༢༠༡༠ ཟླ་ ༨ ཚེས་ ༣༡ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢༩ རེས་གཟའ་ཉི་མའི་ཕྱེད་ཡོལ་ཆུ་ཚོད་ ༤ ཙམ་ལ་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱེས་པའི་བོད་ཁྱིམ་གཞོན་ནུའི་སྡོད་ཁང་ (TCV Youth Hostel) ནང་དུ་བཙན་བྱོལ་བོད་མིའི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་གིས་ས་གནས་བོད་རིགས་ ༣༠༠ ཙམ་འདུ་འཛོམས་བྱུང་བའི་ལྷན་ཚོགས་སུ་ཆེད་ཕེབས་ཀྱིས་ཆུ་ཚོད་གཉིས་ལྷག་ཙམ་རིང་། བོད་ཀྱི་རིག་གཞུང་རྒྱུན་འཛིན་དང་། བཙན་བྱོལ་བོད་མིའི་ལས་འགན། ཞེས་པའི་བརྗོད་གཞིའི་ཐོག་གསུང་བཤད་གནང་དོན། བོད་མི་ཚོས་སྲང་ལམ་དུ་ངོ་རྒོལ་སྐད་འབོད་བྱེད་རྒྱུ་དང། འགྲེམས་སྟོན་བྱེད་རྒྱུ། རིག་གཞུང་འཁྲབ་སྟོན་སོགས་གོ་སྒྲིག་བྱས་པ་ཙམ་ལ་བོད་ཀྱི་རིག་གཞུང་མི་ཉམས་རྒྱུན་འཛིན་ཡོང་གི་ཡོད་པར་ཆ་མ་བཞག་པར། བོད་མི་མི་རེ་ངོ་རེས་ཉིན་རེའི་འཚོ་བའི་ནང་རང་ལས་གཞན་གཅེས་ཞེས་པའི་བོད་པའི་ལེགས་བྱང་གཏིང་ཟབ་ཡོད་པའི་ཡ་རབས་བཟང་པོའི་ཀུན་སྤྱོད་དེ་ཉམས་ལེན་བྱེས་པའི་ཐོག་བོད་ཀྱི་རིག་གཞུང་རྒྱུན་འཛིན་བྱེད་ཐུབ་པ་ཞིག་བྱེད་དགོས། དེར་བརྟེན་དེ་སྔ་མཁས་དབང་ཞིག་གིས་འཛམ་གླིང་མི་མང་རྣམས་ཀྱིས་བོད་ཀྱི་ལེགས་བྱང་བརླག་བཅུག་པ་ཡིན་ན་འགྲིག་ཐབས་མེད་སྐོར་གསུངས་ཡོད་ཅེས་བཀའ་ཁྲི་མཆོག་གིས་འགྲེལ་བརྗོད་གནང་ཡོད་པ་མ་ཟད། འཛམ་གླིང་ཤར་ཕྱོགས་ཀྱི་རྒྱལ་ཁབ་རྒྱ་གར་དང་བོད། རྒྱ་ནག་བཅས་ཀྱི་ལེགས་བྱང་གི་ངོ་བོ་དང་རྣམ་པ་གང་འདྲ་ཡིན་མིན་དང་། ལེགས་བྱང་དེ་དག་ནུབ་ཕྱོགས་རྒྱལ་ཁབ་ཀྱི་ལེགས་བྱང་ལས་མི་འདྲ་བར་རྣམ་པ་ཐ་དད་ཡིན་ལུགས་ཀྱིས་འགྲེལ་བཤད་ཟབ་རྒྱས་གནང་ཡོད་ཅིང། ཕྱོགས་མཚུངས་བཀའ་ཁྲི་མཆོག་གིས་ཕྱི་ལོ་ ༡༩༥༩ ནས་བོད་ནང་བསམ་བཞིན་དུ་བྱས་མིན་ལ་མ་ལྟོས་པར་བོད་ཀྱི་རིག་གཞུང་རྩ་བརླག་འགྲོ་བཞིན་པར་བརྟེན་བོད་ཀྱི་ལེགས་བྱང་མི་ཉམས་རྒྱུན་འཛིན་བྱེད་རྒྱུ་དེ་མངོན་གསལ་དོད་པོའི་ཐོག་སེམས་འཚབ་བྱེད་དགོས་པ་ཞིག་ཆགས་ཡོད་སྐོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལུང་འདྲེན་གནང་ཡོད། དེ་བཞིན་བཀའ་ཁྲི་མཆོག་གིས་མུ་མཐུད་གསུང་དོན། དེང་སྐབས་བཙན་བྱོལ་བོད་མིའི་སྤྱི་ཚོགས་དང་། བོད་ནང་དུ་བོད་པའི་ལེགས་བྱང་ཉམས་ཆག་འགྲོ་བཞིན་ཡོད་པས་བོད་པའི་རིག་གཞུང་གི་གནས་སྟངས་ཐོག་ཉེན་ཚབས་ཆེན་པོ་ཆགས་ཡོད། བཙན་བྱོལ་ནང་རང་དབང་ཐོག་ནས་ལེགས་བྱང་ཉམས་ཆག་གཏོང་བཞིན་ཡོད་པ་དང། བོད་ནང་གཞན་དབང་བཙན་གནོན་འོག་བོད་པའི་རིག་གཞུང་ཉམས་ཆག་གཏོང་བཞིན་ཡོད། དེར་བརྟེན་སོ་སོའི་རིག་གཞུང་གཅེས་འཛིན་བྱེད་རྒྱུ་དེ་བོད་མི་མི་རེ་ངོ་རེས་འབད་བརྩོན་གྱིས་རང་རང་སོ་སོའི་སྒོ་གསུམ་གྱི་ཀུན་སྤྱོད་དེར་བྱ་ར་བྱེད་པའི་ཐོག་ཡོང་དགོས་པ་ཞིག་ཡིན། ཞེས་གསུངས་ཡོད།
དེ་བཞིན་བཀའ་ཁྲི་མཆོག་གིས་དེང་དུས་བོད་པའི་གཞོན་སྐྱེས་ཚོའི་ཁྲོད་བོད་པའི་མཐུན་མོང་མིན་པའི་ལེགས་བྱང་དང་ཆབ་སྲིད་ཀྱི་གནད་དོན་ཐོག་ཤེས་ཚད་ཞན་པོ་ཡོད་པའི་གཟིགས་ཚུལ་བྱུང་ཡོད་སྐོར་དང། ཕྱོགས་མཚུངས་བཙན་བྱོལ་བོད་གཞུང་གིས་བོད་པའི་མཐུན་མིན་ལེགས་བྱང་མི་ཉམས་རྒྱུན་འཛིན་བྱེད་རྒྱུ་དང། བོད་ཀྱི་གནད་དོན་སེལ་རྒྱུ་བཅས་གནད་དོན་དེ་གཉིས་ཐོག་གཙོ་འགན་གྱིས་འབད་བརྩོན་གནང་རྒྱུ་ཡིན་སྐོར་འགྲེལ་བརྗོད་གནང་ཡོད།
ཚོགས་འདུ་དེ་བོད་མིའི་ཐོབ་ཐང་དང་རང་དབང་སླར་གསོ་ལྷན་ཚོགས་ཞེས་པ་དང། བོད་དོན་གླེང་བ། ཞེས་པ་སྦེང་ལོར་གྲོང་ཁྱེར་གྱི་མཐོ་སློབ་ཁག་ཏུ་སློབ་གཉེར་བྱེད་བཞིན་པའི་བོད་པའི་སློབ་ཕྲུག་གི་ཚོགས་པ་ཁག་གཉིས་ཀྱིས་ཟུང་འབྲེལ་ཐོག་གོ་སྒྲིག་གནང་བ་ཞིག་ཡིན་འདུག་པ་བཅས།།
