༢༠༡༠ ཟླ་ ༨ ཚེས་ ༦ རེས་གཟའ་པ་སངས།
༄༅། །འདི་གར་ནང་སྲིད་ལས་ཁུངས་ནས་བཏང་གནས་ནང་གསལ། བལ་ཡུལ་གཞུང་འབྲེལ་མིན་པའི་ཚོགས་པ་ཛག་རི་ཏི་ས་མའ་ཇི་ནེ་པལ་ཞེས་པའི་ཚོགས་པ་ནས་ཕྱི་ལོ་ ༢༠༡༠ ཟླ་ ༧ ཚེས་ ༡༠ ཉིན་ཀ་ཐ་མན་གྲུ་བལ་གཞུང་ཡུལ་སྐོར་སྤྲོ་འཆམ་ལས་ཁུངས་ཀྱི་ཚོགས་ཁང་དུ་སྤྱི་ཚོགས་ནང་གཟེངས་སུ་ཐོན་པའི་མི་སྣ་གྲངས་ ༡༧ ལ་གཟེངས་བསྟོད་ཀྱི་བྱ་དགའ་གནང་ཡོད་པའི་ཁོངས་སུ་བལ་ཡུལ་མཆོད་འཇོར་ས་གནས་འགོ་འཛིན་ཤོང་ནུབ་ཚེ་རིང་དོན་གྲུབ་ལགས་སུ་བལ་ཡུལ་བོད་མིའི་སྐྱབས་བཅོལ་སྤྱི་ཚོགས་ནང་ཞབས་འདེགས་གང་ལེགས་ཞུས་པའི་བྱ་དགའ་ཐོབ་འདུག དེ་ཡང་བྱ་དགའ་དེ་སྐུ་མགྲོན་གཙོ་བོ་བལ་ཡུལ་གཞུང་གི་རྩ་ཁྲིམས་དང་རིག་གཞུང་བློན་ཆེན་གཅིག་ལྕོགས་མིན་ནན་རྡར་རི་ཇལ་མཆོག་གིས་གནང་འདུག དེ་ནས་སྐུ་མགྲོན་གཙོ་བོ་མཆོག་གིས་གསུང་བཤད་གནང་གྲུབ་རྗེས་ཚེ་རིང་དོན་གྲུབ་ལགས་ཀྱིས་མྱོང་ཚོར་དང་ལྷན་གསུང་བཤད་གནང་དོན། ཛག་རི་ཏི་ས་མའ་ཇི་ནེ་པལ་ཚོགས་པ་ནས་དེ་རིང་གི་མཛད་སྒོ་འདི་གོ་སྒྲིག་དང་སྤྱི་ཚོགས་ནང་གཟེངས་སུ་ཐོན་པའི་གལ་ཆེའི་མི་སྣ་རྣམས་ལ་བྱ་དགའ་གནང་བར་ངས་ཐུགས་རྗེ་ཆེ་ཞུ་རྒྱུ་དང་ཆབས་ཅིག་རང་ཉིད་ངོས་ནས་བལ་ཡུལ་ནང་ལོ་ངོ་ ༢༡ རིང་སྤྱི་ཚོགས་ཞབས་ཞུ་གང་ལེགས་ཞུས་པའི་བྱ་དགའ་འདི་བལ་ཡུལ་དང་རྒྱ་གར་ནང་ཐོབ་པའི་བྱ་དགའ་ཐེངས་ལྔ་པ་དེ་ཡིན་པར་བརྟེན། ཛག་རི་ཏི་ས་མའ་ཇི་ནེ་པལ་ཚོགས་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ངས་དེ་རིང་འདིར་སྤྱིར་བོད་མི་སྐྱབས་བཅོལ་བ་དང་ཡང་སྒོས་བཙན་བྱོལ་བོད་གཞུང་གི་སྐུབ་ཚབ་ཞུས་ཏེ་བལ་ཡུལ་གཞུང་དང་མི་མང་ནས་ང་ཚོ་སྐྱབས་བཅོལ་བར་མི་ལོ་ ༥༠ རིང་ཐུགས་ཁུར་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོ་བོད་མི་སྐྱབས་བཅོལ་བ་རྣམས་ནས་བལ་ཡུལ་གཞུང་གི་རྩ་ཁྲིམས་ཀྱི་སྒྲོམ་གཞིའི་ནང་ཡུལ་མི་མཉམ་དུ་འཆམ་མཐུན་ཐོག་སྡོད་ཀྱི་ཡོད། འོན་ཀྱང་ང་ཚོར་དཀའ་ངལ་ཁ་ཤས་ཡོད་པའི་ནང་ནས་བལ་ཡུལ་དུ་སྐྱེས་པའི་བོད་མིར་ད་དུང་ཡང་བལ་ཡུལ་གཞུང་ནས་སྐྱབས་བཅོལ་གྱི་ལག་འཁྱེར་གནང་གི་མེད། དེར་བརྟེན་ང་ཚོ་བོད་པ་ཚོར་ལས་ཀ་རག་རྒྱུ་དང་འགྲུལ་བཞུད་ཀྱི་དཀའ་ངལ་མང་པོ་ཞིག་འཕྲད་བཞིན་འདུག་པས། ད་རེས་བྱ་དགའ་ཐོབ་མཁན་དང་མི་མང་ཡོངས་ནས་བལ་ཡུལ་གཞུང་ལ་འབོད་སྐུལ་ཞུས་ཏེ་ང་ཚོ་བོད་མི་སྐྱབས་བཅོལ་བའི་དཀའ་ངལ་རྣམས་སེལ་རྒྱུའི་རེ་འདུན་ཞུ་བཞིན་ཡོད་ཅེས་སོགས་ཀྱི་གསུང་བཤད་གནང་འདུག དེ་བཞིན་ཁོང་ལ་གནང་བའི་བསྔགས་བརྗོད་བྱ་དགའི་བརྗོད་ཚིག་ནང་འཁོད་དོན། གུས་བརྩི་ཐོག་སྤྱི་ཚོགས་ཞབས་ཞུ་གཟེངས་སུ་ཐོན་པའི་ཕྱི་ལོ་ ༢༠༡༠ ལོའི་བྱ་དགའ་ཚེ་རིང་དོན་གྲུབ་ལགས་སུ་ཕུལ་དགོས་དོན་ནི་ཁོང་གིས་ལོ་མང་རིང་སྤྱི་ཚོགས་ནང་བརྗོད་དཀའ་བའི་འབད་བརྩོན་ཐོག་བོད་མིའི་སྐྱབས་བཅོལ་གནས་སྟངས་འབྲེལ་བ་དམ་ཟབ་དང་ཡར་རྒྱས་གོང་འཕེལ། རིག་གཞུང་སོགས་མི་ཉམས་རྒྱུན་འཛིན་དང་མང་ཚོགས་ཀྱི་རེ་སེམས་ལྟར་སྤྱི་ཚོགས་འཕེལ་རྒྱས་དང་ཕན་རླབས་ཆེད་ཕྱི་གསལ་ནང་གསལ་གནང་ཡོད་པ་ནི་བསྔགས་བརྗོད་ཞུ་འོས་པ་ཞིག་ཡིན། སྐྱབས་བཅོལ་བོད་མིའི་སྤྱི་ཚོགས་ལས་ཁུངས་ཀྱི་ཚབ་གནང་སྟེ་སྤྱི་ཚོགས་དང་དཔལ་འབྱོར་ཡར་རྒྱས་ལས་འགུལ་དང་དམིགས་བསལ་སྤྱི་ཚོགས་ཞབས་ཞུའི་སྡེ་ཚན་ཐོག་ཕྱག་ལས་གཟེངས་སུ་ཐོན་པ་གནང་ཡོད་པར་བལ་ཡུལ་རྒྱལ་ཁབ་ནང་མིག་དཔེ་ལེན་རྒྱུ་ཡིན་པའི་བསྔགས་བརྗོད་ཞུ་དགོས་པ་ཡིན་ཞེས་འཁོད་ཡོད་པ་བཅས།
