༢༠༡༠ ཟླ་ ༨ ཚེས ༩ རེས་གཟའ་ཟླ་བ།
༄༅། །འདི་གར་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ནས་བཏང་གནས་ནང་འཁོད་དོན། མདོ་ཁམས་སྡེ་དགེ་འཇོ་མདའ་རྫོང་ཁོངས་ཨད་སྤན་དབེན་པའི་ཤང་ངམ་གྲོང་སྡེ། གདོང་སྒྲ་གྲོང་ཚོའི་བོད་མི་ག་ལུག་ལ་ལོ ༡ དང་ལོ་ཕྱེད། དབང་ཕྱུག་ལ་ལོ་ ༡ བཅས་འཇོ་མདའ་རྫོང་ནས་ཁྲིམས་ཐག་བཅད་དེ་བཙོན་འཇུག་བྱེད་བཞིན་ཡོད་པའི་གནས་ཚུལ་གསར་དུ་གོ་ཐོས་བྱུང་འདུགན་ནིང་སྡེ་དགེ་འཇོ་མདའ་རྫོང་ཁོངས་ནས་བོད་མི་མང་པོ་ཞིག་གིས་ས་ཞིང་འདེབས་ལས་མ་བྱས་པར་རྒྱ་གཞུང་ལ་མི་འདོད་པའི་རྣམ་འགྱུར་ཤུགས་ཆེ་སྟོན་སྐབས་རྒྱ་གཞུང་གིས་བོད་མི་ས་ཞིང་དང་པོ་རྨོ་མཁན་ལ་སྒོར་ཁྲི་བརྒྱ་སྤྲོད་རྒྱུ་ཡིན་ཚུལ་སོགས་བཤད་ཀྱང་བོད་མི་རྣམས་ཀྱིས་ཁས་བླངས་མེད་པ་དང་། རྒྱ་གཞུང་གིས་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་བཀྲོལ་ཐོབ་པའི་དགའ་སྟོན་ལེགས་སྐྱེས་ཆེད་ཡིན་ཟེར་ཏེ་རླངས་འཁོར་ཆེ་ཆུང་མང་པོ་སྤྲོད་འཆར་བྱས་ཀྱང་བོད་མི་རྣམས་མ་གྲོས་བསམ་པ་གཅིག་མཐུན་གྱིས་མི་སུ་གང་གིས་རླངས་འཁོར་བླངས་མེད་པ་དང་། ༸གོང་ས་མཆོག་ལ་མཚན་སྨད་སྐུར་འདེབས་ཞུ་དགོས་སྐོར་བརྗོད་ཡོད་ཀྱང་ཁས་ལེན་རྩ་བ་ནས་བྱས་མེད། ད་ལོ་ཡང་རྒྱ་གཞུང་གིས་ས་ཞིང་འདེབས་ལས་མ་བྱས་ན་མི་འགྲིག་པའི་བཙན་བཀའ་ཤུགས་ཆེ་བཏང་ཡོད་པ་དང་། དཔྱིད་ཀ་ཙམ་ལ་གདོང་སྒྲ་གྲོང་ཚོའི་ལྷ་ཁང་དུ་བ་ཛྲ་གུ་རུ་དང་མ་ཎི་སྒྲུབ་བའི་སྐབས་བོད་མི་རྣམས་ཀྱིས་གཅན་གཟན་གྱི་པགས་རིགས་མེ་སྲེག་གཏོང་སྐབས་རྒྱ་གཞུང་གི་ཉེན་རྟོག་པ་དང་དམག་མི་བརྒྱ་ལྷག་འབྱོར་ཏེ་བཀག་འགོག་བྱས་པ་དང་། བོད་མི་མང་པོར་ཚད་ལས་འདས་པའི་ཉེས་རྡུང་བཏང་སྟེ་གྲོང་སྡེ་ནང་སྐོང་སྟེ་དྲི་རྩད་བྱེད་སྐབས་གོང་གསལ་བོད་མི་གཉིས་ནས་རྒྱུ་མཚན་གསལ་བརྗོད་སོགས་བྱས་པར་བརྟེན་འཛིན་བཟུང་བཀག་ཉར་བྱས་པ་མ་ཟད། མཐར་འཇོ་མདའ་རྫོང་ནས་ཁྲིམས་ཐག་བཅད་དེ་བཙོན་འཇུག་བྱས་ཏེ་ཟླ་གྲངས་མང་པོ་འགྲོ་བཞིན་ཡོད་འདུག་ཀྱང་ཟླ་དུས་ཚེས་གྲངས་སོགས་ཞིབ་ཕྲ་ཤེས་རྟོགས་བྱུང་མི་འདུག ད་སྐབས་ས་གནས་དེར་ཉེན་རྟོག་པ་དང་དམག་མི་མང་པོ་རྒྱུན་སྡོད་བྱེད་བཞིན་ཡོད་པ་མ་ཟད། བོད་མི་མང་པོ་ཞིག་ལ་སུན་གཙེར་མང་པོ་བཟོས་རྐྱེན་རི་མགོ་སོགས་སུ་བྲོས་བྱོལ་དུ་འགྲོ་དགོས་ཆགས་ཡོད་པའི་གནས་ཚུལ་ཐོན་འདུག་པ་བཅས།།
