༢༠༡༠ ཟླ་ ༨ ཚེས་ ༡༧ རེས་གཟའ་མིག་དམར།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༨
ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྔོན་ནས་གསོལ་འདེབས་ཞུས་དོན་ལྟར་དྭགས་པོ་བཤད་གྲུབ་གླིང་དགོན་དུ་ཆིབས་སྒྱུར་སྐྱོང་སྐབས་དྭགས་པོ་རིན་པོ་ཆེ་བློ་བཟང་འཇམ་དཔལ་བྱམས་པ་རྒྱ་མཚོ་མཆོག་གིས་སྤོས་སྣེ་དང་དགོན་དེའི་དགེ་འདུན་པ་རྣམས་ནས་དུང་རྒྱས་སྔོན་བསུས་ཏེ་གཙུག་ལག་ཁང་དུ་གདན་འདྲེན་ཞུས་རྗེས་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དགེ་འདུན་འདུས་དམངས་ཡོང་དང་ལྷན་མཁའ་མཉམ་མ་གསུང་འདོན་མཛད།
དྭགས་པོ་བཤད་སྒྲུབ་གླིང་དགེ་འདུན་པ་ཚོས་རིགས་ལམ་བགྲོ་གླེང་གནང་བཞིན་པ།
དེ་རྗེས་དགོན་དེའི་དགེ་འདུན་པ་རྣམས་ཀྱིས་དམ་བཅའ་འཇོག་གནང་གིས་རྟགས་གསལ་སྤྱན་བསྟར་ཞུས་པར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་གསན་གཟིགས་མཛད་རྗེས་བཞུགས་ཁྲི་རིན་པོ་ཆེར་༸ཞབས་སོར་འཁོད་དེ་བྱང་ཆུབ་སེམས་པའི་སྡོམ་པ་འབོགས་ཆོག་གིས་ཆོས་འབྲེལ་གྱི་སྔོན་འགྲོའི་གསུང་ཆོས་སྐབས་བཀའ་སློབ་སྩལ་དོན། སྔོན་ལ་སྨོན་པ་སེམས་བསྐྱེད་བྱེད་རྒྱུ་དང་དེ་ནས་མཇུག་སྡོམ་པ་འབོགས་ཆོག་བྱེད་ཀྱི་ཡིན། སྔོན་ལ་སེམས་བསྐྱེད་འབོགས་ཆོག་བྱེད་རྒྱུའི་སྣོད་དེ་ལ་སྟོན་པ་བཀའ་དྲིན་ཅན་མཚན་དང་དཔེ་བྱའི་རྒྱན་པའི་མཆོག་ཏུ་གྱུར་བའི་རྣམ་པ་ཅན་སྐུ་བཞིའི་བདག་ཉིད་དེ་ལྟ་བུའི་རྒྱལ་བ་སྲས་དང་བཅས་པ་དངོས་སུ་ཡོད་སྙམ་པ་བྱེད་དགོས། དེའི་མཐའ་འཁོར་ལ་ཀླུ་སྒྲུབ་ཐོགས་མེད་ལ་སོགས་པ་ཡོད་སྙམ་པ་བྱེད་དགོས་ཞེས་དང་། ཡང་༸གོང་ས་མཆོག་གིས་ཆོས་འབྲེལ་སྩལ་དོན།
དྭགས་པོ་བཤད་སྒྲུབ་གླིང་དགོན་པ།
