༢༠༡༠ ཟླ་ ༨ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༤ ཉིན་ཐེ་ཝན་བོད་གཞུང་སྐུ་ཚབ་དོན་ཁང་གིས་གོ་སྒྲིག་འོག་ཐེ་ཝན་རྒྱལ་ས་ཐེ་པའི་ནང་བོད་མདོ་སྨད་འབྲུག་ཆུ་རྫོང་དུ་ཆུ་རུད་དང་ས་ཉིལ་བ་སོགས་ཀྱི་གོད་ཆག་ཚབས་ཆེ་བྱུང་བ་དེ་མཚུངས་ལ་དྭགས་རྒྱལ་ས་སླེའི་ནང་ཆུ་སྤྲིན་རྡོལ་ཏེ་ཆུ་རུད་དང་ས་ཉིལ་བ་སོགས་འབྱུང་བའི་རྐྱེན་ངན་འོག་མི་རྒྱུ་གཉིས་ལ་གནོད་སྐྱོན་ཚབས་ཆེ་ཕོག་པ་རྣམས་ཀྱི་ཆེད་དུ་སྨོན་ལམ་གསུང་འདོན་གནང་ཡོད། དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡།༣༠ ནས་ ༣།༣༠ བར་སྐུ་ཚབ་དོན་ཁང་གི་ནང་ཆོས་འཛིན་གྲྭའི་ནང་ཆོས་སློབ་ཁྲིད་གནང་མཁན་དགེ་བཤེས་འཇམ་དཔལ་ཆོས་འཛིན་ལགས་དབུ་བཞུགས་ཐོག་སྐུ་ཚབ་དོན་ཁང་གི་ལས་བྱེད་ཡོངས་དང་ནང་ཆོས་ཞུ་མཁན་སློབ་ཕྲུག་བཅས་ཚང་འཛོམས་ཀྱིས་དམིགས་བསལ་སྨོན་ལམ་གསུང་འདོན་གནང་ཡོད། ཕྱོགས་མཚུངས་ཐེ་ཝན་གྲོང་ཁྱེར་ཊེའི་ཅུང་ནང་གོང་ཚེས་ཉིན་གྱི་ཉིན་རྒྱ་དུས་གཅིག་ཏུ་སྐུ་ཚབ་དོན་ཁང་གི་ནང་ཆོས་འཛིན་གྲྭའི་སློབ་མ་ཁྱོན་གྲངས་ ༥༠ ཙམ་འདུ་འཛོམས་ཀྱིས་སྨོན་ལམ་གསུང་འདོན་གནང་བ་དང་སྦྲགས་རྐྱེན་འདས་སུ་གྱུར་བ་རྣམས་ལ་མཆོད་མེ་བརྒྱ་ཚར་ཕུལ་འདུག དམིགས་བསལ་སྨོན་ལམ་སྐབས་ཆོས་ཚོགས་ཀྱི་སློབ་མ་རྣམས་ནས་དྭངས་བླང་ཐོག་ཕྱག་རོགས་གནང་བར་ཐེ་ཝན་བོད་གཞུང་སྐུ་ཚབ་དོན་ཁང་གིས་སྙིང་ཐག་པ་ནས་རྗེས་སུ་ཡི་རང་དང་ཐུགས་རྗེ་ཞུས་འདུག་པ་བཅས།།
