༢༠༡༠ ཟླ་ ༨ ཚེས༌ ༡༢ རེས་གཟའ་ཕུར་བུ།
༄༅། །འདི་གར་ཨ་རི་སྐུ་ཚབ་དོན་ཁང་ནས་འབྱོར་བའི་གནས་ནང། ཉེ་ཆར་བོད་མདོ་སྨད་འབྲུག་ཆུ་ས་ཁུལ་དུ་ཆུ་ལོག་གི་འཇིག་པ་བྱུང་བར་དམིགས་ནས་ནིའུ་ཡོག་དང་། ནིའུ་ཇར་སི་ས་གནས་བོད་རིགས་སྤྱི་མཐུན་ཚོགས་པས་དེ་རིང་ཕྱི་ཚེས་བཅུའི་དགོང་དྲོ་གྲོང་ཁྱེར་ནིའུ་ཡོག་ནང་ཡོད་པའི་ཤང་རི་ལ་བོད་ཀྱི་མགྲོན་ཁང་དུ་སྨོན་ལམ་ཞབས་རིམ་ཚུགས་ནས་ཆུ་ལོག་གི་གོད་ཆག་ཁྲོད་འདས་གྲོངས་སོང་བ་རྣམས་ལ་གདུང་སེམས་མཉམ་སྐྱེ་གནང་ཡོད་པ་དང༌། དགོང་དྲོ་ཆུ་ཚོད་བདུན་པར་ཞབས་རིམ་ཚུགས་ནས་ཆུ་ཚོད་དགུ་དང་ཕྱེད་ཀའི་ཐོག་མཇུག་བསྒྲིལ་ཡོད། དུས་ཡུན་ཆུ་ཚོད་གཉིས་ལྷག་ཙམ་གྱི་སྨོན་ལམ་ཞབས་རིམ་དེར་གྲོང་ཁྱེར་ནིའུ་ཡོག་དང་། མངའ་སྡེ་ནིའུ་འཇར་སི་ནང་བཞུགས་པའི་དགེ་འདུན་པ་དང་། བོད་གཞུང་ཨ་རི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་མཆོག་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། ས་གནས་མང་ཚོགས་བཅས་མི་གྲངས་བརྒྱ་སྐོར་ཞིག་མཉམ་ཞུགས་གནང་ཡོད། སྐུ་ཚབ་དོན་གཅོད་བློ་བཟང་སྙན་གྲགས་མཆོག་ནས་ཞབས་རིམ་སྨོན་ལམ་གྲུབ་རྗེས་གསུང་དོན། ད་ལམ་བོད་མདོ་སྨད་འབྲུག་ཆུ་ཁུལ་དུ་ཤིན་ཏུ་ཡིད་སྐྱོའི་གནས་ཚུལ་བྱུང་བ་དེ་བློ་ཕམ་གྱི་རང་བཞིན་ལས་མ་འདས་ཤིང་། ས་གནས་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ལས་བྲེལ་ཤིན་ཏུ་ཆེ་ན་ཡང་དེ་རིང་མ་སྐུལ་དང་བླང་གིས་སྨོན་ལམ་གསུང་འདོན་དང་། ཞབས་རིམ་གསོག་སྒྲུབ་གོ་སྒྲིག་གནང་བར་བོད་གཞུང་ཨ་རི་སྐུ་ཚབ་དོན་གཅོད་ཁང་གི་ཚབ་ཞུས་ནས་ཐུགས་རྗེ་ཆེ་ཞུས་གནང་བ་མ་ཟད། ས་གནས་གཞན་དག་ནས་ཀྱང་ཞབས་རིམ་གསོག་སྒྲུབ་དང་། སྨོན་ལམ་གསུང་འདོན་གྱི་ལས་འགུལ་སྤེལ་གནང་ཡོང་བའི་འབོད་སྐུལ་ཡང་གནང་ཡོད་པ་རེད། མདོ་སྨད་བླ་བྲང་བཀྲིས་འཁྱིལ་ཉེ་འདབས་སུ་ཆགས་པའི་འབྲུག་ཆུ་རྫོང་ནི་བོད་ཁུལ་གྱི་ནགས་ཚལ་རྒྱ་ཁྱོན་ཆེ་བའི་ས་ཁུལ་ཞིག་ཡིན་ཞིང་། དེ་རིང་ལྟ་བུའི་ཆུ་ལོག་ཚབས་ཆེན་བྱུང་བའི་གནས་ཚུལ་ལོ་རྒྱུས་ཐོག་ཧ་ལམ་གོ་མྱོང་མེད། གནས་ཚུལ་ཐོན་གསལ་ལ་གཞིགས་ན། ཀན་སུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་གི་མིག་སྔའི་མི་འབོར་ནི་ཆིག་འབུམ་གསུམ་ཁྲི་ཙམ་ཡིན་པ་དང་། བོད་རིགས་ཀྱིས་རྫོང་དེའི་སྤྱིའི་མི་འབོར་གྱི་བརྒྱ་ཆ་བཞི་ཙམ་ལས་ཟིན་གྱི་མེད་པ་རེད།