སྤྱིར་འཛམ་གླིང་འདིའི་ནང་ཆོས་བརྒྱུད་མི་འདྲ་བ་མང་པོ་དེ་དག་འཛམ་གླིང་འདིའི་སྟེང་མི་ས་ཡ་མང་པོ་ཡོད་པ་དེ་དག་ལ་ཕན་ཐོགས་ཡོང་དང་ཡོང་བཞིན་པ་དང་མ་འོངས་པར་ཡང་ཕན་ཐོགས་ཡོད་པར་གནས་ཡོད་པ་དེ་དག་གི་ནང་ནས་ང་ཚོ་བོད་གངས་ཅན་གྱི་ལྗོངས་སུ་ཡོད་པའི་སངས་རྒྱས་ཀྱི་ཆོས་འདི་དང་། ཧི་མཱ་ལ་ཡའི་རི་རྒྱུད་དུ་ཆགས་པའི་ཡུལ་གྲུ་དེ་དག་ལ་ཡོད་པའི་ཆོས་དེ་དག་བོད་གངས་ཅན་ལྗོངས་ཀྱི་ཆོས་དང་གཅིག་པ་ཆགས་ཡོད། ང་ཚོས་གཅིག་བལྟས་པ་ཡིན་ན་རྒྱ་གར་འཕགས་པའི་ཡུལ་གཙོ་བོར་གྱུར་བའི་འཛམ་གླིང་ནང་འདས་པའི་ལོ་ངོ་སྟོང་ཕྲག་གསུམ་བཞི་ཙམ་ནས་འགོ་བཙུགས་ཏེ་ཆོས་དད་བྱེད་རྒྱུ་ཞིག་སླེབས་ཏེ་ལོ་སྟོང་ཕྲག་ཁ་ཤས་ཆོས་དད་བྱས་ཏེ་བསྡད་པ་རེད། དེ་ཡང་མིའི་བསམ་བློའི་ནང་དཀའ་ངལ་འཕྲད་ཡོང་སྐབས་རང་ཉིད་ཀྱི་དཀའ་ངལ་དེ་སེལ་རྒྱུར་སྐྱབས་བླ་ན་མེད་པ་ཞིག་ལ་ཡིད་ཆེས་བྱས་ཏེ་ལོ་སྟོང་ཕྲག་ཁ་ཤས་རིང་ལ་སོ་སོའི་གནས་སྐབས་དང་མཐར་ཐུག་གི་འདོད་དོན་བསྒྲུབ་རྒྱུ་དེ་གཙོ་བོ་དད་པ་བྱས། དཀོན་མཆོག་གམ་སྐྱབས་ངོ་མ་ཞིག་ལ་ཡིད་ཆེས་བྱས་ནས་གསོལ་བ་འདེབས་པ་དེ་འདྲ་བྱེས་ཏེ་སོང་ཡོད། དེ་རྗེས་འདས་པའི་ལོ་ངོ་ཉིས་བརྒྱ་ལྷག་ཙམ་ནང་ཚན་རིག་དང་འཕྲུལ་ཆས་ཡར་རྒྱས་ཕྱིན་པ་རེད། དེ་ལྟར་ཡར་རྒྱས་ཕྱིན་པའི་འོག་ནས་མིའི་དཀའ་ངལ་སེལ་རྒྱུ་དང་མཐུན་རྐྱེན་བསྒྲུབ་རྒྱུར་ད་ལྟ་ད་ལྟ་འབྲས་བུ་མཐོང་རྒྱུ་ཡོད་པ་ཞིག་ཆགས་ཡོང་དུས་འཛམ་གླིང་འདིའི་སྟེང་གཞི་ནས་འཕྲུལ་ཆས་དང་དངོས་པོ་ཡར་རྒྱས་ལ་གཙོ་བོ་དམིགས་རྒྱུ་ཞིག་ཆགས་ཡོད། མི་མང་ཆེ་བ་དེ་དག་གི་སེམས་ཀྱི་གཞི་ཕུགས་ནས་རེ་བ་བཅོལ་ས་དེ་དངོས་པོ་ཡར་རྒྱས་ཤིག་ལ་རེ་བ་བཅོས་རྒྱུ་ཞིག་ཆགས་ཡོད། རིགས་གཅིག་ནི་ཆོས་ཁས་ལེན་གྱི་མེད། ཆོས་ཁས་ལེན་བྱེད་མཁན་ཚོས་ཀྱང་ཆོས་དེ་གནའ་རབས་ཀྱི་ལུགས་སྲོལ་ལྟ་བུ་བྱེད་པ་ལས་གཙོ་བོ་དངོས་པོ་ཡར་རྒྱས་བསྒྲུབ་རྒྱུ་དེ་ལྟར་གནས་ཡོད། དུས་རབས་ཉི་ཤུ་བའི་སྨད་ཆ་ནས་རིམ་པས་དངོས་པོ་ཡར་རྒྱས་ཁོ་ནས་སེམས་ཀྱི་བདེ་སྐྱིད་དང་ཞི་བདེ་ཡོང་ཐུབ་རྒྱུ་མེད་པ་ཞིག་དང་། དངོས་པོ་ཡར་རྒྱས་གཅིག་པུའི་སྟེང་སོང་བ་ཡིན་ན། ཕྱི་དངོས་པོ་སེམས་ཀྱི་བདེ་སྐྱིད་སྐྲུན་རྒྱུར་འཕྲལ་སེལ་གྱི་ཡིད་ཚིམས་པ་ལྟ་བུ་མ་གཏོགས་དངོས་སུ་སེམས་ལ་ཞི་བདེ་སྐྲུན་ཐུབ་རྒྱུ་མེད་པ་ཞིག་དང་། དེ་བས་དངོས་པོ་ཡར་རྒྱས་སོང་བའི་སྐབས་དེར་འདོད་སེས་ཆེ་རུ་ཕྱིན་པའི་ཐོག་ནས་འགྲན་བསྡུར་དང་། ཕྲག་དོག་བྱེད་རྒྱུ། དེ་བཞིན་གཅིག་གིས་གཅིག་ལ་མགོ་སྐོར་གཡོ་སྒྱུ་ཐུབ་ཚོད་སོགས་ཡོང་གི་འདུག དེ་འདྲ་ཡིན་དུས་རིམ་པས་སེམས་ལ་ཞི་བདེ་ཞིག་དགོས་ཀྱི་ཡོད་པར་དོ་སྣང་གསར་པ་ཞིག་བསླེབས་ཡོད། ལུས་པོའི་འཕྲོད་བསྟེན་ཡིན་ནའང་སེམས་ལ་ཞི་བདེ་ཡོད་ན་ལུས་པོའི་འཕྲོད་བསྟེན་ལ་ཕན་ཐོགས་ཡོད། དངོས་པོ་ཡར་རྒྱས་ཇི་ཙམ་ཡོད་ཀྱང་སེམས་ཀྱི་ཞི་བདེ་སྒྲུབ་ཐུབ་ཀྱི་མེད་པར་སོང་འཕྲོད་བསྟེན་ཐད་ནས་ཀྱང་དཀའ་ངལ་ཞིག་ཡོང་གི་འདུག་པས་གཞི་ནས་ནང་སེམས་ཀྱི་ཐོག་དོ་སྣང་བྱེད་རྒྱུ་དེ་དུས་རབས་ཉི་ཤུ་པའི་མཇུག་དང་དུས་རབས་ཉེར་གཅིག་པའི་མགོར་བསླེབས་ཡོད། ཅེས་སོགས་ཀྱི་ཆོས་འབྲེལ་གྲུབ་བསྟུན་བྱང་ཆུབ་སེམས་པའི་སྡོམ་པ་འབོགས་ཆོག་གི་ཆོས་འབྲེལ་དངོས་གཞི་སྩལ་གྲུབ་རྗེས་དྭགས་པོ་བཤད་གྲུབ་གླིང་དགོན་གྱི་དབུ་བླ་དྭགས་པོ་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་ཏེ་དགོན་དེའི་ནང་གི་མཛད་འཆར་རྣམས་ཡོངས་སུ་གྲུབ་ཏེ་པ་ཏི་ཀུལ་བོད་ཁྱིམ་ལག་ཤེས་སློབ་གྲྭར་ཆིབས་༸ཞལ་བསྒྱུར། དགོན་དེར་ཆོས་ཞུར་ཕྱི་རྒྱལ་མི་རིགས་དང་རྒྱ་རིགས་བོད་རིགས་བཅས་ཁྱོན་བསྡོམས་མི་གྲངས ༣༠༠༠ བརྒལ་བ་བཅར་འདུག་པ་བཅས།།
