརྒྱ་ཚར་དང་། མར་མེ་སྟོང་ཚར་འབུལ་བཤམས་དང་འབྲེལ་འཕགས་ཚོགས་འདུས་པ་རྒྱ་མཚོར་བསྙེན་བཀུར་མང་ཇ་དང་། དགེ་འདུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ རེ་ཕུལ་ཏེ་ཆུ་ལོག་གི་འཇིག་པས་རྐྱེན་འདས་སུ་སོང་བ་རྣམས་ཀྱིས་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་རྒྱལ་བའི་གོ་འཕང་རིན་པོ་ཆེ་མྱུར་དུ་ཐོབ་པ་དང་། རྨས་སྐྱོན་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱིས་ཚེ་ལྷག་དོན་ལྡན་ཡོང་བ་གཙོས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་། ཁྱད་པར་འབྱུང་བཞིའི་འཇིག་པ་མི་འབྱུང་བར་བདེ་སྐྱིད་རྗོགས་ལྡན་གྱི་དཔལ་ལ་ལོངས་སུ་སྤྱོད་ཐུབ་པ་སོགས་ཀྱི་སྨོན་ལམ་གསོལ་འདེབས་ཚོགས་ཡོད་པ་བཅས།
